旺記海鮮飯店

Open Now

Now Closed

2024年06月05日(三)姐姐約食飯佢要去大排檔霸王雞$128豉汁蒸鱔$128啫啫粉絲蝦煲$128呢間嘢冇下次，一次都嫌多服務差：叫人攞水、落單，要三催四請，落單講食乜嘢，游魂咁，重複咁講咗四次先至落到單。嗌咗三樣嘢，超過40分鐘，要吹菜，先至係45分鐘見到第一碟餸，霸王雞。上菜三樣嘢都好熱，熱到燙咀，統一嘅問題係油多，好多油，味淡，連食霸王雞嘅薑蓉都沒有什麼味道，全部都Overcooked，霸王雞全熟，一啲滑嫩嘅感覺都沒有，好彩口感唔差肉老晒。豉汁蒸鱔，份量少，同隔籬店舖比少一半，但價錢一樣，過熟，鱔片全部都非常之彈牙，份量少，當中仲要有埋頭顱及尾巴，根本沒有肉。啫啫粉絲蝦煲，非常非常多油，啲蝦已經熟到縮埋一舊，我都唔知係彈牙定係對靭。大排檔環境都唔慌好㗎啦，近公廁，主要係服務、食物質素都完全唔掂，45分鐘先至上第一碟餸，真係好過分，三碟送上齊，超過一個鐘。職員藉口多單，做唔切，目測9成年上男，主要都係睇電視賭馬、飲啤酒及玩骰盅，叫碟小炒王喺度享受時光，唔怪得知隔離大排檔咁多人幫襯，適逢今日旁邊的大排檔放假先至被迫第一次光顧旺記，隔離新華記超級多人幫襯，上菜速度都係正常，絕對唔會比

經過開元朗想去搵間小菜食，無意中發現依間旺記大排檔，憑着試吓既心態，意外發現每樣菜式很滿意，炸物即炸外脆內軟，小炒也很入味，水準不錯，老板娘也很好客，請了我們喝啤酒，還熱情推介元朗好去處，讓我渡過了愉快的晚上，現在有優惠，我點了魚皮嘗試一下，味道酸酸辣辣很開胃，性價比高

🎈 旺記海鮮飯店 (元朗)地址：元朗建業街熟食亭4-10號舖💡椒鹽白飯魚四季豆白飯魚鬆脆💡粟米斑塊送飯一流，咬落去魚柳，仲有少少脆💡大扇走地雞雞有雞味，肉質煙韌有咬口，新鮮雞感覺💡辣酒煮花螺夠麻夠辣，花螺夠大粒，小朋友都食到唔停口💡豬紅韭菜大份夾抵食💡豉椒鵝腸鵝腸唔算太肥，但味道足夠💡魚香茄子煲一定要送飯食💡蠔仔菜脯煎蛋蠔仔份量都多，略為油左小小，但好香口💡豉油王炒麵夠乾身，夠鑊氣💡豉椒蒸排骨今次呢款餸有d 失色，因為店員忘記係個鑊拎出黎，所以d 肉有d "鞋口"💡辣到跳舞送酒魚皮夠爽夠脆，超級麻辣，食到流晒口水

爸爸生日飯~ 之前聽過話呢間幾抵食，所以去試下~唔多人，唔駛等位~ 仲可以坐室內~蜜汁牛柳薯仔粒，平時食嘅都係黑椒炒，呢個用左蜜糖，口感都唔錯~爸爸點的羊腩煲，好味~ d羊肉一d都唔"蘇"，附送一籃生菜，個汁好夠味，生菜同枝竹都好入味~京都骨豉椒炒蜆皇牌小炒皇，好惹味~椒鹽九肚魚，好大件，炸得好鬆脆，亦都好惹味而不會太鹹~西蘭花炒鮮魷另一碟爸爸點的餸，白灼鵝腸，好爽口總括黎講，唔錯，份量都唔算細，而且唔會太鹹~

附近其實有好幾間大排檔, 這些不起眼的大排檔已買少見少，今晚突然想吃海鮮所以決定試試，原來有室內的實在太好了。時間尚早人流不算多，待應送上餐牌後還介紹今晚的新鮮海鮮。太耐冇跟相公吃飽飽，一於來個大解放~~~隔離枱點了砵酒焗牛仔骨..好香好香，但我們不想吃牛所以點了滑滑的魚雲，份量一點都不少還有很多蔥在底，味道不錯十分香口。份量真不少, 面頭蓋滿肉片，只是比較油膩。這碟價值$120的蝦實在有點不太抵，但幸好海蝦新鮮蒜溶亦很多，還有些粉絲在底。而味道又不會太鹹，只是比心目中貴了點，下次自己試試整~一看..............很紅很紅，滿是紅色的辣椒油，配料竟然有芹菜和多原粒炸蒜頭，不過這味我覺得似辣油煮東風螺多過似辣酒，一點點酒味也沒有完全不香，只是覺得很油很油。東風螺亦不太新鮮，有點點腥味。其實味道是不錯份量很足夠，服務又很好下次一定會再來。

