義香荳腐食品

Open Now

Now Closed

去完黃珍珍食thai food, 之後就黎食碗豆花。以往食開公和，今日阿媽反而suggest 黎義香(雖之前都食過呢間)。要了碗凍花。雖然氣溫只得10度，但凍ge始終好食。幸好今日凍花不太凍。真係好滑，很有豆味。環境雖然真係唔得，又細又多多人又不太衛生(生煎釀三寶隨便放在rubbish bin上)，但隻眼開隻眼閉啦。

在朋友的極力推薦下,去0左呢度食豆花同黑豆漿~熱豆花超滑!!黑豆漿味道有點怪怪的...是"law"味嗎? @_@"會再去幫襯食豆花! 當佢無咁多人的時候...

返屋企煑餐飯。事先嚟呢度買番個青椒三寶，當做加餸...十蚊一大碟--- 釀青椒、豆腐及茄瓜。大大件，魚肉彈牙，可惜甜豉油入面"師傅"有相當份量....買得煎釀三寶，自然要買多支豆漿返去慢慢嘆...依舊豆香十足，甜度剛好。實際上小弟從來冇响第二度飲過比呢度更豆味濃嘅豆漿(澳門嘅頤德行除外)...

0係街市樂園食完lunch 仲係未夠飽, 第一次摸了0黎呢度, 食了個凍豆花, 飲了個熱豆漿.凍豆花($5.50) 都幾滑, 最緊要係豆味好重, 好食! 雖然唔及南丫島0既阿婆豆腐花滑, 糖水又似乎落得重手0左少少(已經無落黃糖0架喇), 但整體絕對好食過公和!熱豆漿($5.50) 係用碗serve 的, 大鄉里的我初初仲以為係鹹0既tim @_@ 呢個好得, 唔稀, 飲落又係好濃豆味, 質地silky, 唔會太甜, 仲有d "豆皮" (好似雙皮奶0個d "皮"), 口感得意. 味道絕對值5 分, 推介!環境up dup, 衛生情況麻麻, 呢方面唔及公和喇; 招呼相當好, 老闆娘好nice 好好禮貌!會再0黎... 認識呢度都係多得OpenRice, 雖然住了呢區好耐, 但一直都淨係識去公和, 真係失敗!

本想去公和,但諗住公和第二度都有,所以試呢間.叫咗熱豆腐花同青椒三寶.首先熱花片得唔夠薄,(因睇蘇絲黃話豆腐花片得越薄越滑),所以食落都唔係好滑啫,仲有啲黃糖,我從未食過有人係溝沙糖,唔得!到三寳,成碗油不特止,我仲食到臭臭,不得了!食食吓仲有隻小強喺枱面行,雖然細隻,但都食唔落!唔得!你地留意吓佢地點樣清理啲碗碟,睇完一定食唔落!

又係細個時,跟亞媽去買完菜必到的熱點,那時堂食得荳漿和荳花,環境一樣.現在食物多了很多,除了荳漿和荳花,現在我的至愛就多了一個,就是大菜糕,有很多不同味道,價錢又平.還有一些煎炸食品,煎讓豆腐必叫,還有菲菜餅及芋頭餅,各式各樣的撈米紛.三十幾蚊兩個人食倒捧住個肚走~~~

同樣幾十年老字號,同樣幾十年也是賣豆品,公和同義香,風格大不同.談到義香的豆漿,很多人被其入口"膿膿地",如煙灰的味嚇怕,其實義香的豆漿,製作其間用鑊炒過,才帶有這些獨特的"焦"香.記憶所及,土瓜灣上海老店"美華"的豆漿,也是差不多味.不知情者,或會覺得事前個杯盛過煙頭,洗不淨才有此錯覺.但一愛上,便義無反顧地,定時捧場.凍豆花入口沒有甚麼味,但吃多幾口,豆味開始慢慢摻進口腔.一下子不可收拾.煎釀豆腐太悶,不如來個煎韭菜餅.味道更香.這個下午茶,豐盛得可以.

週末自由行,今次目的地係九龍城!一早已經諗定好多野想食,點知今日胃口麻麻,終於行到黎呢度食豆腐花做午餐。下午時間,人客唔太多,坐係最近門口位置,見住靚姐手腳勤快地煎炸食品,睇見都覺得佢本事!!本來想食熱豆花,但時間尚早未有得食,只好改食凍;凍豆花口感當然稍遜,唔算好滑之餘仲有d實,豆香又唔太覺有,勝在唔太甜。蘿蔔糕煎得好香口,五蚊一件夠晒份量!!蘿蔔絲份量比坊間粥店已經算多,起碼唔會一口粉,內裡有d好似係火腿絲,增加咸香味道,以呢個價錢當然收貨!!後來手痕痕,加豉油再加甜醬辣醬,原來仲好食!!有機會試埋三寶先。後加豆漿一杯,一入口就飲到一陣唔算太濃既焦味,質感比較稀,又係勝在唔太甜。除左靚姐多謝前多謝後之外,另外2位阿姐都有禮貌,食野期間聽到佢地閒話家常,愈來愈鐘意呢種有人情味舊店。

