太上漁村海鮮酒家

Open Now

Now Closed

餐廳外面勁多錶位，好岩泊車人士🚘諗住唔算旺街應該無咁多人，點知勁旺場，8點幾已經話賣晒乳鴿同菜苗～ 全晚最深印象係呢3樣餸！✨️招牌冰鎮咕嚕肉上枱時大家嚇咗一跳 ，無諗過咁大盤😳 一路閃住led彩燈，估唔到傳統嘅中菜餐廳都咁有創意～ 咕嚕肉表皮冰冰涼涼，咬落脆脆地，內裡嫰腍， 醬汁酸酸甜甜好醒神，搭配菠蘿片🍍 車厘茄🍅 士多啤梨🍓。份量大到我地5個人都覺得多，我諗多2個人幫下口就岩岩好 🤣✨️銀芽肉絲炒麵銀芽肉絲同麵底係分上 ，自己鐘意撈幾多就撈幾多，麵餅咬落去脆卜卜！✨️涼瓜肉鬆菜脯煎蛋角蛋角加入苦瓜後帶出苦澀味，不過只係好輕微，就算平時唔食苦瓜都一定接受到，再加入菜脯更有口感。另外仲叫咗 ［陳皮蒸班頭腩］［楊州炒飯］［蒜蓉炒油麥菜］

同奶奶慶祝生日，所以揾間酒家食。第一次去食，估唔到酒樓都幾多人食。酒樓不算太大，坐位有少少迫，但環境都乾淨，服務員態度有善，樓底比較矮，所以比一般的酒家嘈一點，但是是可以接受的。燒肉很好味，皮是脆脆的，但肉質沒有乾。蝦就一般，沒有特別好味，但是價錢相對比較貴。糯米飯比較濕咗少少，但味道是好吃的，如果可以再乾身一點就更好。咕嚕肉都好味，不會過多粉漿，也不會太酸太甜，味道剛剛好。炒牛柳粒好好味，牛肉有口感，味美可口。芋頭南瓜煲都好味，但感覺清咗少少，如果加埋臘肉，臘腸，油鴨肶可能更好味。見好多人叫湯，手撕雞同小炒皇，下次去試下。我哋叫咗9款菜，加二個白飯，埋單一千三百幾，價錢合理，整體味道幾好味，仲有幾款菜式留待下次再去試。

炸台山蠔，肥美！蒜香骨，好味！炸魚皮，唔記得影！海皇什菜煲，必需要食！仲有個咖喱脆皮牛雜，第一次食！新裝修之後第一次去，靚咗好多，雖然又未到冠冕堂皇，但我覺得到適合擺一啲小宴會。佢個咕嚕骨真係真係好好味（不過今次無食到）

平時有幫襯，服務OK。但一到農曆新年，想落單訂年夜飯外賣，提早一個星期問佢，佢叫我到時先訂，早一日再問清楚佢，可唔可以訂咗先，驚佢唔夠貨，結果被拒絕，佢同我講一定要當日先可以落單。好，我預好晒啲餸，準時過去買外賣，見到佢同買外賣嘅人講，做唔切，叫啲人諗吓去第二度買！！ 我聽到佢不停咁幫啲熟客留餸，作為普通客人嘅我，心裏不爽。我真係俾佢激死，我早啲又唔俾定，聽佢講當日去有冇得訂！最重要係，我預好晒啲嘢，陣間人哋嚟食飯，而家乜都冇，咁點搞！雖然之前OK，但係今次咁樣俾佢一鑊翹起，非常不滿！作為一間已經做咗咁多年嘅食店，做一新年飯，唔係新手，點解會咁混亂！

位於太子警察會對面的「太上漁村海鮮酒家」，是我跟家人經常午膳晚飯的地方，這裡吃的是香港地道酒家菜式。 早幾天，我家老闆帶著海外回港探親的長輩前來晚飯，簡簡單單點了幾個小菜，我才驚覺…. 原來這裡餸菜味道在同級餐廳水準之上，越簡單越見真功夫。**為食推介：杏汁豬肺湯 咕嚕肉

