前菜小食四小碟一次過上，整齊的放於方形器皿中，由右下角開始吃。
帶子, 脆小麥, 鱈魚子醬。一啖咬下，炸過的小麥仍熱口香脆，鱈魚子醬帶來粒粒口感，帶子半生熟帶鮮甜。
蟹肉蒸蛋。蟹肉鮮甜味滲入蛋的每分寸，加入忌廉同煮增強了幼滑口感及濃厚奶香，像極吃甜品！完全跳出了尋常蒸蛋的做法，是非常出色的一道菜。
試過逐一將兩款牛配對店方提供的5款醬料：岩鹽、wasabi、刺身豉油、 沙律醬、蘿蔔蓉。個人認為因師傅已灑了鹽花，故原味已很好，真要下醬料岩鹽也提鮮，蘿蔔蓉就清新減去油膩感。伴碟的菇片帶牛油香且夠軟熟，露筍無渣清新。
露筍牛肉炒飯。夠乾身，選用意大利雞蛋，一塊塊黃澄澄的顏色除美艷亦富濃郁蛋味。點點的芝麻帶來誘人的香氣，整體出色。伴飯的漬物有蘿蔔、青瓜、茄子，非常濕潤可口。
甜品是焦糖雪梨, 雪梨酒雪葩。雪葩幼滑帶香甜梨味，底部的雪梨灑了酒搶大火燒成，軟熟無酸澀味，雪梨薄片風乾而成，咬落似玻璃薄片般清脆甜美。同是梨但以不同型態及口感呈現，味道豐富，令我想起二星The Principal的Orange Textures純玩質感但味道平凡，這裡層次更高。
雖然很飽，但仍要了latte。泡沫幼細棉密挺身，咖啡味重。
君悅酒店位於會展隔離，周圍除咗多人去睇展覽，多遊客去紫荊廣場觀光，放工時候更推滿哂上班一族，由灣仔地鐡站行去要十五至二十分鐘，選擇坐巴士或者的士就仲頭痛，一定要預鬆最少半個鐘，因為嗰區到處都咁塞車，就連住港島區o既XO仔都覺得唔就腳 。君悅酒店門外有攜帶住行李o既旅客，亦有多位衣著華麗o既賓客，似乎大堂o既服務生未能妥善地招待每一位貴賓，事關當晚其中一位七旬長輩到場時即向主人家投訴，訴說自己喺五星級酒店內居然冇服務生為佢帶路，而且未有人能正確地指出餐廳位置，令佢迷路得不知所措，真係差啲喊咗出黎 ！（雖然小插曲並唔係發生喺餐廳入面，但餐廳屬酒店管理範圍之內，即兩者有直接關連；酒店服務出現問題，小肥亦理所當然地扣除Teppanroom一分服務分，以示不滿及警惕！）
Teppanroom燈光較暗，格調高雅，地方闊落，裝修簡單潔淨，感覺一塵不染，衛生舒適。餐廳共有三位師傅，師傅們身後擺放著多款新鮮食材及餐具，同一時間最多可容納十六位客人；座位圍繞住房中一張長鐡板，每一個角度都可以睇到廚藝表演。姐姐仔介紹主廚Robert為北京人，曾花上一年時間於法國學藝，鑽研調味，所以烹調出黎o既鐡板燒菜式極富法國色彩，下圖為師傅特別選用o既橄欖油。
長輩包場宴客，當晚最少有四位後生仔女為我地房中各人服務，斟茶、遞水、加酒、換碟、送上熱毛巾等，服侍周到，態度亦非常誠懇有禮。小肥最感動都係佢地續一為貴客們帶上圍裙 ，深感餐廳有文化及衛生之餘，更覺服務貼身，值得小弟在此加以嘉許。務求客人們能夠一一品嚐大廚o既主打招牌菜，主人家早幾日已經同餐廳職員寫好合共九道餸o既餐單（餐前小食另叫）；更預先編埋位，來賓只需對名入座，真係細心體貼。
雞泡魚干 + 枝豆：熱熱地o既雞泡魚干煙韌帶甜，暖暖o既枝豆味道較清；主人家叫黎送清酒還過得去，不過要黎送香檳（當晚有坐上客只飲香檳）就好似唔係好夾 ！既然大廚曾赴法國深造，小肥建議餐廳可以因應食客飲o既酒叫師傅做出不同小食去配襯，黎個food pairing。
