荃灣豐盛酒家 (Closed)

今次終於說服媽子,不再去稻香團年,但選址更糟,地點在荃灣南豐四樓的"豐盛".我下?福臨門都唔制?你唔使同我慳,你個仔今年出幾個月花紅....)媽唔好喇,遠呀,近近地咪算囉.)典型街坊格,晚市人頭湧湧,看看餐牌,也是一些普羅粵菜.好意頭,叫個發財好市,體面一點,叫隻滋味雞,整條魚?蒸條魚就太過普通,不如要個一班兩味,炆頭腩同炒班片.想食點海鮮?白灼基圍蝦免了,叫半打果皮蒸鮑魚仔吧.炒碟菜也好應該,來個瑤柱扒豆苗.先上碟菜,再上發財好市,肥大的蠔豉夾著豬利,蠔豉味濃但肉質很散.豬利就過淋,但個汁幾惹味,送白飯不錯.大班兩味,頭腩同班片皆很霉.完全不行.蒸鮑魚仔就火喉控制得麻麻,有好幾隻,明顯地肉質過老.吃到尾,仍未見滋味雞的蹤影,只見部長來到說滋味雞已經賣晒!要唔要轉第二樣?)我唔要啦,取消左佢啦.)不盡稱心的團年飯,唯有待開年吃得好一點,以彌補這夜之失.

一行人10個人去到.叫那樣沒那樣食.勉強點完後等足成粒鐘才「漫漫」上菜。份量少質素差,點了的十多個菜只上了七八個,我們一班人呆坐又沒人通知,服務超差,食完成班要再去另一間食過。沒一可取,千萬不要去!!!食到火滾。

我和老公決定一改聖誕食大餐\的傳統，去了這家酒樓吃馳名的龍蝦伊面，來個中西合璧=]。我地叫了芝士焗龍蝦伊面及清蒸大石斑，兩個都很好吃。龍蝦很大隻，芝士味很夠，伊面份量充足。再加上大石斑，真係食到流口水。還有得睇大電視，可惜沒有聲音=P，最後還有好味的糖水，蕃薯糖水，很好味。見到其它人通常來吃火鍋，也很像不錯呢=]

今晚同老婆黎呢度食野因為之前食過幾好味，要再食下哈哈哈，叫左最愛吃既龍蝦伊面~~得得地，幾好味~~~大大隻，幾好肉~~~伊面都幾多~~包夠食仲好好抵食蒸石斑好食，魚新鮮，肉爽中上級~~必點必點同最愛吃最愛，回味=]

朋友話未試過呢間咁就一大班人去食下la~我地十幾個人, 差唔多等左一個鐘個個入哂去先入得去好la~ 叫野食la叫極都唔齊,野食唔多ga la仲要叫左好多野都冇又話星期6,日,9:00 後平d今日又話冇??真係好差.............請我食都唔會再去

(14/10/07)四人下午茶時段光顧。冬菇牛肉飯$4.8,飯ug得實實,牛肉很一pet,要抵食填飽,可以一選。紫米露x2,頗糊狀,但ok多料,亦唔甜,算可以。豉椒斑腩炒河,「炒河」避免不過很油很膩。食食吓,後面那枱對侍應說,「壺茶倒出來有雞皮既?點飲呀,同我換過壺」>x< 舊派酒樓,衛生真係"有限公司"另一邊廂,我地催煎鯪魚餅&煎雙寶還未來,阿姐好好地幫我地睇睇,仲話漏單要你地白等;煎好來到走左,就唔好啦!會覆番我地。後來很快送來。釀青椒,好鮮甜呀!p.s.茶位@$8

今天晚上跟爸媽及姐姐到這兒吃飯, 叫了很多菜, 食物質素極其量只能算是ok 吧了!!!! 食物很多油, 不過出來吃飯這也是難以避免的了!!!! 吃了三百多元, 姐姐請客, 在此說聲多謝姐姐!!!!另外, 題外話, 我們吃完所有食物後, 有位阿姐來執桌, 之後我見到她又傳食物到其他桌, 忽然覺得, 這很不合衛生啊, 因為她的手沾過了其他客人的唾液, 之後又用雙手傳菜給其他客人!!!!! 不過出來吃飯也預左了, 要絕對乾淨, 那乾脆不要外出吃飯好了!!!!!!!!!!!!!!!!

