尚小館 (Moved) New Location

舖頭在公司附近開了一段時間, 第一次幫襯, 感受都唔錯。3個人叫了3款做午餐.1) 回鍋肉 + 菜飯 +豆漿 $40 (做到香辣, 惹味, 肉有肥膏及瘦肉, 咬落口感相當之好)2) 上海炒粗 + 豆漿 $34 (少少甜既口感)3) 京葸炒牛肉 + 菜飯 + 豆漿 $40 (京葸好香, 牛肉一般)下次要試下食雞先得.... 價錢唔貴, 好抵食, 味道亦好味.如食客對招呼/服務/裝修有要求的話, 可能不太合適。呢度街坊小店, 地方淺窄及座位很少. 午飯時好多人等位。

呢區上海菜不多，尚小館這間小店算是滄海遺珠。午飯時間，好多學生幫襯。因為價錢平。仲要幾好味。望望餐牌，客飯餐只是三十餘至四十餘。可以揀菜飯或白飯。另外亦可揀粉麵，目測最多人叫的是菜飯。口水雞菜飯餐($40）似模似樣，雞有四份一隻，菜飯大大碗，仲配嘢飲作為响中環打工多年既人看到這樣的性價比高的廉宜飯堂，真係感動到想喊！你話味道係咪驚人地好？當然不是。不過雞肉都算滑，肥油少。醬汁有花椒香味，惟層次感少咗啲。相對之下，醉雞較好吃，因為雞吸酒味，較入味。菜飯用的目測是小棠菜，仍然青綠，入口清爽，味道不錯。後話長沙灣深水埗一帶好多小店，近期逐一發掘 ，屢有驚喜，呢間價錢有驚喜。服務方面，阿姐比較惡，同埋好鍾意食食下叫你起身調位。介意服務的話，要留意一下了。

今日年初二，屋企唔想煮飯，就我去咗我哋平時成日去嘅尚小館。呢間小館嘅路線係平民住家上海菜，便宜嘅價錢，清清淡淡嘅菜式，啱晒媽媽嘅口味。今日叫嘅係鎮江骨($38)，上海炒年糕($42)，紅燒獅子頭($42)同埋蔥爆牛肉($48)，加叫兩客菜飯同豆漿($15)。另外，新春期間每樣小菜係加$5，但仍然係免加一嘅，埋單盛惠4個人＄220。鎮江骨係我哋嘅至愛。酸酸嘅鎮江醋喺未上枱之前已經聞到。上菜嘅時候夠熱，啲肉煮到好淋又夠入味，酸酸甜甜好醒胃，有入口即溶嘅感覺，有適量嘅肥肉。雖然係咁，似乎未煮成鎮江骨之前已經出過油，所以成個餸唔會太肥膩。用墊底嘅生菜係新鮮灼熟嘅，新鮮爽口。上海炒年糕比較失色，稍欠鑊氣。年糕唔夠入味，芡汁亦都唔夠鹹。菜炒得太過耐，睇落唔再脹卜卜。紅燒獅子頭有驚喜。切開發覺原來裏面有一隻滷水蛋(唔怪得佢咁大舊)，雖然係一反傳統，但係個滷水蛋熟得啱啱好，而且成隻都非常入味。講返獅子頭，肥肉同豬肉嘅份量夠均勻，食落軟熟而且豬肉食豬有豬味。炸過嘅獅子頭唔焦，火候預得啱啱好。平時我屋企住家製獅子頭會落埋馬蹄，不過呢度就冇，稍欠口感，不過獅子頭呢啲始終唔同人唔同做法。至於蔥爆牛肉，味道夠香

放假遲起床，已到了下午茶時間，便到屋企附近搵食，見這間門外的下午茶菜單吸引，價錢便宜，即入去吃個下午茶 / Brunch😅菜單選擇滿多。最後點了套餐A: 口水雞 + 上海麵 + 豆漿。🍗口水雞，即叫即切，皮滑肉嫩帶鮮，原以為是四川的酸辣口味，原來是上海的鹹辣風味，加特製的麻辣醬及豆豉，辣度溫順易入口，辣中帶麻，香口惹味!😍🍜上海湯麵，即叫即煮，麵條粗幼適中，質感柔韌，口感爽滑，湯底清香醇鮮，佐以口水雞同吃更滋味!🥛豆漿，冰涼止渴，富豆香及微微的甜味，甜而不膩，健康味美~這店的花雕醉雞及口水雞皆分量十足，香口惹味，吃得齒頰留香，有空再來平歎下午茶 ~🍽

上兩個星期中午試下呢間尚小館。呢到環境麻麻, 一坐落去張櫈先發個天花板滴水我坐左近門口嘅位, 到門一開一合, keep住一路食都覺得好熱。之後唔知係唔係太多人, 落左單好耐, 旁邊遲過自己點菜嘅人都上哂菜, 都未輪到我超級肚餓咁等左起碼20分鐘。就上左呢個醉雞脾米線。個米線好唔合格, 個芯硬硬地咁, 好明顯係未煮夠時間就上。至於個醉雞脾, 雞脾肉身幾嫩滑。可惜佢個醉雞啲酒醃得唔夠入味, 有少少浪費左隻咁嫩滑嘅雞脾。不過就呢個價錢黎講, 呢隻醉雞脾都係值得一食

開了個半月的尚小館，店舖小小，裝修簡潔，而客人一直絡繹不絕。 今天被門外的醉雞相片吸引，並發現菜單附隨優惠券 "外賣自取可以$50購買半隻醉雞"，於是買半隻回家作晚餐。醉雞 (半隻)，份量十足，淋上花雕酒，冰涼的雞皮更見爽滑，皮下有薄薄一層的啫喱狀肥膏，滋味十足! 雞骨佔整體比例少，啖啖雞肉，肥美嫩滑，清涼透心，盡收花雕酒的回甘味，酒香四溢，酒味留有餘韻，令人回味~此外，花雕酒是另上的，不用顧慮發泡膠盒傾斜而倒瀉汁，十分貼心。天氣炎熱，吃醉雞令人涼透心，又沒有過份的油膩感，確是我最喜歡的以酒入饌的菜式!