鳳城酒家

Open Now

Now Closed

完全同意上面的評論，我去咗好多年算係熟客，經歴相近，收銀位個阿姐態度非常惡劣，有佢講冇你講，貌似經理的女人亦不友善，咀臉好似在告訴你…我呢度係咁架啦，你唔鐘意可以唔嚟，返正我大把客。食物質素… 一日比一日差。呢班友愧對個招牌更愧對酒樓的創辨人。不會推薦親友去

本身訂咗位想試佢哋嘅名菜，點知預訂食物都預訂到一肚氣第一次打電話去 - 就話「聽唔到你講乜」，跟住cut我線；第二次打電話去 - 只係講咗一個菜式，都未講其他要預訂嘅菜式，就已經好勞氣地講「落咗order啦」跟住cut我線；等左兩三粒鐘後第三次打電話去 - 就話師傅未落場，等到4:00再打去；第四次打電話去 - 同佢講話「之前想預留菜式，未講完就收咗線」，跟住我再講返我要留嘅菜式，佢已經好唔耐煩話「落咗order啦」，跟著要同佢鬥大聲講「我仲有其他嘢要留，未講完呀！」先至好返聲氣少少，然後同佢講要留蟹盒，又話「而家無賣」，但最搞笑係前兩日打去時係佢哋介紹蟹盒嘅！一怒之下同佢講「唔食啦！取消啦！」米芝連又如何？老店又如何？咁惡劣嘅態度，不吃也罷，去到食飯都只會係另一個貼錢買難受嘅經驗。食客/準食客做咩要受你哋氣？欠咗你哋咩？

少少失望的米芝蓮必比登推介酒樓~鳳城酒家作為米芝蓮必比登推介酒樓，所以買完蛋卷就過隔離試一試佢先！酒家裝修都有少少歷史痕跡，入面裝修同餐具都比較舊既，今次試左鳳城灌湯餃、燒汁釀茄子、XO 醬蒸鮮魷、鳳城蝦餃皇、上湯炸粉果；灌湯餃唔係平時用湯浸住個種，係有湯汁係入面既；炸粉果都幾特別，不過個皮都比較油；整體幾個點心份量係大件的，但感覺都係蒸到過左龍的，價錢都唔平，所以都有啲失望，可能無試到佢D招牌菜啦～！下次有機會先試啦～🏠店名：鳳城酒家🚘地址：北角渣華道62-68號高發大廈地舖及1樓#北角 #北角美食

長輩生日，指定要嚟呢度食生日飯。貪味道懷舊，嘢食好味，亦都算經濟。一行8人，最開心有大圓枱，老人家一坐低就雞啄唔斷，差啲都唔記得咗要叫嘢食。嚟咗咁多次，始終都最欣賞就係佢個炸子雞，皮脆肉滑，每一次食都好好味，從來都冇失手。另外蝦多士都係好出名，此外佢哋嘅蒸肉餅，大大碟，真係有土魷，已經唔係好多地方有得食，好啱送飯。雖然佢哋喺樓上，但如果有老人家，係地下可以由住宅大廈搭𨋢，不過就要喺廚房嗰邊入返酒樓大堂，但係都起碼唔使老人家行樓梯。服務方面，坦白講都係人手短缺，個個都忙到甩轆，俾咗少少貼士，就自然笑口常開。

—🐷 化皮乳豬🐔 脆皮炸子雞❤️🥛 大良炒鮮奶🐟 蜆芥鯪魚球🥬 椒絲腐乳炒通菜🍚 鳯城炒飯❤️•🍮 蓮蓉西米焗布甸❤️—有外國朋友想吃中菜 就想起要來鳯城一試傳統粵菜風味😊沒有很華麗的裝潢 很地道的StyleOverall都很好吃 炒飯很有鑊氣 飯粒粒分明 炸子雞和西米焗布甸是必叫的 吃光光😋

