有錢佬靚粥 (Closed)

尋日兩個人👫來食，叫咗一個招牌有錢佬靚粥、一個醉翁亭、一碟煎韭菜豬肉餃同一碟煎黃金蝦餅。有錢佬店面細，外賣為主，但都有幾個堂食位，不過繁忙時段要等位，但仍有捧場客等堂食。點餐後沒多久，食物陸續送到🤗。煎韭菜餃脆卜卜，落少少特配黑醋，更提升了味覺享受。$20碟，4隻，性價比高，讚！👏🏻煎黃金蝦餅水準亦相當高，個餅底係墨魚膠，裏面有鮮蝦肉同粟米粒，煎到金黃酥脆，落咗少少辣油，香辣惹味，👍🏻但要適可而止，太辣不是人人受得了。$25三塊，可以接受。兩個粥都出奇地好食😍，招牌粥$33，粥底用北海道大瑤柱絲同豬骨熬製而成，另外加咗皮蛋，鹹蛋黃，青島乾貝仔，材料相當豐富😋！醉翁亭$36，有蟲草花，滑雞件，配上花雕酒，揭開煲蓋時香味撲面而來。🤤兩個粥嘅粥底都夠綿夠滑，調味啱啱好，唔會搶走曬個粥本身嘅清香味，同埋材料本身嘅鮮味，而且有住家粥feel, 應該冇落味精，襯得起「靚粥」個招牌。🙂一句講晒：啲粥好掂！👍🏻👍🏻👍🏻

已經食過幾次，每次都要等5-10分鐘，後來得知有得外賣自取，決定試吓！放工返屋企前打電話去嗌定個海鮮粥同一份煎蘿蔔糕。一去到就見到袋外賣已經準備就緒，唔洗等就攞得！完美地避開繁忙時段等粥的人羣，既快捷又方便！用埋八達通俾錢，真係一秒都唔洗等！返到屋企即刻開動，嘢食仲係熱辣辣的！海鮮粥一貫足料，有帶子仔、魚柳、蝦、蜆肉同飛魚籽墨魚滑，粥底鮮甜！ 煎蘿蔔糕有蘿蔔絲、臘腸粒、蝦米，煎到兩面金黃，好香口！簡單單單、輕輕鬆鬆又一餐！

下午茶4點幾食咗個老麥餐，飽到上心口，夜晚收工都仲飽緊，但又驚晏啲會肚餓，所以諗住求其買定個宵夜。行過見到有豆漿粢飯，套餐價$23, ok啦，要咗一份。返到屋企放咗兩個鐘見餓喇終於，本來熱到燙手嘅粢飯已冷卻不少，啱食。雖然外面啲飯凍咗，但糯米仍然軟熟，仲好香米味添！舊飯裏面啲餡仲係熱嘅，有紫菜肉鬆、榨菜同油炸鬼，都幾足料，油炸鬼仲脆脆地！杯豆漿係微甜，飲完唔覺口渴，而且好明顯係自家製，充滿豆香之餘，飲到最底時見到有少許豆渣，最鐘意飲呢啲冇添加防腐劑同色素嘅天然豆漿，健康又好味！諗住求其買個宵夜點知都有驚喜，下次會再幫襯！

之前已有留意過“有錢佬靚粥”嘅有關介紹，適逢今日同老爺奶奶去柴灣拜山，之後就專登落咗筲箕灣食粥。食咗“招牌有錢佬靚粥”～咸蛋、魚蛋、瑤柱、豬骨等...“極品海上鮮”～墨魚滑、蜆等...“鮑您滿足”～冬菇、鮑魚、雞肉等...3款粥都各有特式、好足料，亦食得出用心製作。燒賣、蘿蔔糕，食得出調較過嘅甜豉油同甜醬值得1讚！！！本人口味--好推介食粥嗌埋香辣菜脯粒加落去食，好惹味好夾，值得去支持吓嘅良心粥品小食店。

之前朋友食過讚不絕口，上星期六約埋男朋友去食，竟然closed😞......走埋去一望張通告，先知原來今個星期六休息！呢條街出咗名租金貴，竟然揀星期六休息？咁有性格係咪唔憂做？🙄今次特登星期日嚟，點都要試一試係咪咁好味！😜 BB鐘意食清啲所以叫咗濟州蠔華豚, 自己食蘋然心動，另加一份燒賣同煎韭菜餃。先試燒賣，ok, 質地煙靭，有魚蓉香味，加咗甜豉油同辣油，有種獨特香味。韭菜餃煎到兩面金黃，咬落脆卜卜，送粥啱晒！兩個粥都真係唔錯。👍🏻 蘋果粥加咗玉桂粉，好香，裏面有好多蘋果粒粒，啖啖果肉好滿足，配埋nuts, 松仁、杏仁粒、同乾果肉，估唔到同個粥都幾夾，個feel好清新！😇蠔粥啲蠔係韓國大蠔，相當肥美，啲肉碎食得出係醃完再炒過先放落個粥度，一啲都唔馬虎。成個粥十分鮮甜，BB係咁話好味，見佢食得咁開心我自己都好開心呢！😊 不枉我哋再嚟一趟。不過下次嚟之前都係check清楚幾時休息為妙喇。

