牛の鍋日本料理

營業中

休息中

嚟到呢間晌荃灣悅來坊嘅餐廳，試咗$228一位嘅日本料理+火鍋+甜品放題，另外仲有比較平嘅火鍋+甜品放題，限時係兩個鐘，唔同時段收費都略有不同。自助火鍋料有生菜、番茄、冬瓜、南瓜、粟米、冬菇等。另有仲有啲比較飽肚嘅烏冬、即食麵等。飲品都係自助嘅，當晚有常見嘅汽水、韓式飲品同道地紙包飲品，酒精類嘅就有jolly shandy等。另外仲有個toppings corner，放滿咗朱古力豆、彩針、迷你棉花糖、朱古力漿等，可以自己幫啲甜品裝飾一下。拎完同叫完嘢食，就起動喇！精選豚肉嘅脂肪同肉嘅比例平均，口感鬆化，日本廣島蠔蠔身算脹卜卜幾鮮味。自助火鍋料嘅火炙芝士丸質素幾高，烏冬就煙煙韌韌咁。刺身有十款左右，我哋試咗三文魚、八爪魚、墨魚同甜蝦，三文魚幾肥美。燒日本番薯仔一啖一口味道幾甜，串燒日本雞軟骨微鹹脆口，串燒菠蘿就又甜又多汁。鹽燒牛舌爽嫩有牛味。最後仲食埋甜品，軟雪糕係用雪糕機唧出嚟嗰種，等侍應拎到嚟之後就可以自己去自助吧加toppings，質感軟滑。楊枝甘露嘅密度比一般糖水舖高，入面仲有西米、鮮芒果粒、柚肉等等，酸酸甜甜都唔錯。