專業咖喱皇 (Closed)

叫左乾咖哩牛脷、印度咖哩牛腩、馬來西亞咖哩雞、咖哩海鮮炒飯，一共$220，乾咖哩牛脷、印度咖哩牛腩非常香，好重咖哩味，但香而不辣，馬來西亞咖哩雞味道淡左d，差左小小，咖哩海鮮炒飯香而不辣，又不油膩。

上星期六跟男友再來吃此店的乾咖喱牛，另外因為望到和聞到鄰桌的那碟咖喱好香，便問「老」闆娘是甚麼來的，她說是咖喱飯，任我們配甚麼肉類都行。所以就要了牛肉炒飯。來到時，碟炒飯單看賣相已經知超掂，飯粒分明，還有松子增口感，味道香而不辣，若吃得辣的食家還可以要求加辣；乾咖喱則好似上次一樣咁正斗，是次雖然叫了中辣，但總覺得唔多夠，下次我諗要叫大辣。

係呢間咖哩店睇餐牌個時, 見到有盤菜已經覺得搞笑. 咁老闆娘幫我地發板, 寫左一個10人既盤菜, 4斤咖哩蟹, 同d薄餅加飲野. d野食都還可以. 咁接近食完埋單既時間, 我見老闆係度計緊我地張單, 但係我見佢銀碼又無寫明, 計算機又無用過. 一寫就寫左$2128.唔好癲啦, 食d咁既野收我成2千蚊, 問佢點計, 一時又話d盤菜人頭計, 幫我地擺左18個位就要收18份錢, 每人100, 我地黎齊都係15個人. 一時又話600 一個盤菜, 兩個要收1200蚊, 同我地講10人份量, 你而家收我18個人. 4斤蟹收我地600. d蟹加埋都唔知有無2斤.離晒譜~~~黑店

星期日晚上同細佬妹及其男友一行五人去開飯,由我提議到此食架喱。看看餐牌,有多國架喱選擇呢!經一輪漫長的討論後,叫了4個羅宋湯,乾蒜蓉香草架喱雞(太長了,忘記了原本的名字),英國紳士架喱魚,印度皇族羊腩,地捫酸架喱牛脷...每個餐都跟兩塊rotti。先來羅宋湯。湯料有椰菜紅蘿蔔等,少少酸,二細佬話湯底唔夠杰,味不夠濃。我也覺得清咗啲,$25碗不太值。乾架喱雞用架喱膽煮,無汁的。幾香,不過雞肉嚡口,太乾了,個人不太欣賞。問銀髮婆婆英國紳士架喱是甚麼,她說架喱落較多椰汁煮。食落果然不同,椰汁味香,魚柳又腍又滑,不過就無乜魚味,而且幾細件,如果一人食也會覺得不夠。羊腩是當晚最辣最濃又最好食的。印度架喱香撲鼻,羊腩有肥有瘦,亦有連皮的。煮得入味,羊肉很嫩,連皮的更香。有輕微羶味,但絕對易入口。牛脷酸酸甜甜,厚度適中,少少羶,但食落好腍,十分不俗。妹妹事先前講明唔食,也忍不住試了。Rotti烤後很乾身,比naan厚啲硬啲,比較好咬口,亦較少油香,健康啲。同細佬妹飲飲食食閒話家常,時間過得特別快,食物不算太特出,但心情好食物都會好味啲!埋單$302,都算抵食。今餐當然係我請啦!

同事帶我地黎呢度食, 好慘, 冇book 位, 我地又多人, 舖頭又細, 又坐左一大班人, 結果我地個個要面壁, 下次去一定要book 定位先.呢度有好多款咖哩, 配菜都係豬,牛,羊,海鮮等等... 同事同老闆娘發板, 呀, 好食喎, d 肉好焾呀, rotti 好特別, 同其他舖頭o個d 唔同味, 又厚dd. 樣樣都好食, 咖哩好多料, good ar. 下次試下其他先.