臨時訂枱也預約到中秋前平日晚飯，雖然枱較小和枱與枱之間很擠迫，但氣氛也可以！我們人數不太多，唯有散叫晚市順德菜單，先來鍋貼大明蝦，即是蝦多士，很鬆脆美味。 蜆芥鯪魚球，鯪魚球味道幾好，不點蜆芥可以，而點少量蜆芥就更好味。紅燒扒豆腐，算清淡素菜款式。椒鹽焗肉排，很惹味。最後叫了順德桂花魚肚，很清新的味道。應該有叫菜和有免費中式糖水綠豆沙送，整體不錯了。

上星期放假心血來潮想去飲茶，第一時間諗起鳳城。一上樓梯一幅立體鳳凰木雕畫，仲有一對大嘅龍鳳木雕像喺大二樓！叫左普利真係水滾茶靚！點心有 ～豬潤燒賣...正！大大塊厚厚嘅豬潤上湯炸粉果...上湯已凍但粉果依然好食！鳳爪....好正！好入味！夠林！多汁！仲有一個點心但唔記得左係咩！以前同媽媽都有黎呢度食晚飯，小菜好特色又大碟，好似炸蟹盒，野雞卷，炒鮮奶，金錢雞，西米布甸...呢啲舊式又用心嘅酒樓已經買少見少！我一得閒就會再黎！

落單點了七樣餸，漏了三張單，最後啲嘢唔夠料，我第一次食到螺片鴨掌，鴨掌係碎上。唔好講其他嘢都冇。一早叫咗乳豬睇住佢成隻豬出嚟，如果唔追佢都唔會話俾我聽冇晒。問題係我已落咗單45分鐘喺呢45分鐘佢出咗幾次乳豬，一路耐心等候。如果你再去鳳城食嘢，應該唔對路就嘈佢哋，如果唔係分分鐘冇得食。結果一餐飯追咗三四次，做節飯食到咁樣。從來冇俾過差評因為過節大把人食，佢根本上唔在意。

明明好多圍吉檯都要我地搭檯，開多檯俾人食係咪咁難？仲話我地呢度係要搭檯㗎，人多就話遮，根本坐唔滿，又無人等檯。已經第二次係咁，見你人少就懶得招呼，講真你個場又唔旺，未至於唔憂做，都咁嘅態度趕客，所以最後都唔幫襯。

今朝早去咗北角鳳城酒家，驚喜地發現唔使排好耐隊，入到去唔算好多人，但係又唔係好冷清，環境幾舒服，適合想靜靜地食嘢嘅人。今次嗌咗北菇雞飯、鮮蝦腸粉同埋燒賣，一個人食就完全係綽綽有餘。鮮蝦腸粉：呢道菜冇乜特別，但蝦嘅處理有啲特別，有啲風味。總括而言，都算不過不失。燒賣：燒賣好飽滿，味道濃郁。但我覺得佢有少少太腍，冇乜咬口。我比較鍾意爽脆啲嘅燒賣，所以今次嘅燒賣未必啱我口味。北菇雞飯：雞肉味道唔錯，雖然肉質有啲鞋，但整體嚟講都係好味。飯粒粒粒分明，質感唔錯。總結嚟講，北角鳳城酒家嘅用餐環境幾舒適，食物質素正常。雖然有啲菜未必完全啱我口味，但整體體驗都係滿意嘅，有機會可再次光顧。

👨🏻‍🍳鳳城酒家 (禮頓道) (銅鑼灣)📍銅鑼灣禮頓道30號地舖 「懷舊酒樓，有它久存之道😌」 星期六想飲茶食點心，男友忽發其想想懷舊一下🤣好多人🙈應該大部分都系老街坊😝服務都幾好的，前台的？老闆娘，和經理都好好服務🙈搭枱太細想換位=🆗對面食客投訴灌湯餃漏哂汁要換=🆗即時處理😝雖然都系漏哂汁🤣上菜速度都🆗 ⚠️🍽️鳳城灌湯餃同平時食既吾同🤣無湯的，同埋系一籠兩隻‼️縮水、漏汁🙈不過加左醋之後，又幾好食，足料，冬菇好香👍🏻 👍🏻🍽️蝦米煎腸粉必食‼️少有煎到咁香口😻外微脆、微焦，入面 👍🏻🍽️蛋王豆沙角新年想食下😝脆皮微硬，入面系軟豆沙角，如果成個軟就好🤤 👍🏻🍽️鳳城蝦餃皇超大隻，每隻各有2粒蝦仁😻 👍🏻🍽️豉汁蒸鳳爪正常🤤 🍽️鳳城雞飽仔無乜特別，正常🙈 🍽️薑蔥蒸爽肚系豬肚黎，正常🙈 #鳳城酒家 #香港飲茶關注組 #香港酒樓關注組

