影片
更多
2018-05-21
368 瀏覽
為左寫呢個食評我特登開個account, 係因為唔想再有其他人中伏！第一次試新嘢，早上返到太和見到港鐵站有張”細蓉記”既海報，就係因為碗雲吞麵所以我決定去試，點知一坐低，個姐姐話11:30分前無水餃雲吞，咁我都坐低左唯有改叫早餐沙爹牛肉腸仔通粉。係我等緊既時候，隔離個婆婆食完飯，同個店員講，你地沖呢杯都唔係我飲開既阿華田，淡而無味，同水一樣。個店員一於懶理笑笑口話，阿華田係咁架，之後行開左，果時我都不以為意。到碗粉黎到，我見到啲牛肉咁厚，心諗已經中伏，好在有兩條廚師腸搭救我都算，最多下次唔黎。係呢個時候，有個男士坐我隔離點左碗沙爹牛肉麵，凍檸茶，唔夠兩分鐘個店員同佢講，暫時無凍檸茶因為無檸檬，飲凍奶茶好唔好？果位男士好無奈但諗左一陣，最終都話是但啦好啦，最精彩既部分，係2分鐘後開始。以下係對話內容：👨🏻：唔該，頭先杯凍奶茶想改豆漿得唔得架？店員：得，不過加左$3蚊就無得退。👨🏻：咁豆漿係唔駛加錢？店員：你改豆漿都會照收你$3蚊，因為打左單無得改。👨🏻：咁即係本身飲豆漿係唔需要加錢啦？店員：落左單就無得改架喇，你要飲豆漿可以，但係$3蚊無得退。👨🏻係呢個時間仍然想問個明白，咁豆漿唔駛加錢
第一次試新嘢，早上返到太和見到港鐵站有張”細蓉記”既海報，就係因為碗雲吞麵所以我決定去試，點知一坐低，個姐姐話11:30分前無水餃雲吞，咁我都坐低左唯有改叫早餐沙爹牛肉腸仔通粉。係我等緊既時候，隔離個婆婆食完飯，同個店員講，你地沖呢杯都唔係我飲開既阿華田，淡而無味，同水一樣。個店員一於懶理笑笑口話，阿華田係咁架，之後行開左，果時我都不以為意。
到碗粉黎到，我見到啲牛肉咁厚，心諗已經中伏，好在有兩條廚師腸搭救我都算，最多下次唔黎。
係呢個時候，有個男士坐我隔離點左碗沙爹牛肉麵，凍檸茶，唔夠兩分鐘個店員同佢講，暫時無凍檸茶因為無檸檬，飲凍奶茶好唔好？果位男士好無奈但諗左一陣，最終都話是但啦好啦，最精彩既部分，係2分鐘後開始。以下係對話內容：
👨🏻：唔該，頭先杯凍奶茶想改豆漿得唔得架？
店員：得，不過加左$3蚊就無得退。
👨🏻：咁豆漿係唔駛加錢？
店員：你改豆漿都會照收你$3蚊，因為打左單無得改。
👨🏻：咁即係本身飲豆漿係唔需要加錢啦？
店員：落左單就無得改架喇，你要飲豆漿可以，但係$3蚊無得退。
👨🏻係呢個時間仍然想問個明白，咁豆漿唔駛加錢點解唔可以改呢？問題係你地自己本身無檸檬在先。再三追問下，個店員竟然咁講。
店員：你改飲豆漿都係收你$3蚊，因為豆漿都係凍既，凍飲就加$3蚊。
👨🏻：下？咁如果係豆漿都要加$3蚊你頭先就唔會同我講無得退返$3蚊俾我啦。
店員：係呀，所有凍飲加$3蚊，豆漿都要加，無得改。
店員：宜家奶茶沖好左喇，無得改喇，但如果你係要飲豆漿我換俾你，但係無得退$3蚊，你仲改唔改？
👨🏻：即係飲豆漿唔駛加錢啦
店員：所有凍飲都要加$3蚊！
呢個時候部長放低左碗麵，講左一句”唔係，唔係所有凍飲加$3蚊，豆漿係唔駛加錢既”
我聽完之後，忍唔住講，拿，明明唔駛加錢你就一直係度亂講一通務求說服果位男士唔改豆漿，咁樣唔得架喎，唔退$3蚊都已經夠離譜，仲要咁呃人。
店員回覆：小姐，你聽我講，我唔係話唔改得飲豆漿，係話張單（紙）打印左出黎無得改。
我：下？你咁都講得出口？由頭到尾你都唔係咁講，宜家係竟然賴張紙打印左出黎改唔到？！電腦改唔改到呀？點樣無得改？
店員：我由頭到尾都係話，張單上面打印左”凍奶茶”三個字，我改唔到。我都唔想再同你講
之後就發悔氣走左。
係呢個時候我都去賣單，我話你地咁樣係呃人，唔可以咁樣做生意，就算入左單既野都可以改。收銀果位話，無話唔同佢改呀，只係杯凍奶茶沖左出黎唔好嘥野。
我聽完之後，發現唔應該再同佢地講落去，因為成間舖既人既想法同態度都有問題，佢地係打工唔係幫老細搵錢，所以再講落去有些少侮辱我既智慧。
我賣單走人，然後上網查到佢地係屬於一間”昇悅”集團旗下既餐廳，我已經發左留言要求寫字樓既人同我聯絡同跟進，但暫時都無人回覆，有新消息會再留言匯報。
沙爹牛肉通粉
$35
27 瀏覽
0 讚好
0 留言
張貼
