意粉屋 (Closed)

之後都無黎過，但有免費得來的現金券又唔想浪費，就決定試試。諗住食下午茶唔洗等太耐，但假期係沙田真係超爆多人，等左差唔多一個鐘先入到去，幾驚過左下午茶時間無得食，好彩最後都入到！叫了意大利飯同下午茶拼盤。1) 意大利飯：好正，好好味，但份量都唔係太夠，如果多小小就更好！（相調左光，影出黎都幾靚haha）2) 下午茶拼盤：野食都幾特色，味道都ok。總括黎講，無諗過食物質素咁正，但環境就一般，都比較嘈，其他等食既人可以好易望到入去餐廳，感覺一般。

和家人晚餐，點了一個牛油果大蝦沙律、法式田螺焗薯容、大蝦蘑菇炒意粉、西班牙海鮮飯及醬燒豬肋骨。最喜歡牛油果大蝦沙律，味道酸酸甜甜，非常醒胃。法式田螺焗薯容亦很香，田螺下的菠菜亦好入味，整碟都好滿意。西班牙海鮮飯，海鮮份量十足，但味道像白烚急凍海鮮，冇乜味道，亦沒有海鮮鮮甜味，飯味道尚可，但平平無奇，食過更好食嘅西班牙海鮮飯，這個實在普通。醬燒豬肋骨賣相不錯，肉質尚算鬆軟，只嫌醬汁太酸太濃，完全蓋過豬肋骨的肉香。大蝦炒意粉，一上枱侍應即磨芝士碎，感覺非常良好，但可惜味道很一般，底部太多油，多到油浸意粉，吃後也很口渴。

好耐無去過意粉屋啦!旺角中心意粉屋執咗，又無一間，信和意粉屋執咗，又少一間，新城巿廣場就成為我最常去嘅意粉屋.需然門口有幾個客等嗌咪，但我都只係等咗2~3 分鐘，感恩.一去到囉籌，已經講明當日取消 tea time 優惠，一早講清楚幾好吖! 好過入到去先講，欣賞!餐單如下：帶子蘆筍湯加酥皮, 芝士龍蝦帶子天使麵, 珍寶雜錦 pizza.優點 :1,帶子蘆筍湯顏色唔係好青綠, 估計係忌廉湯, 帶子鮮甜肉嫩彈牙. 正!2,芝士龍蝦帶子天使麵配嘅係龍蝦汁, 龍蝦汁超香濃, 天使麵份量足夠, 滿意.3,珍寶雜錦 pizza 配料用有意大利辣肉, 煙肉, 辣肉腸, 莎樂美腸, 蘑菇, 洋蔥, 青椒及菠蘿, 雖然又辣肉又辣肉腸, 但入口一D辣味都無, 餅底邊皮脆口. 配料份量唔少, 掂!4,每次去意粉屋食物都保持水準, 即使大時大節去幫襯仍然水準不變, 哩點值得表揚! 啪啪啪….5,環境格調充滿歐陸風情, 坐得舒服.6,服務員態度唔錯, 有笑容.缺點 :1,居然無電話訂枱服務.2,人客太多經常要等位.3,個蘆筍湯因為要焗熟個酥皮, 所以一定勁熱, 結果就係邊飲邊出汗! 冷氣唔夠呀!4,距離廁所勁遠

公眾假期黎食下午茶，好多餐廳都冇下午茶，新城市廣場黎講，搵左幾間得意粉屋有，所以黎左食。因為有喺商場app 預先拎飛，預好時間拎飛，黎到已經可以入去坐。我地三個大人叫左三個tea set, 每個約$75-85。本身以為貴，但黎到份量好似lunch 咁大，我地食唔曬。我地tea set 叫左一個拼盤、一個pizza 同一個意粉。味道OK，不過其實俾左好多沙拉菜做伴菜，但冇沙律醬，好乾...連上面有Parma ham 果個沙拉都只係得幾滴沙律醬，結果因為太苦，浪費左冇食度。服務一般，冇咩特別。久唔久都會黎食嘅～