推介依間舊式嘅茶樓，依幾個點心係平時比較少見~🌟特別推薦灌湯餃同蛋黃千層糕🥟平時食嘅灌湯餃係用湯浸住隻餃，但鳳城嘅灌湯餃係用隻餃子包住D湯，個皮仲要唔厚，應該要有好高超嘅技巧先做到🤣🤣 仲有邪惡嘅蛋黃千層糕，超好食，勁多鹹蛋黃蓉！！🥚😍中意食豬潤嘅仲可以試下豬潤燒賣😍😍🌟1️⃣古法灌湯餃🥟🌟2️⃣蛋黃千層糕 🍳3️⃣豬潤燒賣

一班同事共聚，相約食懷舊晚飯乳豬拼盤乳豬脆口、叉燒嫌太瘦！蟹肉冬茸料足👍炒奶拼窩蝦👍懷舊小菜好味👍一啲都唔油膩👍骨香炒班球脆皮炸燒鷄（一只）螺片扣鵝掌香燒伊麵鳳城炒飯精美甜品

今晚約了一衆親友在鳳城團拜，去到鳳城竟然全場滿座，好彩我一早訂了枱。又話現在香港的飲食業好低迷，場面冷清，市民都北上飲食？這裏卻沒有這個情況。一早知道有些功夫菜要預先預訂，但因為未過正月十五，所有預訂菜色都停做，令我非常失望。但蓮蓉西米焗布甸居然還肯做，我當然不會錯過，立刻預訂了。雖然巧手功夫菜吃不到，還可以點其他著名的菜色。我點了炸子雞、鍋貼大明蝦、上湯焗龍蝦、順德魚肚羹、清蒸海中班、鳳城炒飯、竹笙會上素、蒜蓉炒豆苗。雖然客人很多，但上菜速度都很快，餸菜的味道都不錯，連我的契爺都大讚好食。眼見傳菜員忙碌地傳遞餸菜出來，忽然，我旁邊有打爛碗碟的聲音，原來是有一位傳菜員不小心將一碟菜滑倒在地上，碟子也打碎了。當時她非常慌張，不知所措，隨即有位女士過來，對她說：「無事！無事！叫㕑房炒過一碟就得喇。」她一面安慰傳菜員，一面叫另外的職員拿掃把來清理好地面。這麽好的上司，應該都好少有了。這裏還要讚的是雖然高朋滿座，但沒有限時用餐，大家可以慢慢食，慢慢傾偈。鍋貼大明蝦竹笙會上素順德魚肚羹蒜蓉炒豆苗上湯焗龍蝦伊麵底炸子雞清蒸海中班鳳城炒飯蓮蓉西米焗布甸

是日同家人嚟咗呢間茶樓飲下茶，一坐低就叫點心，點心有好多傳統嘢包括灌湯餃，真係灌湯餃因為係成隻餃咁唔係啲湯浸住隻餃果隻，拎一隻上碗然後篤穿佢就會有湯汁從餃子入面流出嚟，幾好食，入面隻蝦好大隻。蝦餃皮薄饀多，蝦大隻爆汁幾爽脆。牛肉又係唔錯幾好食，另外燒賣大大粒肉質好爽脆唔錯。豬爽肚出面食唔到啦呢度竟然有得食仲整得好好食彈牙嘅，唔食就走寶。腸粉又滑又好味，叫咗鮮蝦腸同牛肉腸，豉油有啲麻油味一食就知有調過唔係行貨。每樣都一樣出色，大多數都係手工嘢出面大多數酒樓都冇得食只有呢度有，有時間再嚟。