其實我仲估呢間店上次的食評都係我做.呢個範圍的食店,都係大排檔.環境殘舊.什至呢間店坐裏面都是殘舊有壓迫感.坐出面對住坑渠,有些位在厠所旁.店員服務有效率的,但態度是冷淡.也不用介懷.薑汁芥蘭:薑味較淡口.但菜仍然菜綠,爽口.而且油份少.唯一批評是鍋氣不足.個菜溫度只是微暖.炸大腸是炸到爽口.味道什為香口,中間有不少肥膏什為香口.加上酸的菠蘿很醒胃.都是一個不俗的菜式,檸檬蒸烏頭但出菜時,我只看到蔥,而烏頭味道太乾身.完全無魚油香味.連豉油也淡口.下次出街吃烏頭,也吃一些焗或燒的烏頭,加2個飯20元.埋單220元左右.都合理,下次再來要講時機同緣份.

星期六晚高人去了練功，自己一支公去元朗旺記開餐。見到旺記餐牌上有多款新菜式，其中有款菜是似曾相識喎，就是蜜餞牛柳薯仔粒。咁就叫來試試，看看同愛文生的黑椒牛柳薯仔粒，誰家的好味。試完後結果兩店的都好味道，分別在是愛文生是用黑椒煮，嗜棘的就最好；旺記的是用蜜糖煮，嗜甜蜜的就是最好。當晚除了叫了美味佐酒的蜜餞牛柳薯仔粒，還覺得唔多夠，故叫多碟肉絲炒麵，此麵味道都很好，只是茨汁大多喇。有美食亦當然少不了兩支啤酒呀！一人的飯局可以攪到飲飽食醉。

真係..誤打誤撞行入去.無計劃.事前我都不知道呢間店的歷史..只因臨近過年的日子.四周食店迫爆.剛巧經過呢間大排檔有2個空位,誤打誤撞...就行左入去...環境真係一般...我一路食一路怕有老鼠跑出來...至於服務...第一個出來幫我落單的女店員.好熱情....其餘的...只可說可以接受.也不可要求太多..第一度菜,豆苗....我唔知...係咪在大排檔食飯,有一種期望...每道菜,要熱辣辣..好有鍋氣先滿意...我只嫌不夠熱,而我覺得...豆苗冼得乾淨.無沙.無黃葉.呢道菜好乾身...完全無汁...同油....我都滿意......第二度菜:蒸白鱔反而呢道菜..無可批評,白鱔的肉彈牙..份量不少..至於個汁比較淡...淡得來都可感到個鱔夠味...因為唔鹹,不會令人食完感到口渴第3度菜:滑蛋炒蝦仁呢度菜竟然遲過魚出...個滑蛋,不單止唔滑..仲鞋口...賣相又差..入口感覺亦乾乾的..蛋汁不見了..幸好蝦仁大大隻.一碟數到6至7隻....都好大方...加埋一枝啤酒....價錢228元..........我覺得貴的......不過接受到環境..呢間店都值得回頭的....

Baby同縮水胸靚仔球賽激戰過後，係天意安排下就黎到旺記嘆海鮮餐啦。朋友仔面對我呢個強勁對手，幾乎散晒咁呀。當晚差唔多９點去到，全場爆滿。好彩等左５分鐘就有位。今餐好豐富好滿足：1) 白灼蝦 -　蝦好鮮甜呀！輕輕點下豉油已經好好味啦！朋友仔見我每食完一隻就放一隻係我個碗到，驚餓親Baby呀。好細心！2) 炸bb乳鴿 - 乳鴿好入味呀！朋友仔係咁點淮鹽，我無加任何調味料都覺得好好味呀！3) 薑蔥炒蟹 -　雖然食到隻蟹時已經灘涼左，但都食到隻蟹好鮮甜。謝謝朋友仔幫我拆蟹蚶！朋友仔，蟹蚶肉真係好甜好滑架！4) 辣酒東風螺 -　我唔係好食得辣，呢個東風螺辣得黎都易入口。又係個句，好味道！5) 椒鹽鮮魷 -　嘩！鮮魷好新鮮好爽口！正！　〔朋友仔：有人仲好失禮因為頂唔住熱將已經放入口嘅鮮魷放返落碟到呀！天呀！究竟我同緊咩人食飯呀？我真係命苦．．．〕6) 兩支藍妹 - 上次食飯時你多次提出因為要揸車所以無得飲酒未能盡興，所以今餐一於要補返數。今餐有美食有美酒，簡直盡興到爆呀！認真的無聊的理性的感性的都可交流一番，相信我倆前世必定經常行善積福了！　〔朋友仔：下！！！會唔會係調轉左呀？我覺得我好命苦喎．

