MAMTOM

餐廳位於尖東海旁，主打東南亞菜，食物款色多元化，價格合理，份量亦唔算少。整體裝潢獨特，帶異國風情，以木系為主，天花掛滿波波燈，播住輕快嘅英文歌，設有室外同室內位置，環境好Chill，店員服務態度有禮，出面好少有，絕對適合約朋友仔嚟放鬆一吓。前菜有脆皮炸青木瓜沙律羅望子釉，炸至金黃色，酥脆可口，唔油膩但感覺好邪惡，下面搭配大量薄荷葉等菜品食落更清新。芥蘭苗細細一碟，新鮮無渣，帶香氣，可以一試。主食有冬陰功紅鯛，原條上，賣相吸精，魚肉嫩滑多汁，啖啖肉，飲埋個湯都幾暖胃。另有凍米線，七彩顏色呈現，集合羊肉、豆芽、黃瓜、醃製青木瓜同胡蘿蔔、炸蔥頭、花生、蔥油、南方魚露，將全部嘢Mix埋一齊，層次感豐富，醬汁帶酸甜好開胃。甜點方面大推炸香蕉配椰子雪糕，香蕉即叫即炸，好甜好好味，搭配椰子雪糕神奇地Match。