叉燒飯，大大碗，叉燒很新鮮，$9.8 抵BB餃，OK!! no problem =]青衣魚，OK!!燒賣，用鯉魚肉製成，幾好味，但很多骨=]鳳爪排骨很抵吃，大點平日很多人等位，全間酒樓都full 左，很多人在看報紙，他們會在下午才解散，最好在未開門前排隊，咁就一定有位坐=]但有時d staff 做野很緩慢，很多時候，我們舉手她們都看不到=[...但男經理比較好=]

(28/7/07)裝修過,感覺好好多。十一點一落order,被侍應叫,「睇清楚張紙既時間,order係接到十一點,而家你叫我點入單?你地寫呢張啦!」算啦,都係飲餐茶啫。义燒飯、兩碗粥(碎牛鯪魚球粥),粥、料好靚,又唔確喉。香蔥蕃薯餅,又很不錯,很多蕃薯,只是油亦很多。

小女擺滿月3圍訂一間房,$2199一圍菜式但普通,食物品質一般,但招呼態度惡劣非常,傳菜亞姐同樓面吵架,道道菜來到竟變凍,夠膽死第二道就上雞,秩序大亂,埋單6千6百幾,我簽咭齊頭6,700另俾100現金貼士,但該亞姐竟對我講話俾甘少!究竟呢間酒樓點可以立足架~聰明的你仲會唔會幫襯佢?

千祈唔好係度擺酒(以下係真實個案)1) 侍應效率慢, 成9點仲擺緊枱; 唔單止, 態度勁差, 成張chair車埋來, 連對唔住都無聲2) 我果枱係後加的, 連d用具都係後加, d金spoon好似吏前遺物, 青銅色, d bowl又dirty... oh god!3) 擺酒竟然唔夠杯, 拎隻杯去隊新人都無?!4) 食翅無醋... 咁大間酒樓究竟做乜鬼...

我以前曾在這間酒樓(前新光) 飲早茶有幾年時間, 後因受不了個別侍應惡劣玩態度, 一氣之下不再留戀, 過檔別家酒樓光顧. 梗係啦, 新光年代可以老細錢玩; 到豐盛年代係伙計夾份錢出做就知死, 趕走客無興趣返食, 如果有一樣可取都話呀, 例如食物好味, 服務態度誠懇和善, 價錢較平等, 點知無一樣入圍. 生意越做越差, 卒之要重新裝修, 心想裝修後應該新人事新作風, 星期六晚前往吃晚飯, 點知換湯不換藥. 同以前一樣, 作風過時, 叫個樣無個樣; 員工之間無默契, 成晚見伙記走走去, 但唔明效率咁慢, 簡單食餐飯要成兩粒鐘, 第間酒樓個零鐘就食完餐飯. 叫了羅漢齋, 鹽焗雞(呢兩樣鹹到飛起), 魚滑菜薳米線(湯淡而無味, 魚滑腥悶), 食過呢餐無乜興趣再來

開頭，見平平地又想試新野，跟住就揀左哩間了....一上到去，只見到三四台客...先黎湯底，色水正常；再黎食物，出事了...d肥牛唔係鮮紅色..係深色的，仲爛爛地！雞肉仲要有陣怪味....d魚肉由灰色變左深灰色；可想而知d食物係十分之唔新鮮...最正常係d菜同姑類。咁都不突止，一定要講o既；d沙爹陣味好有問題，係一陣好假的沙爹味，食左一陣已經頂唔順換返清湯。下一日，我個肚攪下攪下...仲有作嘔感覺，仲去左幾次厠所。總結黎講d野真係完全唔掂，服務又麻麻，打左咁耐都冇人黎換過水，黎左今次相信亦係最後一次。(最後每人80元左右落樓)

今晚約左2個朋友打邊爐，由於想近近地唔去咁遠，就去左呢間酒樓打邊爐，每人約80蚊，首先，d食物不太新鮮，好多都要選比較好的才放入爐，因為有d爛爛地，不過無咩期望，所以都唔太掃興，直到叫左一碟介蘭，初初見到白色一點點，以為是冰未溶，後來，再看真點，是發泡膠，我們已放了幾條介蘭，即成煲都有發泡膠，我地叫左個經理過離，同佢講左有發泡膠的介蘭，佢無咩反應，講左句，叫第樣菜食囉，咁就走左去，我地驚食左有發泡膠既湯底唔知有咩結果，所以唔敢再食。叫埋單，等完又等，等到頸都長，咁既食物質素同服務態度，唔值得再去。p.s. 有只小小強係台面度露過2面。

(10/9/06)上次食過呢度的炒麵唔錯,今次衰個汁。野菌雞球炒麵,麵依然炒得好,可惜獻汁既咸又油。山水豆腐花,細細碗,唔熱。豉汁炆鳳爪,好好味。涼瓜脆皮湯丸,送來已是凍左,所以內裡的黑芝麻餡,也變得一舊舊,涼瓜味皮,好勉強叫做好似有D苦味o羅......