到底堂食個砂鍋定外賣個碗嘅容量大啲呢？呢個問題已經喺我屋企熱議咗兩鑊。事關我哋一家四口次次都係嗌外賣，每次要4-6個粥全家食；有次行過見到堂食啲粥係用砂鍋，感覺上size好似大啲（而且非常滾熱辣好正咁）作為慳家急先鋒嘅我為咗找出事實真諦，當仁不讓，前日專程同阿爸阿媽細佬再去堂食番轉，親身求證下。一坐低就叫咗個招牌粥(最鐘意食呢個粥），細佬食蔥爆牛肉粥，阿媽嗌蟲草花醉雞，老豆就食濟洲蠔肉碎粥，全部都係新嘢。另外仲嗌咗啲同求證事實無關嘅小食，包括煎蝦米腸、蘿蔔糕、餃子同蝦餅。啲小食煎得好香脆，值得一提嘅係個餃子配左店家特製嘅香醋之後出奇地好味。食完之後我哋就開始討論，我同細佬覺得砂鍋好似係大啲，但阿爸阿媽就話唔覺喎。正當我地七嘴八舌之際，店員就行過嚟同我地講其實兩者嘅容量係一樣嘅，佢哋一早已經度過晒。噢...得知慳唔到錢後有種淡淡嘅失落，算啦，啲嘢好食就得喇！

呢種嚴寒天氣之下，唔食番啲熱辣辣，出晒煙嘅嘢，點頂得住？尤其係我依啲戶外工作人仕， 10幾個鐘坐喺條街度，又要sell客又要成，閒時真係要補身養生，食返啖熱野暖下胃。嚟呢度食粥都唔係第一次，皆因佢開正喺筲箕灣著名食街東大街，夠晒就腳。之前嗰兩次感覺一流，真材實料得來又夠平，質素可以媲美出名嘅粥舖。今次嚟到竟然出咗新野，三款鹹粥， （蔥爆牛肉、蟲草花醉雞、濟州蠔肉碎）同一款甜粥（蘋果肉桂）。天寒地凍有啲酒氣好似會暖啲，所以揀咗食蟲草花醉雞。一打開煲蓋就聞到好香嘅花雕酒味，足底夠杰身，唔會水汪汪。雞件十分鮮嫩，而且份量足，冇欺場，讚！仲有啲蟲草花，又爽又甜，正呀！加埋啲杞子，感覺上好滋補咁，啱晒我！如果店家可以定期推出多啲新款嘅粥就好喇！

揸住架車喺東大街搵食難度極高，一嚟難搵位泊車，二嚟俾你搵到個位又要擔心隨時被抄牌，所以一定要速戰速決。老實講嚟呢度食唔係因為啲嘢好食（之前根本未食過），而係貪佢位置夠方便，可以望實部車，食都食得安心啲。雖然呢度專賣生滾粥，但食粥時間太長唔啱我，點咗豉油皇炒麵、魚蓉燒賣、蝦米腸。炒面係即炒，ok有鑊氣，唔錯！燒賣煙靱，加豉油辣油後有種獨特香氣。蝦米腸都好軟滑，配秘製醬汁，好味！東大街嘅小食嚟講，呢間算係價廉物美，屬水準之上！

呢排天氣開始凍，晨早流流想食個熱辣辣早餐，但又趕住返工，邊有時間等外賣？好在有呢間粥舖，真係解決晒我所有嘅煩惱！工作關係朝早七點要出門口，條街啲食店大多都未開門，唯獨是呢間粥舖已經炊煙裊裊。粥店嘅早晨套餐相當抵食，買任何一款粥，加$4-$8就可以配埋包/腸粉/炒麵等。我最愛嘅組合係皮蛋瘦肉粥+炒麵，只係$26咋！又平又夠飽肚，碗粥仲好綿添！值得一提嘅係，店舖有電話落單服務，返工前預早打去落柯打，一去到就攞得，連等外賣嘅時間都慳返，唔使趕頭趕命。最抵錫嘅係雖然店仔一間，但竟然有提供八達通付款，唔洗摷銀包搵散子，超級方便！粥店不但啲粥好味，服務又夠晒體貼，真係抵讚！