早午要在附近工作所以就提早食個醒晨早餐，咁早除咗麥當勞茶餐廳當然仲有早茶，難得咁早起身又好耐冇飲過早茶唔使諗一定係飲茶早上七點幾已經枱枱都坐滿人要搭枱，一個人冇乜所謂，開返壺靚普洱先飲茶點心點少得我嘅至愛山竹牛肉，牛肉熱辣辣食得出手剁牛肉同豬肉，分量比例牛肉多少少，所以肉味好香唔會肥溜溜，夾埋腐皮加埋喼汁成個配搭冇得輸😋😋😋😋😋朝頭早冇乜心情啜骨，排骨同鳳爪唔會揀，所以就叫咗鮮竹卷😋😋😋一盅兩件都未夠喉所以再整多個蒸飯，好耐冇食鹹魚所以就嗌咗鹹魚蒸肉餅，鹹魚梅香配埋個唔係好喊唔係好甜嘅豉油啱啱好😋😋😋😋😋

朋友話要黎呢間食，咁我地一班人就在這聚一聚。店子完全毫不起眼，裝潢似舊式邨屋D酒家，環境都算是乾淨。估唔到呢間酒家嘅食物都唔錯，上湯龍蝦煎米，龍蝦新鮮，米餅煎得脆口又唔會太乾身。東星蒸得剛剛好，啖啖肉。咕嚕肉呢碟麵粉不太多，剛剛好包住D肉塊，又唔會太酸。另外，炒飯炒得好乾身，口感唔錯。

又要去警會上堂，而午飯時會最傷腦筋，因為成十多人，所以我就諗起多年前都去過的太上漁村。確定人数就一星期前訂枱；還未刭十二点三己坐滿咁濟。午餐都叫左個特色鱼肠蒸蛋，d蛋恰到好處，油炸鬼仲可以咁脆口；另外菠萝咕噜肉又係好味。當然仲叫左其他点心，好多已經冇影相。最愛蝦餃，皮薄蝦肉大，咸水角亦好好味。除左食物好味之外，職員雖然忙過不停，但佢地d服務態度都吾差。同事話飲刭啲茶冇味又會主动加茶葉。最重要埋單每人都係九十零元食咁多野

朋友聚餐，環境唔錯，老闆熱情，餸菜一流。值得推介，海鮮新鮮，味道驚喜。蜜糖炸雞翼香口，白灼蝦 蝦新鮮。龍蝦 炸米餅底，炸米餅出奇好味，有驚喜！ ！！！！！！！！！！！！

同朋友聚舊最緊要食得盡興，可以慢慢食慢慢傾計，於是便決定食中菜。呢間酒家位於太子西菜菜北街，平時經過都唔太起眼，但其實內有乾坤，令大家都喜出望外。首先龍躉兩味，一炒一清，兩種風味脆皮咕嚕肉係必食！外脆內軟，加上表面嘅蜜汁，有別於一般咕嚕肉，好滋味黃金蝦球，濃濃鹹蛋黃封住爽脆蝦球，令人回味無窮金薯牛柳粒，香甜可口，我地仲encore 多一碟，推介！要來食的話最好訂位，問了侍應姨姨得知每天都好旺，幸好本身因人多所以有訂到位，而且樣樣都大大碟，夠哂份量

與家人約了聚會，想起上次與一班朋友來過這兒，印象不錯，今次專登帶家人來試試。我們一行七人，叫了冰鎮咕嚕肉($148，依然好味，越冰得久，越脆)，脆皮燒雞皇(一隻$218，皮脆肉嫩)，椒鹽鮮鱿($88，粉漿厚咗少少，但可接受及好味既)，肉醬金磚豆腐($68，炸到皮薄內嫩，必食)，咖哩脆皮牛腩($88，牛腩太乾，唔得)，酥炸生蠔($148，等到發炆憎，所有嘢都食曬，仲未上檯，追了兩次單，話取消埋單好了，才話正在煮緊。上檯見到個粉漿，厚到赫死人，完全唔掂)，共7個茶位，5個白飯，埋單連加一$971，抵食，六個餸，只有兩個唔得，但家人沒投訴。

