影片
更多
2014-08-09
2326 瀏覽
幾個月前先曾經到嚟Naked Gurume Gyarari出席試食活動，印象不俗，西日混和菜，日本食材配合西式煮法，西式食材添加日本味道，當晚嘅味道仍有種歷歷在目嘅感覺。這晚，適逢老友轉咗新工，晌上環嗰邊返工，就相約晌度食番餐當道賀，跟老友食飯喺一件開心事，邊談邊食，先祝願老友新工工作順利，前途更上一層樓。餐廳位於伊利近街嘅樓上鋪，門口亦開得唔算顯眼，不過，樓梯、走廊一巷黑與白，既隱敝，又神秘，份外型格。伊利近街一帶都喺啲舊式樓宇，但一踏入餐廳，又喺另一番景象。容許小弟偷懶，套用上次嘅食評講講環境，入門口有個迷你酒吧，唔食飯晌度輕鬆飲嘢都唔錯，轉而進入用餐區，環境以深啡襯黑，配以不同聚焦點射燈，牆邊嘅日式楓葉壁畫，冷酷得嚟有份破格感，而且，枱櫈嘅編排全無壓迫感，空間感大，令人覺得悠閒舒服；餐廳盡頭位置喺開放式廚房，可一賭廚師做菜嘅風采。本來有幾款菜式喺上次試過，想介紹俾朋友，不過，原來啱啱出咗新季度嘅廚師推介，當然想試新嘢啦。Heriloom Tomato (Palette Cleanser) $148跟餐牌嘅食材有少少出入，細問之下，原來除主角英國血茄之外，其他嘢都可能有啲變動，但大
餐廳位於伊利近街嘅樓上鋪，門口亦開得唔算顯眼，不過，樓梯、走廊一巷黑與白，既隱敝，又神秘，份外型格。
伊利近街一帶都喺啲舊式樓宇，但一踏入餐廳，又喺另一番景象。容許小弟偷懶，套用上次嘅食評講講環境，入門口有個迷你酒吧，唔食飯晌度輕鬆飲嘢都唔錯，轉而進入用餐區，環境以深啡襯黑，配以不同聚焦點射燈，牆邊嘅日式楓葉壁畫，冷酷得嚟有份破格感，而且，枱櫈嘅編排全無壓迫感，空間感大，令人覺得悠閒舒服；餐廳盡頭位置喺開放式廚房，可一賭廚師做菜嘅風采。
本來有幾款菜式喺上次試過，想介紹俾朋友，不過，原來啱啱出咗新季度嘅廚師推介，當然想試新嘢啦。
Heriloom Tomato (Palette Cleanser) $148跟餐牌嘅食材有少少出入，細問之下，原來除主角英國血茄之外，其他嘢都可能有啲變動，但大前提都喺會選用由附近街市所買到嘅新鮮食材。英國血茄雖然色澤瘀黑，但味道清甜；此外，仲有蕃茄、蓮霧，清爽多汁；沖繩海葡萄之前已經食過，口感有趣，底下灑滿炸紫蕃薯碎，配以自家調製嘅沙律醬，好睇好食。
Shuck & Baked (2 pcs Baked Oysters) $138焗蠔，據個店長講喺以白酒做汁，不過白酒香味唔喺好強，但蠔面嘅自家製雞蛋汁及巴馬臣芝士，令隻蠔更芳香，飽滿多汁嘅生蠔變成半生熟，仍帶幾分鮮味，唯一要挑剔喺個「蛋黃白酒汁」有少少鹹。
Butteryaki Clams $158西式嘅白酒煮蜆從新演繹，改用清酒、味醂、昆布、蔥、蒜片所做嘅湯（唔喺樣樣材料都食得出，只喺餐牌有寫到明啫），味道頗香濃，帶點酒香，幾唔錯；而蜆隻據侍應介紹又喺每日街市新鮮入貨，肉厚鮮甜，又去晒沙，值得推介。然後，再以百吉包（法包）蘸湯汁食，令我諗番起晌馬交食葡菜檸檬炒蜆時，最喺又喺同樣食法，麵包蘸湯汁，好味！
Uni con Lardo Crostini (3 pcs) $168依道菜喺店長推薦俾我哋，果然無介紹錯，以百吉包盛住海膽，再鋪一層薄到透明24個月熟成嘅意大利生火腿，加埋黑橄欖及橄欖油魚籽做成裝飾。之前店長介紹時聽落已好吸引，送到上枱賣相非常精緻，入口海膽又綿又香，火腿出奇唔覺佢肥，帶微微煙燻香，最頂頂啲橄欖油魚籽最有趣，利用分子料理方式以橄欖油做成魚籽咁，一咬爆開滿口橄欖油油香。
14 Hours Duck Oil Confit Abalone $168睇個名「14小時油封鮑魚」好似好勁咁，所以點一客試試，不過，原來一客得一隻，感覺實在唔平。若論味道、質素，其實件鮑魚一啲唔差，鮑魚軟腍，少少煙韌，除有鮑魚味，仲帶有薑味及微微酸香，不過，鴨油香倒不太明顯，反而伴碟嘅海珊瑚幾得意，有啲似食海蜇。
Chipotle Mekajiki Belly $168意猶未盡，兼又真喺未夠飽，所以，特意再多叫一款主菜「劍魚腩」。簡簡單單嘅煎劍魚腩，都擺得好有心思。伴菜有紅菜頭、白蘿蔔、車厘茄、鮮露筍及幼滑嘅薯蓉，配以一個少少辣，又有煙肉味嘅忌廉汁，味道挺特別。至於件劍魚腩，煎得表面焦脆，且魚味濃，不過口感挺實似舊肉多啲，唔喺食開一般魚肉嘅嫩滑質感，因為都喺第一次食，所以都唔知劍魚腩本質喺唔喺咁！
Bird’s Nest w/Naked Milk Pudding $128上次個Blueberry Sushi甜品好鬼馬，今次個布甸就正路好多。紫襯白，鮮藍莓、紫蕃薯粉襯托雪白嘅布甸，賣相超一流。而3.6北海道牛乳做嘅布甸，奶香濃到不得了，質感柔軟，甜度又啱啱好，正呀！加埋一大羹印尼燕窩，立時矜貴不少，不過，個人覺得單叫Naked Milk Pudding (Original / Lemongrass) 已足夠，兼且抵食好多，只賣$78！
Naked嘅菜式唔單止菜式不拘一格，仲有好多創意，賣相、味道兼備，不過，大部份菜都喺比較細份量，一小口一小口，要多叫幾碟先夠撐肚皮，所以，相對消費亦頗高。所以，我哋最後都膽粗粗俾咗啲愚見予店長，可唔可以將上述幾款廚師推介菜式，以一人份嘅份量，再加點炒飯或冷麵，拼湊成一個定食，定價晌$350-400左右，應有一定嘅吸引力吧。
張貼
