Puppuccino (已結業)

上網見到海濱又多一間pet friendly餐廳，都多主人帶埋寵物食飯。不過我係為左牛骨髓意粉而黎，！兩個人叫左三樣野，蕃茄水牛芝士大蝦沙律、牛骨髓配烤雞忌廉意粉同埋巨型豬鞍扒。🥗蕃茄水牛芝士大蝦沙律本身想試叫starter，但見餐廳有一排櫃水耕沙律菜，就想試下有咩分別。沙律菜以baby spinach為主，仲有大同細蕃茄，醬汁就係黑醋醬。baby spinach葉嫩，蕃茄都夠甜。可惜無咁鐘意呢款水牛芝士，口感比較實，芝士味都較淡。🍝牛骨髓配烤雞忌廉意粉賣相相當打卡able，有一整條牛骨髓。店員提醒先將牛骨髓刮起撈意粉一齊食。忌廉意粉本身做得出色，忌廉濕潤度同意粉口感都剛好，撈埋烤香左嘅牛骨髓，多左重牛嘅脂香，幾有特色，推薦。🍗巨型豬鞍扒上台先知原來係炸，比較少見咁厚嘅炸豬鞍。切開後，炸衣唔算厚，話豬鞍好嫩就一定呃人，但都算易咬個種。塊豬真係好巨型，好彩伴碟有沙律同紅菜頭莎莎解膩。餐廳最大賣點應該係pet friendly，餐廳有pet menu，唔怕啲狗仔淨係望住主人食。食飯期間見到啲店員都幾熱衷同啲狗仔玩，仲請佢地食凍乾零食，氣氛幾好。