自從某年食過一次之後便愛上，而且都已成習慣每年襯生日月用生日優惠，乘機訂個Cheese Cake 氹下自己開心，又可以在屋企慢慢享受。鮮製芝士餅(檸檬味)生日蛋糕(2磅) 原價$288 (堂食好似要 $32 /件)今年我訂咗鮮製芝士餅(檸檬味)，味道好清新，食到好香既檸檬味，而芝士份量、味道啱啱好，唔太甜，又唔會好膩，個餅底亦好好食，又夠入味同脆口，食過一年，每年都真係會成機好想再食。芝士餅面有士多啤梨做裝飾，簡約而精美，份量十足，已成為my favorite cake！

今日收工見時間尚早就同二位朋友仔去咗意粉屋食嘢，好彩係餐廳下午茶時間完結前入座。😝 😝三個人叫咗意式煙三文魚海鮮炒飯、烤丹麥雞胸藜麥羅紋菜沙律、珍寶雜錦板板薄餅。意式煙三文魚海鮮炒飯 : 每次下午茶餐都會叫既，因為自己超鐘意食海鮮，而且海鮮爽口又彈牙。😍 😍烤丹麥雞胸藜麥羅紋菜沙律 : 廚師好有心機擺得靚靚仔仔先上枱，雞胸煎得好香口之剩肉質嫩滑，而沙律菜亦好爽口，比我預期中出色。👍🏻 👍🏻珍寶雜錦板板薄餅 : 薄餅脆卜卜之剩餡料亦好多，味道絕對拍得住 Pizza 專門店。

經常下午茶時段黎到意粉屋，都排晒隊，要輪好幾張枱先到我哋。今日同往常一樣都要排隊，排左十幾二十分鐘之後就到我地喇。意粉屋嘅下午茶餐都算多元化，有麵有飯有薄餅有小食有包有甜品有沙律……今次就叫咗個休閒下午茶拼盤（ $85 ）。拼盤有巴馬火腿、雞翼、炸薯條同埋黑松露煙三文魚蛋酥盒。拼盤入面每個小食都係我至愛，雞肉鮮嫩多汁，而且熱辣辣，蛋酥盒外皮鬆脆，炸薯條外脆內暖，巴馬火腿有鹹香，沾埋少少嘅黑醋，好味！另外叫咗個珍寶雜錦板板薄餅（ $75 ），餅底較薄，用料十足，口感不錯。

因為是會員 下午茶第二份半價所以特地來吃🍽意式煙三文魚海鮮炒飯作為下午茶餐 份量不多一個人食岩岩好 海鮮無雪味 飯的調味亦剛好🍽鮮忌廉芝士焗波菜煎魚柳扁意大利麵魚柳大大的一塊 雖然不知道是甚麼魚 白汁量足夠 還有滿滿的芝士🍽酥皮湯可選周打海鮮湯/蘑菇湯/菜湯蘑菇湯很濃稠 滿滿是蘑菇碎配上酥皮就是一流🍽抹茶特飲凍抹茶加上一大球雪糕和忌廉抹茶不太濃 幸好沒太甜用上的雪糕是Haagen Dazs的跟餐加$18 可以一試

一行六人，12:00嚟到沙田新城市廣場，望下有咩好食先，廣場非常大，有一個位置是有好多餐廳，好多選擇，中西日都可以搵到，最後選擇了意粉屋，去到門口侍應小姐話叫我地一個半鐘頭還枱，因為中午嘅關係，我哋都話冇問題！先介紹一下食物，來到意粉屋一定係叫意粉啦，叫咗個海鮮龍蝦汁焗天使麵，蝦味濃郁海鮮可以，BB豬肋骨，個醬汁好嘢味，夏威夷海鮮pizza，呢個就正正常常，冇太大驚喜，小食拼盤，樣樣都有，啱晒有選擇困難症嘅我，總括來講，地方算係乾淨，唔會有太大驚喜，坐得舒服，臨走嘅時候出邊已經大排長龍了，好彩我哋唔使等位👏👏