日本高知蕃茄，西班牙豬肉，松果法國蘑菇，蕃茄，開心果，橄欖（$165）：左手邊o既日本高知蕃茄本身唔會過腍，味道好夠甜，一啲酸味都冇，以pine nuts及秘製醬汁舖面，整體口感非常濕潤爽脆，對菜一向好反感o既XO仔居然忍唔住推介比唔食蕃茄o既媽咪食 ，好味指數不言而喻！右手邊o既蕃加拌portobello mushroom，混滿橄欖碎及開心果仁碎，香脆得黎又夠野味，送酒一流！
法國田螺，龍蝦，蘑菇，龍蝦油（$210）：小弟好少食田螺，口感同之前食嗰味黑魚粒差唔多，一樣咁爽口；龍蝦不但唔嚡、唔溜、唔乾，爽得黎仲帶點香脆；蘑菇入口即散發陣陣鮮香味，原來師傅喺蘑菇面塗咗層薄薄o既龍蝦油，嘩，猶如神來之筆，教人連聲讚好 ！
加那利群島紅蝦，茴香酒（$360）：紅蝦用個有柄o既鐡撐仔上，既保熱又美觀衛生，好有諗頭。師傅解說話蝦頭多膏，所以個汁主要用蝦膏加上茴香酒調製，雖則如此，個汁一啲都唔溜，其香濃度亦冇蓋過紅蝦本身o既鮮甜味，可稱為絕配！可惜伴碟o既蒜蓉多士就唔多夠熱，而且比較硬 ，其濃味又搶去紅蝦o既鮮味，XO仔建議餐廳轉用普通法包，簡單得黎效果會更佳。
阿拉斯加鱈魚，橄欖，白酒汁，西班牙腸，亞枝竹（$165）：鱈魚肉質鮮甜幼嫩，用白酒汁煮出黎效果濕滑且唔油，以咸咸o既西班牙腸輕輕地加以點綴調味亦不失為一個好方法。小肥唯一唔鍾意碟中o既artichoke同蔥頭，食落前者o既質感同鱈魚嗰個好似有少少沖突。
日本A5宮崎牛牛柳100g：主人家非常慷慨地預咗每人100g和牛份量 ，細食o既女士們覺得太多，哈哈，小肥好自然地有多成份食，即係一個人食咗200g ！師傅根據客人不同o既要求煮出不同生熟度o既牛肉；小弟嗰份為medium rare，肉質軟腍而鬆，黏上芝麻及Salsa醬，香味尤其濃烈。
鐡板炒什菜（$120）：炒什菜中有百合、荷蘭豆、荀、蕃茄及野菌等，講真視菜為敵人o既小肥真係唔係幾識欣賞，只係覺得啲荀好爽脆，同埋啲野菌幾野味。
菠蘿，龍舌蘭酒，椰子雪糕（$90）：波蘿為甜品之主材，碗中底層放有大大舊波蘿，浸喺暖暖o既tequila汁內，中間放上一球雪糕，雪糕面再加有一塊花形o既波蘿片，冰火交融之際種出一朵鮮花，認真有意思 ！面頭嗰片花形波蘿應該係用焦糖燒製而成，好薄好脆；以tequila烹調o既汁液香甜濃郁，唔講真係食唔出原來個汁面加入咗微量o既黑胡椒粉去調味；不過碗中o既波蘿塊就好似家中嫲嫲叫小弟一般，「好孫（酸），好孫（酸）」 ，莫非師傅特意用啲超酸o既波蘿幫助我地消化當晚豐富o既一餐 ？！
長輩請客，小肥唔好意思問埋單幾錢，不過姐姐仔透露包場最低消費為HK$25,000 + 10%，所以每位都要過二千蚊架，出名慳家o既小肥聽到心中當然係嚇咗一跳啦 ！不過客觀評論，Teppanroom屬五星級酒店內之高級食肆，無論係環境、服務、衛生、食材等，全屬優質頂級，以二千多元食到肚滿腸肥，當中不乏越洋搜羅之新鮮蔬果海鮮，加上大廚自家研製之烹調組合及獨門調味秘方，食盡法日新口味，價錢其實都算係幾合理架啦！最後，長輩們叮囑XO仔要喺食評當中特別讚揚Teppanroom個抽氣系統非常好 ，女士們離開時無一不讚，話大家都係第一次食完鐡板燒居然個身唔會留下一大陣油煙味！
Video