豆花，又滑又有豆味，很多食評都寫了。豆花，個人覺得還是這裏最好-- 不能算是最滑的豆花，但它濃烈的豆味勝過一切。離開時手痕買了一磚豆腐-- 這才是全日精華所在；豆腐是剛製好，摸上去還有餘溫。坐車的時候，隱約飄來一陣香味...不得了，是那磚豆腐所飄出來那濃烈的豆味，就像小時候外婆用黃豆自磨豆漿的味道，久久不散。回家打邊爐，放在沒有甚麼調味的清湯內煮，不點任何醬料吃，咬下去，豆腐的鮮味即時湧進口腔-- 這種豆腐現在甚少出現了，值得一試。

食完金寶，換嚟一肚子氣...唔飽。決定食碗豆腐花加煎釀三寶補番數...豆花水準唔算特別好。雖夠豆香，但唔夠滑確實係致命傷，但比起什麼公和已係上上之選...究竟幾時响香港可以揾到有澳門頤德行嘅水準嘅豆花呢? 唉...>.<煎釀三寶由金毛老闆娘即叫即煎，十蚊碟卻有六大件，抵到痺。茄子煎到個邊微脆，滑嘟嘟；青椒亦夠味；最最精彩係豆腐，從來未試過有咁香豆味嘅煎釀豆腐。豆腐漲卜卜，夠滑之餘豆香滿溢，配合充滿魚味嘅鯪魚膠，無以尚之...真係乜仇都報晒嘞...

因某些原因，每年都會來一次。久別重逢，乍然發現店內多了很多垃雜野賣：以前，只有荳品、涼粉、大菜糕、煎釀三寶加煎韮菜粿賣；現在？又粉又麵，又撈碗仔翅，煎三寶完又炸三寶，炸完三寶又...再加上中英日韓的食評如雨後春筍般出現在牆上，睇見都覺頭暈。靚姐依舊不修編幅，依舊一腳踢，依舊靠腦記單，依舊靠腦計數。人多左，野食多左，依然故我，速度不變；靚姐，你好野。食既，依然係合埋眼都係咁叫既黑豆漿溝涼粉：黑豆漿依然有那股我介定為「似燶味」既黑豆味，涼粉依然細粒，依然企身- 始終是咱家用涼草粉開的。鍾意靚姐還鍾意靚姐，鍾意食物還鍾意食物；變o左，就係變o左。

豆腐係我最愛的食物..又點會唔去義香試下呢..豆腐花我自問食不少..再偏僻既都專程試過..但義香真係我食過最靚既豆腐花..豆腐花要滑..大把食店都做得到..太子群記豆腐花都滑到飛起..但豆味唔夠..義香就真係做到又滑又香..真係唔易架..果然係我食過最好既荳品店..豆腐狂熱既我點知只食豆腐花..要多個煎魚肉豆腐..好味..但唔係最好..豆腐煎左後唔夠滑..反而太實..但豆味好夠..魚肉又好香好好味..所整體都好好味..豆漿都好好味..但甜左少少..肯定會再來食...正

跟專兄伉儷及年青食友吃過泰式湯河，順手當然要吃埋最地道的甜品~豆腐花。都說過，不少的舊街市，總有間舊式豆品店在，龍城街市就有這間義香。這類豆品店，照舊是沒有空調，在這大熱天時只靠幾把「轉轉扇」，環境當然一般。這裡沒有饅頭、窩貼，卻多了撈麵，價錢大都便宜。剛才只吃湯粉，現在當然可以再吃，就來煎釀豆腐及浸釀豆卜各一碟。煎釀的豆腐夠份量，煎得表面微脆，鯪魚肉餡彈牙亦有果皮的味道。但豆腐因為太大件，略嫌不夠滑身，不過十蚊四件，當然是很經濟；浸釀豆卜浸了湯汁，味道跟口感都勝一籌，即叫即浸，夠誠意，都食得過。一人一碗凍豆花，凍的當然不及熱的滑溜，但亦豆味十足。專兄那碗還加了涼粉，還吃到久違了的涼粉草味，雖然是淡淡的，也算不錯了。阿姐招呼不錯，如果不落錯單就更好。埋單45蚊，便宜得很，味道又不錯，行過都會再吃。

點解冇人講佢地既韭菜餅既??佢係我以前每次去既必食黎架外皮煎得香口,內餡既韭菜多到就爆出黎咁滯~仲有d未煎既可以for你買返屋企自己煎黎食^^當然佢地既蘿蔔糕都係十分好味啦煎到外脆內軟咁~又有好多蘿蔔絲~唔會成舊粉咁其他仲有粟米餃, 炸素雞, 燒賣等..都好唔錯~以前仲有大菜糕賣架~唔知而家仲有無呢~

前日去飲冰凍豆漿解暑，甜咗啲，沒以咁好飲