茶餐廳2.0 (已結業)

收工同朋友去左荃灣行IKEA 諗住買D 家品，行完之後佢話想食茶記，諗起隔離愉景新城有間茶餐廳2.0 ，所以就行左過去食。仲記得之前呢度嘅晚市好旺埸，但而家真係差左好多。呢度嘅食物款式依然好多，今次就食中式嘅小菜，小菜我地叫左3個，分別係西蘭花炒帶子、一品八珍豆腐煲同蝦干土魷蒸肉餅，再加一個炒油麥菜，價錢加埋都係$300 左右，相當超值。西蘭花炒帶子帶子幾大隻，不過可惜唔太夠味，西蘭花就炒得唔錯，幾有酒樓嘅味道。一品八珍豆腐煲熱辣辣，入面仲有唔少海鮮，成個煲都好入味，冬天勁正。蝦干土魷蒸肉餅用黎送飯一流，肉餅蒸得岩岩好，咬起來鮮嫩多汁非常有口感。清炒油麥菜份量都唔少，炒得好 翠 綠得黎又入味。跟餐送嘅中湯係合掌瓜湯。黑糖仙草鮮奶同黑糖鮮奶黑糖味幾重，維持一貫水準。