銘陽車仔麵 (已搬遷) 新店位置

星期六訓醒已經到左tea time，諗住平平地食個下午茶，就落樓下食銘陽車仔麵。雖然過咗午餐時間，但店入面都好多人。下午茶時段特別抵食，叫餸都豪d。我叫左油麵腩汁沙嗲醬，餸揀左柱候牛腩、炭燒豬頸肉、招牌餃子、芝士丸，仲另加一個蠔油生菜&一杯凍水蜜桃冰茶。阿哥叫左幼麵，沙嗲醬，加餸炭燒豬頸肉、瑞士雞中翼，另外加碟台式炸豆腐&一杯凍芒果冰茶。兩碗麵份量超大，兩個男仔都食唔哂，而且呢到既沙嗲醬係老闆自己調味，香料咪濃郁，咸中帶甜， 十分惹味。台式炸豆腐即叫即炸嘅，外皮炸到金黃色而且好脆，入面就非常嫩滑，點上一個老闆自家調配既甜甜酸酸既醬，感覺冇咁熱氣。招牌餃子亦都非常特別，佢係湯餃黎，中間用左炒香既冬菇同少少肉末做餡料，比較罕見。炭燒豬頸肉就夠炭香，而且係厚切，夠彈牙。呢個tea美中不足係陽江豬腸碌賣哂，試唔到。豬腸碌係用粉皮包住荳芽、木耳絲，捲成一條，加上芝麻就食得，唔係到到都食到。下次要早d起身落食先得！