龍門冰室 (已結業)

今日去銅鑼灣經過龍門冰室，又有啲肚餓，諗起呢間正評都比較多，同埋喺雜誌好似又寫過，所以今日特登嚟試，因為下午茶時段關係，叫咗兩個瑞士雞翼餐，裏面有個炒蛋白湯意粉，另一個就火腿湯通粉，飲品就叫咗一杯熱華田，另外一杯就叫咗凍嘅cappuccino。總括嚟講個雞翼好有水準，個瑞士汁甜甜地，我諗大人小朋友都一定鍾意食。另外有驚喜嘅係個炒蛋白，因為比較少冰室或茶餐廳有蛋白叫，通常都係炒蛋，我以為佢可能都係得少量蛋白，但係佢個蛋白好大份，我諗有成三至四隻雞蛋嘅蛋白分量炒埋出嚟。其他就不過不失，而cappuccino都幾好飲。 總括嚟講因為個價錢都唔使80蚊，以咁嘅價錢喺銅鑼灣食到個有特色又出名嘅餐，都真係抵食。