燒肉臻 (已結業)

最近成日都同啲朋友會約埋一齊飲酒，有一次突然間有人提議嚟尖沙咀呢間餐廳，因為有90分鐘清酒任飲，佢有好多唔同款嘅清酒，全部喺機入邊自助式咁樣撳嚟飲，唔同嘅清酒都可以試吓，幾特別，所以我哋特登約埋一日嚟食飯加飲酒，雖然話清酒任飲，但係啲嘢食嘅質素其實都唔錯！番茄蒜子沙律個擺盤已經好特別，好似掌上明珠咁樣，番茄鮮甜，加埋蒜子溶有衝擊味蕾嘅效果。甲羅燒同酒盜芝士兩個都係沾梳打餅食，一路飲酒一路食呢個其實好配！其中一個必點嘅item我覺得一定係南非鮑魚，同一定要點個柚子胡椒，見到師傅好俾心機燒，燒完熱辣辣食，完全冇鞋！鹿兒島a4和牛盛盒包括三角胸小排，肉眼蓋同背峰，全部都好肥美，入口即溶！不過我最鍾意嘅都係美國牛舌，因為佢超厚切！伊比利亞豬肋條同夾心肉兩個都唔錯！呢度嘅好處就係佢都有好多海鮮選擇，今次我哋就要咗白鱔同赤魷魚筒，兩者都係師傅幫我哋燒嘅，見到用咗好多心機去燒，白鱔個酸汁十分之出色，趁熱食嘅時候啲骨仲係軟嘅，可以大啖大啖咁食，外面脆卜卜，好正！