安安燒 (鯉景大廈) (Closed)

前兩晚揸車經過見到,門面勁光, 今晚就落左黎食喇.一個感覺, 好刺激~辣得好刺激好過癮~頂級墨魚丸, 以為係打邊爐o個d, 點知唔係, 裡面係有一粒粒墨魚肉, 口感好正~燒茄子, 食串燒必食, 但唔係間間燒得好, 呢度唔錯, 而且d蒜蓉好好味.燒栗米, 無乜特別, 栗米一條.年糕燒, 一向好鏜意食呢個, 口感又好, 又香~燒獅子狗, 無乜特別, 普通獅子狗, 好似打邊爐仲好味.燒棉花糖夾餅, 好味wor, 雖然兩樣野都好普通, 但合埋個味道幾match.上野食速度慢左少少, 有d等左成半個鐘先有.希望可以改善.整體味道算ok, 服務都好有禮貌. 

本身食常會面, 但老闆娘話起碼等2個鐘.見到街口有個牌, 話係安安燒,徵詢左大家意見之後, 決定唔等常會面, 改食安安燒.燒南瓜: 好甜, 熱辣辣~麻辣豆腐: 麻辣汁都係咁既味, 但豆腐就好香好滑~燒韮菜: 味都OK, 但老左d, 有d吞唔到....墨魚咀: 味OK, 不過有d韌, 要咬好耐.燒菠蘿: 超甜, 但唔記得去心.燒一口魷魚: 即係類似以前戲院門口o個d, 好香好味, 送酒一流~ 

本身黎附近食雞煲, 點知實在太多人,發現隔離開左安安燒, 於是就改食串燒.之前食過九龍分店, 對我自己黎講覺得太濃味, 呢個風格在此都無改變.不過就多左d海鮮選擇,海鮮相對無咁濃味, 所以都算滿意.燒大蜆, 好鮮美, 好似無落任何醬汁, 但都幾好味.燒肉蟹, 好多肉, 又係無落任何醬汁都已經幾好味.燒蟶子皇, 好大隻, 落左汁同蒜蓉, 無落粉, 所以對我黎講個味剛剛好, 唔錯.自家製涼茶, 比之前九龍店多左呢樣, 好過飲汽水好多, 今日係夏枯草, 正常質素.如果唔計地點, 我會選擇黎呢間, 因為有唔太濃味既海鮮,但當然係旺角會比較方便.

前日返老媽子屋企食飯,行過驚見自己寫過食評既安安燒出現o係筲箕灣.於是今日就落黎試下.真係安安燒既分店, 野食係完全無分別.不過呢度多左d旺角無既野,新鮮限量海鮮.我試左幾樣,特大扇貝: 成隻手掌咁大, 好鮮甜.鮑魚: 落左少少蒜蓉, 帶出佢本身既鮮味, 而且口感好好.龍蝦: 好多肉, 而且d肉質好好. 就咁汁燒已經好好味.特大蟶子王: 成把間尺咁大, 燒得唔錯, 唔會好韌.其他野食就同旺角一樣, 無乜特別好寫.

揸車經過, 本來想去鯉景灣食,但見新開個門面好光猛, 門口可以泊車, 就停低試下.可能仲早, 唔洗等位.先黎個王老吉清下熱氣, 再慢慢點野食.menu寫住全部會有辣粉,雖然唔係好食得辣, 但都即管試一試.羊肉串: 加左孜然粉, 勁似大陸食o個d羊肉串, 雖然唔係真係話好靚既羊肉, 但勝在風味.燒菠蘿: 菠蘿本身好甜, 燒熱左好o岩呢個天氣食.燒翠玉瓜: 無味. 唔太like.燒韮菜: 本身好鍾意韮菜陣味, 加上辣辣地幾好味.麻辣紅薯粉: 有少少似傷心酸辣粉.整體黎講唔算好辣, 夠惹味, 都算唔錯.

店子不大, 約30個座位.但可能樓底高, 所以感覺不太逼.等位約等了10分鐘.點左大概8樣食物.落單時店員推介是日海鮮,手掌咁大隻扇貝.於是每人點左1隻.扇貝真係超鮮甜, 落左少少蒜蓉吊味, 好味, 而且真係好大隻.燒牛舌唔算大串, 但好入味.燒四季豆, 無乜特別, 略嫌唔夠味.燒生蠔, 都係蒜蓉吊味, 夠肥美鮮甜而唔腥, 唔錯.燒餈飯, 無乜特別, 都係餈飯一個.可能剛剛開張, 落單有少少混亂,黎左幾次唔係我地點既野食.希望可以改善.

早兩晚，我們去到筲箕灣朋友家中聚會，雖然名為大食會，但實質是吹水最會，離開的時候，還是有點肚餓，於是在附近找一點小吃，希望填飽肚子，見到這裏門面十分光猛，好像是新開的，門口又可以拍車，於是被吸引了，選擇坐在這裏， 我們三位吸煙人士， 選擇了户外位置，好在這晚不是太冷，否則一定選擇坐回室來。坐下後，我們問店員這兒是否新開的，當然我們猜對了，因為見到裝修環是新束束的，由於是新開関係，十分整齊清潔，而電視播着我的最愛……周星馳。由於我被周星馳吸引住，點菜你的工作交給我朋友。，他點了燒鮑魚，串燒菜心， 串燒海蝦， 麻辣金菇，多春魚等等。烧鮑魚十分好味，蒜蓉十分香口，味道夠濃，而鮑魚口感亦新鮮彈牙，價錢亦十分相宜，只需28元。而串燒菜心也十分惹味，曾經在別的地方吃過菜心，有的就是燒得太蕉，有點苦味，有的就是燒得吾夠熟，而這裏的燒菜心恰到好處，菜心只有一點點燒焦味而不會有苦味，加上一些辣粉，實在是不可不吃。麻辣金菇對於喜歡吃辣的我，真是十分喜歡，因為它的麻辣味十分惹味，而真是很辣， 但略是欠了一點燒烤的火候。而串燒海蝦及多春魚等，就只是不過不失的質素，沒有什麼好特別。整體而言，是一個不錯的宵夜選擇

朋友突然好似發現新大陸咁,大大聲話, "喂,我樓下開左間新串燒呀! 好似好正咁!".逼我地一齊黎試.於是冒住天寒地凍過黎.佢o既 "好似好正咁", 明顯係睇外表, 因為裝修真係幾靚, 呢個朋友真係膚淺, 睇外表.我地一行4人, 但就由佢一個自己係咁點野食.除左menu上 既野食.仲有每日推介, 新鮮海鮮類, 係師傅每日親自去買既靚貨.今日就有大扇貝, 真係超大隻, 大過隻手掌. $48.店主話因為係新開張, 益食家~我地一野就點左12隻.真係好鮮味, 再配左少少蒜蓉, 超正.燒茄子都好味, 話係原條生燒, 雖然唔知有乜分別, 但幾好食, 亦都係配蒜蓉.牛舌, 整得好淋, 好有牛味.翠玉瓜, 無乜味, 無意見.芝士餈飯, 餈飯上面加芝士燒香左, 雖然好簡單不過好味.羊肉串, 稍嫌唔夠羊味.糖燒朱古力香蕉, 焦糖+香蕉+朱古力漿, 鍾意食甜既必like, 唔鍾意食甜既必嘔.飲品款式就唔係咁多, 呢方面可以改善下.