有老友從新加坡來港，一班老友趁機出嚟聚聚，有朋友建議來這兒，話這兒的小菜不錯，就訂了這間。我們叫了九餸一湯，菜譜上的名字已忘記，只能口語化說出: 甚麼龍骨湯(火喉足，好飲的)，炸乳鴿(要上檯即食，肉很嫩)，冰鎮咕嚕肉(因有隔冰水層的關係，呢個整得好好食，即使放了一會才吃，仍然很脆，必食)，西蘭花炒雜菌(還可以)，炒豆角(家常菜，好好食)，銀魚仔菜煲(上檯好香，味道很好)，黃金炸鮮魷(外層香脆，惹味)，魚腸焗蛋(這個焗得好好味，下次再嚟，都是必食的。)，椰汁煮芋頭南瓜(對於我個人口味而言，就麻麻，但同檯朋友都好鐘意)，還有一款甚麼一口牛(牛煮得好滑嫩，唔錯)。我們一行11人，連飯，埋單$1350而已，平均每位$122，總括而言，抵食又好食，會再帶親朋好友再嚟。

一間毫不起眼嘅小店，位處警察遊樂會正對面，門口已經有錶位泊車好方便。最驚喜係食到咁精彩嘅生炒骨，粉漿厚薄適中，夠火喉外脆內軟，仲好細心咁有菠蘿同士多啤梨做伴碟其他菜有菜味(我地叫左個菜心全走都跟足黎做所以食到真菜味)，雞有雞味(阿姐真心推薦話唔扼你，黎到又真係比班餓鬼秒清)，仲要水滾茶靚，樓面姐姐做到截單都仲好殷勤，價錢親民，如果計埋佢嘅味道簡直係絶對超值，如果對環境要求唔高純欣賞嘢食，絶對值得推介

今天朋友出海釣左龍躉及火點魚, 我們拿到太子道西太上漁村海鲜洒家加工，將龍躉切片果皮蒸,火點原條加熟油同蔥段 ,果然老字號,師父的廚藝及手法把新鮮魚蒸出內軟外滑的口感非常鮮甜。另叫咗一碟冰鎮咕嚕肉,外脆內軟十分特別, 我都係第一次食這冰鎮咕嚕肉 ,真係值得一試, 一頓簡單便飯維繫咗一班朋友既感情, 在「太上漁村」食飯可帶出 朋友老闆和夥記濃濃的人情味 ,整晚大家食得開心又滿足，很多謝老朋友的分享 ,這個晚上第一時間食到海上鮮即日釣上水, 酒家老闆當時正忙着要選那種烹調方法。（火點)配合淋上的熟油加蔥花又甘香果皮蒸龍躉頭腩, 又嫩又滑 石班片配西蘭花、因為魚肉夠新鮮且鮮甜，西蘭花當然不用再調味已經有陣陣鮮魚既香氣。冰鎮咕嚕肉，賣相色彩繽紛，冰冰凍凍酸酸甜甜的,仲有發光既冰,淨係賣相都夠哂吸引同靚,我都情不自禁咁樣夾左很多塊食啊。

朋友放假，我又咁啱要去附近既球場，咁就同佢黎呢度飲個茶。一入到去都以為要搭枱（因為我地得兩個人）點知佢即刻執左近門口既位俾我地。四人枱黎𠺢，所以會坐得舒服d 鳳爪大大隻，豆豉唔會過多，有小小辣而唔係太過辣，唔會硬身到好似沙薑咁，但又唔會一放入口就溶晒！煎腸粉一黎到就覺得佢地好用心咁煎佢既！每條腸粉兩邊都煎到脆晒，小小蝦米、蔥，配上甜醬麻醬真係一絕。叫左一隻乳鴿，唔算肥，但$38 一隻價錢適中。皮脆內嫩！肉唔算厚，但有肉汁鎖住響陣皮入面。仲有叉燒飯唔記得影相！叉燒同飯分開，唔會話叉燒無晒汁，而且都有好多片叉燒。蒸黃金糕！出面酒樓好小有機會食。我地食既時候已經凍左！之前佢地有煎黃金糕既，但依家已經無左！最鍾意既就係佢煙煙靱靱，仲要有椰香味！結果忍唔住再叫多個！但反而熱辣辣既佢就唔太食到椰香味。