Amitie Kitchen (已搬遷) 新店位置

自己近排出去食少左野，冇咩約，難得有朋友話有間樓上西餐廳幾出名，叫我一齊去食下，咁梗係要try try 啦。係觀塘放工去尖沙咀都唔算太遠，7點幾就可以正式開餐啦！🤤叫完野食幾分鐘之後，餐包就已經送上，同出面普通餐包唔同，佢仲有croissant 同我之前係北歐成日用黎配埋隻瑞典芝士蝦醬既餅餅，一啲都唔係交行貨咁簡單。前菜就揀左個法式香草牛油焗田螺，有專門夾住田螺既器具，加埋支小小既叉仔就可以輕鬆整入面啲肉出黎啦，田螺肉熱辣辣夠彈牙唔會霉，香草牛油香味突出，佢仲配搭埋焗薯蓉，大滿足！主菜我就叫左法國雞胸配日式年糕，fusion 菜，本身擔心雞胸會好易嚡，但呢間既雞胸真係完全唔覺得嚡同韌，日式年糕夠煙韌，唔會食到好粉咁，襯返個番茄醬真係酸酸甜甜好開胃呀！原來年糕配雞胸都係好夾喎。我朋友就叫咗個BBQ醬豬仔骨佢呢個配唔係普通嘅薯條，而係番薯條。食落去比普通薯條更加甜口，豬仔骨分量十足，醃得好入味唔會死鹹，夠嫩唔會食落好似煲湯豬肉咁。最後一定要叫甜品作結，我就叫左一個伯爵茶奶凍，朋友之前試完好推介既。 奶凍夠滑之餘，每一啖都有濃濃既伯爵茶香，又唔會太過甜膩，奶味同伯爵茶好夾，令我好想叫多杯。