平靚正之選,服務又好,D野食完都唔覺好口渴,應該係冇味精,海鮮好新鮮好好味,黃金蝦同豬扒超好食,見到好多人會去食海鮮,不過如果想食超正或大隻D好似要早小小同老板講,因為佢會book定D超新鮮同大大件,聽目隔離枱食客話佢地好鍾意食蟹,成日都會叫老板去入貨時入D超大隻,我果日食個D都好大隻,好鮮甜,好過去西貢食,平好多.

同39寸白朱古力胸完成左埸激烈嘅羽毛球賽，朋友仔帶我食好野。本來無冷氣位坐，謝謝朋友仔的金晴火眼，於是我地可以轉到冷氣位坐。我們要了 - 1) 砵酒焗田雞 - 超正呀！！！田雞肉十分鮮甜，焗嘅程度剛好，唔會熟過頭。以砵酒焗，味道香口。都係朋友仔好野，一坐低就見到有田雞食。 2) 豉油王乳鴿 - 乳鴿好嫩口，不過都係紅燒比較合心水。朋友仔不斷話總之要一隻紅燒，一隻豉油王。好吖！下次你再請客時叫啦！3) 腐乳椒絲通菜 - 食唔出通菜是否新鮮，因為腐乳味已經完全蓋過菜味。略咸。4) 蒜蓉粉絲蒸聖子 - 不俗不俗，但未至於係encore之選。朋友仔服侍我時經常夾走左我喜歡的粉絲...... 5) 兩支Asahi啤酒 - 是夜我飲到一杯半，都話我隱藏實力架啦！朋友仔，萬事小心。但願你事事順利！

日前四個人去元朗旺記食晚飯，叫了五個餸：1.酥炸池魚-----以前這些雜魚仔是給貓食的，所以叫貓魚，現在可以在食肆作為餸菜了。這碟魚仔其實除了池魚外還滲了幾條雜魚，雖然其貌不揚，但都幾食好及炸得很香脆。2.芝士大蝦伊麵-----蝦很大隻，芝士汁醬太多，無放入過焗爐，所以唔夠香味。3.煎蠔餅-----真是似個大餅，都夠乾身香口好味。4.豉油雞-----即叫即用豉油浸，夠晒新鮮。5.黄金南瓜鮮魷-----咸蛋黄鋪滿南瓜及鮮魷，很香脆可口。四個大男人將六支大啤和五個餸，都飲清和食晒，真係大飲大食了，唔三高就奇嗱！

行完大運後，大家極為肚餓，未到6點已來個早食晚餐。是日天氣轉冷，當然要個羊腩煲來暖暖胃，腩汁道味一流，各人也用來撈飯。羊腩啖啖肉，沒有脂肪，如果喜歡半肥瘦的人就未必滿足，只可惜肉質唔夠諗。砵酒局蠔-生蠔肥美又大隻，而且份量不少，一客8隻剛好每人一隻，最惹味是墊底的半生熟洋蔥。生炒骨-這是生炒骨及咕嚕肉的混合體，為兩者皆有。在大排檔食這道菜，基本上絕少失手，這裡做法亦不錯，件件脆口；而甜酸汁的味道似京都骨的醬汁，亦較杰身。避風塘炒蟹-這味菜本來不是大排檔的菜式，但有朋友鐘意，當然水準一定不合辣蟹專門店的，雖然辣味十足，但用花蟹來做，感覺上格格不入的。黃金南瓜魷魚-十分惹味的一碟，每件好平均的沾滿蛋黃。南瓜的口感比魷魚好，南瓜的香甜與蛋黃的鹹香好匹配。金銀蛋豆苗-皮蛋及鹹蛋只是好零碎的，反而肉碎就舖滿碟面，而豆苗需嫩口，可能來貨較貴，份量不算多。原本再點了雞及大鱔煲，可惜漏了單，之後唯有大舉去B仔食個滿足。