紅館 (擺花街) (已搬遷) 新店位置

今日約咗舊同事食飯。自從離職後，幾個月冇嚟過中環區了。約咗同事喺石板街等，佢帶我去紅館，係新開嘅，之前無嚟過。餐廳入面大部分都係吧檯位，原來下面仲有一層，不過今日已經全部爆滿，所以我哋就坐上層嘅吧檯。午餐都有幾多選擇，今日就試個牛肉三文治啦。午餐包沙律或餐湯，天氣太熱喇，唔想飲啲熱辣辣嘅湯，就揀咗沙律。雖然話係午餐，但沙律嘅份量都唔少，沙律菜好新鮮，上面仲有一啲白色嘅醬，食落口味道有啲似薯蓉，加咗檸檬汁，酸酸地，但係都幾好味。牛肉三文治唔算好大分，伴碟有我最心愛嘅粗身薯條，薯條係要切得粗啲去炸先至夠味道。三文治原來係用法包，入面夾咗啲青瓜同牛肉，青瓜味道酸酸地好醒胃，牛肉係切成幼條狀，方便食用，唔會食得好論盡，真係要讚一讚。粗身薯條可能用牛油煎過，非常非常好味，食完一條又一條，食個唔停口。最後當然叫咗杯凍檸檬茶。雖然話飲得多凍野無益，但夏天唔飲凍嘢，真係受唔住㗎。可惜而家唔再係中環區返工，如果唔係一定會再嚟紅館食過。