選擇蠻多呢!可惜只有我一個人唯有先試一試食家推介的咖哩羊腩^^*O* 好香啊~羊腩炆得又腍又入味，皮爽又冇羶味再加埋用充滿麥味的Rotti(flat bread)點咖哩汁食(((((正呀!!!)))))這店子雖小，但亦算乾淨企理再加上食物質素咁好，一於食完再食!p.s.鄰檯吃的那個吉列豬扒，真的看得我口水都流埋

坐下來時，看見有成10種不同國家的咖喱，真的嚇了一跳，原本是打算叫印度和英國紳士咖喱的，但在那位表面看來很兇但其實很好人的老婆婆推波助瀾下，終於也叫了一客乾印度干咖喱牛來試。 來到時，真的很不慣，因為好乾，有個老伯突然走出來教我點食︰就是將牛夾在烤餅中間，蘸少許咖喱汁(會有個碗仔另上)來吃，我依足方法，食落才發覺誰好香咖喱味(但辣度不足)，而且越吃越正，確實冇介紹錯，下次我一定會來試地捫乾咖喱。

終於試了。之前一直都只吃燴飯，之前又對吉列豬扒沒有好感。見此店廚藝出色，就一試。結果......極讚！我未曾吃過一塊吉列豬扒不單肉味甜鮮，還有濃濃的蛋味。炸漿是靈魂，在這裏終於找到了。我以前極喜愛大埔的世記炸豬扒，或者蘭芳園的豬扒包，心想全港恐怕沒有更好的了，估不到這裏的吉列可以互相輝映。例牌講句，套餐較好，有湯有沙律。

第二次再食, 又值得第二次再評! 因為今次依舊好食之餘, 仲俾我發現d新野~甲姐姐一而再介紹乾咖哩蝦, $130, 見到後面個男人食得津津有味, 跟佢叫左一個跟rotti。嘩! 真係驚喜! 蝦肉彈牙爽口唔霉, 蝦鮮亦冇被咖哩蓋過, 蝦又肥又大(佢話難得見咁大隻, 所以推), 配上炒成一舊舊的乾咖哩, 真係人生一享受! $130係值得! 不過有個好怪的現象, 係全蝦有6隻, 但係無啦啦多左2個散蝦頭, 不過梗welcome! 此物乃蝦的精華!意大利芝士咖哩牛柳為翻啅之選。甲姐姐suggest我跟rotti, 可惜我堅持飯為咖哩至佳拍檔! 就因這一點堅持令我帶住個爆胃走。呢個汁真係十分正! 叫姐姐加汁佢都好welcome~ 牛柳呢, 唔話得, 真係必叫! 朋友都評此牛柳比很多自稱扒房的牛柳好味(我冇expect咖哩屋會煮medium的牛柳)! 佢個女洗手間要鑰匙開門的。感覺極衛生。我食到成手油時, 老闆娘主動趕我入去洗手添! 真親切!聽隔離幾個男仔叫餐, 餐湯執著地要羅宋湯拒周打魚湯! 而老闆娘亦執著地因賣曬再煲果d未夠火爐而唔賣, 就因為這一點點性格, 使其出品永遠保持上品!

2個人去食午餐,叫2個咖哩~($40-45)1.酸甜咖哩牛脷(上):咖哩味幾特別2.意大利芝士咖哩魚(下):幾香幾好味,夠熱D薄餅普普通通啦,同埋個老闆娘仲教我地食咖哩一定要飲忌廉喎~唉~食到唔知飽~好飽啊^^

首先，只有梳打之王先用亞根廷牛，因為佢來貨夠平，梳打一拿就搞掂。所以，都唔知仲為咩咁大聲話比人知佢用呢種牛。 原來，呢個世界真係有人可以用豆腐渣整出燒鵝來… 羅宋湯…雖然我識親的俄羅C人都話唔知咩叫羅宋湯，不過唔緊要，無落茄膏可以都煮到呢種味道的，你話佢係粟米羹我都無問題。 神秘薄餅整到彈牙，係彈牙，老夫子的耐人尋味一樣。 又點唔到汁又脹肚，早知叫多個送好過。 Homo coffee夠香夠醇夠滑，要一人一杯先得。

