坤記餐室

營業中

休息中

生日去澳門避世幾日，天氣好好之餘仲好舒服咁又食又玩過左幾日，唔捨得番香港。上一次黎澳門想食坤記但冇開，我未食過坤記，但同行陳某自細已經食開坤記，佢讚呢度好正宗而且充滿童年回憶，佢話好食既野多數都真係好好食，今次有開喇終於　食左燒雞，燒豬柳同炸馬介休球：燒雞：上碟時賣相普通，從未食過既我都冇咩反應，見到Ｄ雞好似冇咩色水好淡咁，但一食就知原來好驚喜，有幾舊薯仔伴碟，薯仔好淋而且夠味，但重點係雞肉，好滑好有雞味，食開冰鮮雞既一食就知新鮮雞真係唔洗點整花巧野都已經可以好好食，雞下面既汁先正，唔係味精果隻好味，係雞肉精華果隻好味，今晚單係呢碟雞已經值回票價。燒豬柳：其實我一向都麻麻地鍾意食豬柳，但呢個好食在佢有少少酒味，同埋滑，一Ｄ都唔鞋口!炸馬介休球：呢個做得好外脆內軟，唔會太咸，充滿馬介休香味，食到尾聲已經飽到上心口，飯後飲埋熱情果汽水同前葡啤，今餐好完美。食飯時見到好多一家大細，叔伯兄弟傾住計食飯，可能香港人斯文慣就覺得好嘈好雜又覺得人地serve得唔夠有禮貌，但其實坤記本身就係一間平民餐室，但咁既價錢食到咁正宗既葡菜，仲可以感受下澳門人悠閒生活，算係咁啦