P.B.S. Premium Burger & Sandwich (已結業)

係銅鑼灣既大街小巷都有林林總總既美食，平時經常去Hysan或者sogo行街，今日就決定去小巷覓食！由地鐵站F出口行出黎，大約5分鐘就見到呢間專門食burger既小店。一入到去見到餐廳既佈置好精緻，牆上有手繪餐牌，旁邊有好多burger形狀既公仔或攬枕，連每張枱都有burger既擺設！我同朋友叫左經典手工和牛漢堡同埋激辣火山和牛漢堡，其中一個轉set，有薯條同汽水。一見佢地既賣相就覺得好靚，配料好多，而且一睇就見到塊和牛好大好厚🥰一咬落去好juicy，啲汁好似爆出黎咁！最深刻係塊和牛，牛肉味好突出，而且食得出係新鮮既牛肉。其他配料有芝士、蕃茄、生菜、煙肉、酸瓜等等。咬落好有層次，其他配料唔會蓋住和牛既味道，真係數一數二好高質既burger!激辣火山和牛漢堡唔算太辣，加左辣醬好惹味，入面既配料同樣好豐富，有辣肉腸、辣椒、車打芝士，最底仲有菠蘿！菠蘿好清甜，令成個漢堡唔會太過膩，同辣醬配合得剛剛好。仲要推薦埋薯條！即炸既薯條好香好脆，上面放左香草襯托出薯條既香味。薯條跟餐只需加$10，而且薯條份量好多！真係超抵食。