專業咖喱皇 (Closed)

到左敦找吃的, 路經此店, 被門外張貼著的乾咖哩圖片吸引了, 正打算細閱內文, 老闆娘便冒出來了, 塞了張菜單給偶...看看目標價錢ok, 就試試吧~ 畢竟乾咖哩不是到處都有.一屁股坐下來:.偶:"意大利香草蒜蓉乾咖哩牛肉跟薄餅($68), 唔該."老闆娘:"試埋我地d咖啡啦! d奶同出面唔同架! 淨係奶都幾廿蚊一x(一罐?一盒?一x...???...忘了!)架!\"偶:"咁凍啡($13)走糖走奶唔該!"老闆娘:"後生仔, 淨飲唔加奶好傷胃架! 咪怪老人家chom 氣...(下刪近百字)."偶:"(...) 咁加奶丫, 唔該!"老闆娘:"係囉...咪怪老人家chom 氣呀...(下刪近百字)."不一會, 飲品送上. 小啜一口...比坊間茶記略好.數分鐘後, 食物送上..看一看, 分量不算多, 來一塊牛肉...香草味很突出, 混和輕微的蒜味和不算複雜的咖哩味(相對印度咖哩)..很不錯! 牛肉煮得很嫩, 入口鮮美. (只是個人認為羊肉較牛肉是咖哩的更佳拍檔, 因更入味, 肉味亦較配合..下次會試!)結果另上的咖哩汁幾乎沒碰過哩... 吃得飽飽的, 埋單$81. 也算值的.

坐低後自己用紙杯斟開水飲，環境唔算好坐，但光亮整潔。打開餐牌見到咖哩種類大致分為，英國紳士，馬來咖哩，地捫酸辣，印度咖哩同乾咖哩，再配上牛肉，牛脷，雞，羊同蝦等配菜。另外仲有羅宋湯，咖哩周打魚湯，俄羅斯牛肉飯等既菜式。叫左一個乾咖哩炒蝦，Nan餅，英國紳士咖哩配牛脷，馬來咖哩雞，羅宋湯。乾咖哩蝦($130)蝦身仲有好多肉汁而且咬落都好爽口，而咖哩就好重香料味，連蝦殼都充滿咖哩既惹味。英國紳士咖哩用花奶溝咖哩膽，食落好滑而牛脷騷味都幾濃，但咁先唔會比咖哩掩蓋晒味道。而馬來咖哩落左好多椰奶，最適合用黎撈飯而d雞係雪藏貨唔食都罷。羅宋湯唔算特別不過落左好多胡椒，辣辣地幾開胃。呢道老闆娘好有嫲嫲feel，仲幫客人教仔tim，都幾親切。

這間館，如其歸類，不如說是私家菜(homemade)。蘇格蘭Crossover海南島老闆娘加埋退休水手咖喱菜Crossover俄羅斯燴飯，哈哈哈，專業與否不要緊，但特色太令人印象深刻。首試俄羅斯燴牛肉飯，牛肉沉浸在白汁中，表面平平無奇，但放在口內的鮮味，令人精神一振。由酸乳酪做成的白汁，將以往快餐店的粉漿壞印象一掃空，奶油香恰到好處。再吃牛肉，吃後猛點頭，沒有梳打粉，萬歲！此為Do the right thing。而且是用牛柳，滑間仍帶口感充足，有肉的鮮味，好生感動。配飯汁料只是剛夠，事緣太開胃。另點印度皇族乾咖喱雞配薄餅，雞炸得乾身，被香料包圍非常香口，但色深有點焦的感覺，略嫌太碎多骨，還好份量足夠。另上的咖喱亦很惹味，但用來沾薄餅可能會太濃，辣度不會太搶，倒令人想起接近茶餐廳的油咖喱。再添了杯咖啡，如其所說忌廉味充足，咖啡味被搶了，但是好過茶餐廳的貨色也經收貨。順帶一提，餐牌第一頁的套餐，就是俄羅斯燴飯，$52包一個俄羅斯沙律及羅宋湯，單點燴飯已經$48。但小弟一看套餐就沒理，沙律和羅宋湯走寶了......單買羅宋湯$25，好誇張。感覺上，無個菜平$10，會比較平易近人。餐牌的選擇

睇完雜誌介紹咖哩，突然又想食，其實佐敦都有好幾間咖哩館/屋，呢間雜誌都有介紹過，決定入去試下。地方唔係靚，勝在光猛、乾凈，不過最唔好就係有人食煙。有好多款唔同特色的咖哩，但主角都不外乎豬牛羊雞魚等等，先問待應姐姐邊樣咖哩最辣，佢介紹印度皇咖哩。我就決定試下中辣印度皇乾咖哩羊扒，咖哩汁先分開上的，咖哩汁係夠辣，但係缺少了咖哩香味，而羊扒好肥，肥膏多過肉，羊羶味不太重。繼而再叫大辣酸咖哩牛”月利”，其實味道唔酸，反而帶點甜，牛”月利“切得好薄，兩款咖哩汁比較，我o地都應為這隻味道較好。兩款咖哩可跟飯或二塊薄餅，我揀晒薄餅，係由一個印度女仔即場整的，所以時間較耐，但上時係熱到燙手的，點了咖哩汁好美味。另外再點了蒜蓉炒椰菜，出奇地好味，老公飲左個咖哩周打魚湯，完全沒有咖哩味，與一般的周打魚湯有D分別，沒有忌廉味但有好濃的雲呢拿味，湯中仲有幾舊魚塊，其實係雪藏炸魚塊，我仲以為係麵包糠。總括來講都食得過，不過之後都幾口餲。

印尼沙爹咖哩牛利($40)﹕此店的所有咖哩可選大、中、小辣。雖然本人不是好辣的人，但都覺得中辣亦其實很mild。至於加了沙爹的咖哩，味道很濃，而且很開胃，但如果加多些花生粒就更好啦!至於牛利，雖然有些根，但因是薄切，一點也不"un"。而個薄餅(不是油酥餅的那種)清清地，"點"咖哩最適合不過。結帳時，老闆娘問好吃與否，並表示此店的"乾咖哩"（原來其實都有汁，不過分開上）更正，下次可試下。另外，每張檯上都有一壺暖開水和一筒整齊地放在膠袋內的紙杯，讓客人自己任斟，幾好!