呢間喺屋企附近嘅蚊型粥店開咗幾個月，一直都想試一試，尋晚終於的起心肝同老公食咗啦。夜晚八點拎去到，靠埋一邊牆坐，個位幾都迫吓。嗌咗兩個新出嘅粥，我揀咗蟲草花醉雞粥，老公食「濟州蠔華豚」（佢一聽到個名就話要試喎⋯⋯）。等左一陣，兩個粥到左(呢個唔重要)，(重要嘅係)奇妙嘅事接着發生。身後突然有把熟悉嘅聲音傳來：「又來啦喂！又剩得門口位嘅？下次要打嚟訂枱先喇咁！」擰轉頭一望，見到個神高神大嘅男人，同位朋友坐咗喺門口個張四方枱，再望真啲原來係！我的天！80年代紅遍中港台俘虜萬千少女芳心嘅溫拿裏面第二靚仔嘅陳!友!!(第一梗係校長啦仲洗講!)我的天！只有呢個年代嘅姊妹先會明白我同偶像近距離食粥嘅心跳！（當然不能跳得太大聲因為老公坐喺度）兩個粥都幾好食其實，足料囉，個雞粥酒香重，啲雞幾入味，蟲草花爽口。老公話蠔華豚啲蠔夠晒大隻，好鮮甜，不愧為濟州蠔。言歸正傳我影咗佢食粥個樣！雖然冇化妝但佢仍然係完美嘅。一邊食一邊𥄫(又不能𥄫得太明顯因為你懂的），其實店仔細細都有優點嘅。最後鼓起勇氣同佢講咗聲Hi Anthony！點知佢好nice咁回應:「Hello～嚟食粥呀朋友？」!!!!!佢叫我做朋友!!!!

家住元朗，難得到港島，當然要一嚐地道美食。早前看過介紹，對此店略有所聞。甫進店內、一股豬骨粥香即撲鼻而來，精神為之一振。鑑於時間尚早、一會又欲掃街，遂決定以甜粥配腸粉先開胃口。甜粥乃此店之特色之一，一看餐牌旋即被鮮黃色的南瓜芋頭粥所吸引，心意已決！再點了個蝦米腸。南瓜粥香滑非常，粥底是絲絲南瓜蓉，加上軟綿的芋頭粒，香甜可口。然而，叫人喜出望外的竟是小店的自家製醬料。本人乃醬怪一名，吃街頭小食無醬不歡且要求甚高。小店的自家秘製醬料出奇惹味，甜豉油鮮味無比；甜醬甜度適中而且香味十足；芝麻醬能嚼到粒粒芝麻碎，一試便知是上等貨色。辣醬有兩種：一種是用來拌麵的士拉差辣醬，辣中帶甜，具獨特泰式蒜辣風味；另一種則是「咪亂試勁辣醬」，隱約吃得出醬內混有麵豉、辣椒、洋蔥等，芳香惹味，推薦各位一試！喜歡光顧小店，因為他們會在細節上花心思，做自己特色的味道！香港多條著名食街近年租金高䀚，位置較好的舗位已被大型連鎖集團隴斷，具特色的小店已買少見少。小店用心經營，實屬難得，定當多多支持！

筲箕灣😋最好味腸粉燒賣😋自從喺返學途中發現咗呢檔啲小食之後就keep住嚟幫親，佢啲腸粉勁軟滑，又晶瑩剔透😍店員話係喺一間老牌麵廠入貨嘅，但點都唔肯講邊間🤨 算啦好味就得啦！魚蓉燒賣嘅texture好煙靱，勁彈牙, 有陣陣魚蓉香氣，加埋佢啲秘制豉油、麻醬、甜醬，無得頂！呢間嘢已成為我返學放學必到之處。👅

暖笠笠砂鍋粥🍲尋日經過開筲箕灣，天氣凍諗住食安利暖吓胃，點知冇開，唯有搵其他嘢食。行行下見到有間粥舖，見佢啲poster有砂鍋粥食，合晒合尺！坐低研究咗一陣，決定嗌個招牌粥試吓(個menu度有個皇冠推薦，應該靠得往掛😅）等咗幾分鐘，煲粥就到了，打開煲蓋，個粥仲滾緊，正！！立即試一試，第一啖已經愛上！😍粥底好重瑤柱味，有嚿排骨肉，重真係有粒乾瑤柱！睇嚟都幾足料！米粒煲到起晒花，好綿好香濃，欲擺不能，一吃到底！食完成身暧笠笠。估唔到舖仔細細都有咁嘅水準，唔錯！下次會試吓佢個鮑魚粥、睇吓係咪一樣真材實料！🤔

Many people have mixed reactions on this new congee joint ROLLING IN CONGEE because they serve modern congee but I was really excited on giving it a visit. Went one afternoon and it was closed so went back another day.From the Chinese name I was expecting the congee to be expensive but the most expensive one costs $29. I liked the way it stood out because the menu obviously had design to it with a purple theme matched by their aprons.Their congee also appealed to me because they had really nice

放工唔舒服諗住食碗粥，見東大街新開張咪去試下，去到見佢有個女仔係到派傳單，粥得幾款（應該得6款咁上下），佢介紹有個用豬骨，有個用牛骨煮嘅2款粥，話係佢地嘅推介。咁我就試下個豬骨粥囉。買完加埋返到屋企前後都無10分鐘，我就打開碗粥食，點知一打開竟然係得啲肉碎，幾粒蜀米，睇張相完全想像唔到係咁囉。都算啦！諗可能個粥底好甜，點知淡某某，好似醫院粥咁囉！完全唔知想點！跟手試下個蝦米腸，竟然凍到硬掘掘，一拮就斷！絕對唔會想再食囉！