假日要在沙田搵食真係唔簡單。。。想搵個坐得舒服的地方，又唔係好想排隊。突然想飲意粉屋的朱古力鮮奶咖啡，所以最後選了意粉屋~二人原本被安排坐一張細枱，但後來向經理表示想轉卡位，很好地經理給我們轉了枱，所以這餐飯食得很舒適。。。對意粉屋的食物其實都無咩期望，但點了客墨汁海鮮意大利飯又幾好食喎，佢的食物感覺上是進步了，而且款式亦多左好多選擇。不過令我最期待的咖啡就令我好失望了，咖啡大不如前，最後杯咖啡我飲左一半就放棄了

第二次黎食了，水準都係咁出色。我地兩個人嗌左兩個意粉加青口，都真係幾飽。其中一個係卡邦尼意粉，佢個汁都真係幾香，因為面頭會加芝士碎。另外個青口都幾抵食，冇諗到一鍋入面有咁多青口，兩個人都未必食得哂。整體黎講意粉屋唔算好平，但質素黎講真係一流！

這次品嚐意粉屋的早餐，點的是「炸魚松露炒蛋牛角包早餐」。炸魚炸得不錯，令人喜出望外。炸魚炸衣不厚，非常香脆，魚柳新鮮，無腥味，只是肉質有點易散。最值得一讚的是炸魚即叫即做，上菜時炸魚仍是燙口的。至於炒蛋，個人不太喜歡松露的味道，因此把松露刮走了。炒蛋嫩滑，惜上菜時已冷了，僅剩餘溫。牛角包是整個早餐最差的一項，包心死實，毫不鬆化，劣！好評是給炸魚的，劣評則是給牛角包的。這份早餐索價$58（未計加一），包一杯飲品。價格略嫌有點貴了，回頭率20。

I went there for afternoon tea alone, ordered the spaghetti with fish fillet tea set. The portion was huge. But the spaghetti was overcooked. The source is the type of creamy sauce that the local people may like. I would say The Spaghetti House is a HONG KONG style Italian restaurant not real Italian. The dishes are more localised.

前幾日食完意粉屋既下午茶，但係意猶未盡所以今日決定再幫襯。🤣 🤣 🤣都係下午茶時間去到，今次叫咗意式煙三文魚海鮮炒飯配酥皮周打海鮮湯。🤤 🤤 🤤酥皮周打海鮮湯 : 見到個樣精神到咁就已經知道不得了，而且用料足真係無得輸。👍🏻 👍🏻 👍🏻意式煙三文魚海鮮炒飯 : 飯底食得出用上少量既咖哩粉炒過，飯粒濕潤而且粒粒分明有口感 ; 煙三文魚味道咸香，與微香既咖哩成強烈對比，而且魷魚、大蝦、帶子都爽口彈牙，簡直係色香味美。

意粉屋一向比我既感覺都唔錯，所以下午時間就去咗呢度食 Afternoon Tea。下午茶餐牌都有 12 款食物，選擇都幾多，叫左海鮮龍蝦湯天使麵配酥皮周打海鮮湯同 Cappuccino。海鮮龍蝦湯天使麵 : 實物同相無分別，有兩隻青口、兩隻大蝦、魷魚、蕃茄仔、蘑菇。龍蝦湯湯底依舊做得出色，大蝦亦爽口，唯獨是麵條雖然煙韌，但無法吸收湯汁精華失色了少少。酥皮周打海鮮湯 : 每次都會轉酥皮湯，脆卜卜既酥皮吸收了香濃既海鮮湯，而且材料有蝦肉、蜆肉、帶子等，實在令人難以抗拒。Cappuccino : 咖啡味濃，雖然不及咖啡專門店，但味道也不差。