Cali-Mex Bar & Grill (愉景北商場) (已結業)

冇乜嘢都唔會專登去愉景灣，特別係而家呢個時勢，宜家呢個氣候，真係熱到一個點🥵不過因為好朋友兼前同事結婚，咁又唔同講法喇。好似大鄉里出城咁舟車勞頓，不過整體上又比我想像中快，可能前後一個鐘頭鬆啲已經可以由觀塘去到愉景灣。由屋企轉小巴落觀塘轉地鐵去欣澳再轉Shuttle Bus去到愉景灣。大汗踏細汗，不過又因為天公做美，令到成件事都好靚。不論係個天啦、個景啦 ，最緊要梗係一對主角啦。約咗3:00觀禮之後就等到食晚飯，中間呢個時段除咗周圍行吓睇吓之外，就梗係搵個地方chill下Hea下啦, 難得去到一個背山面海嘅地方, 人煙稀少, 真係好似離開咗香港咁, 喺附近求其搵咗間飲嘢嘅地方. 呢度好有氣氛，好多外籍人士。大家都唔係為左食嘢而係諗住hea 下chill 下。由一開始四個人一路坐下等吓真係越多人，就好似我哋舊公司團聚一樣。每人嗌咗一支唔知咩味嘅手工啤酒🍻大家share嚟試吓，最終我自己一支都飲唔晒已經滿面通紅，酒量真係差🤪氣氛好好，我哋四個人一台，都分開坐左三台，外籍侍應服務好好，我哋不斷要求影相佢都冇托手踭，仲好專業添！