好朋友大力推介, o係冇錢又想吹吹水的情況下, 去左呢度食。因為佢食過好多款的關係, 叫左意大利芝士咖哩牛柳同英國紳士咖哩雞。跟rotti同飯。2個基本上個樣都幾似, 而食味就有少少唔同。中辣而言, 英國果個辣d, 但2個都可以接受。但係論口味, 意大利就稍勝。2個肉而言, 又以牛出色過雞。牛柳好腍得來有肉味, 十分之好! 雞都not bad, 好雞好彈牙!個人而言呢, 咖哩就一定係配白飯! 不過rotti 味道都not bad~ 但係加左咖哩汁後我encore左碟飯囉…抵!

五一勞動節再次要返公司收拾行裝，之後中午要去聚會，到了佐敦打完機後仍有時間，在這裡食個餐，咁見到BCD仍度，好自然坐埋一齊，我自己選擇左酸咖喱豬扒飯加Rotti，酸咖喱味道再濃些更勝一籌，豬扒沒有點炸過或煎過，雖不是鬆化，但係口感仍保持到，算是這樣呢!Rotti 是即整，口感不是人人受得到，當然比naan鞋，但為了健康仍然大力推介，四十蚊的價錢可以不妨一試，其他就可以找到其他更便值的食店。識多一點點：第一位做咖喱的人是釋迦牟尼。在印度的傳說中，釋迦牟尼是首先教人如何用香草的果實來做長生不老的靈丹，後人將此靈丹當成料理的調味料而廣泛地傳播開來，并以釋迦牟尼當初傳教的地名“咖喱”命名。另一說法是咖喱源自南印度的泰米爾族，是「醬」的意思，即是集合各種辛辣香料所制作的調味料。而英文中的「Curry」，則是由咖喱粉的主要成分Kari Phuli 演變而成。由於大部分印度人只吃羊肉，但羊肉的羶味未必人人可以接受，所以當地人便以咖喱香料來辟除羶味，一般再伴飯或麵包食。

之前看到KC說這裡的羊腩很好味.今日便和辣椒女及一朋友來試食.我們叫了一個特種印度皇族咖喱羊腩- 味道有少少辣,都幾開胃,可惜羊肉比較韌,但就完全唔羶.(還是惠記的好味d)特種馬來西亞咖喱雞肉- 味道都幾好,送麥餅都ok,但雞肉就完全唔得,又無味又韌.特種馬來西亞咖喱豬肉- 和雞肉一樣,又無味又韌.麥餅比平時食開的厚,口感都唔錯,但我還是喜歡普通的薄餅多d.

沒有心情，不想應酬，全個星期的午飯時間表一掃而光，幾日都可以自己周圍食，今日就來吃咖哩。還記得上次專誠來佐敦試吃某食肆，就搞到一肚氣。下午十二時多，人客不多。這裡裝修幾簡單，有電視睇，而檯上有水壺可以隨時自助斟水。真係有幾多款不同地方的咖哩可以選擇，還有俄羅斯菜，及豉油雞都有，真正多樣化。第一次吃，還是叫基本的印度咖哩好了，而就選了羊腩，普通米飯或薄餅，當然選了後者。羊腩上檯先，印度咖哩是油底，賣相幾對辦。羊腩唔簡單，有連骨的，有連皮及肥膏的，有淨肉的，幾掂喎。先吃舊連皮帶膏的，皮爽口，羊膏亦甘香無比，加上咖哩香亦有層次，好掂，二話不說再吃多舊！再吃淨肉的，炆得軟腍又入味，亦有水準；咖哩本身不太辣，不過問過店員，已經算是辣的了，內裡香料夠多，同羊腩很是配合；吃著吃著，烤餅才到，羊腩已差不多吃完，剩下不少的咖哩汁，正好用來醮餅。這裡的烤餅不是naan，而是rotti，是用麥整成的。口感沒有naan那麼鬆軟，但就較有麥香。這裡有位印度女士在整roti，所以來耐一點，亦熱辣辣好味道，用來點咖哩汁，是吃個一滴不剩，真正的till the last drop。還有忌廉咖啡，也來一杯凍的。幾香又滑