紅花會 (Moved) New Location

紅花會係難得靠近灣仔北，而價錢又好合理嘅靚裝川菜館。位置係商廈KONNECT入面，一開始都搵左一段時間。今日提早預訂一點，所以黎到就有夠曬闊落嘅卡位坐。午市套餐種類同價錢都贏通街。$248兩位！前菜已經有三款，香油萵筍絲、椒汁鮑魚、麻辣豬耳絲。上菜擺盤都好精緻。明火例湯，係煲雞嘅湯，超濃郁！老壇酸菜魚，想多肉啲就揀海沙巴，想滑啲就揀桂魚，我地就揀左海沙巴。肉質係偏爽，作為餐入面嘅菜，份量都幾多！入面仲有薯粉，仲有好多酸菜！最鍾意呢度做得多酸少油。另外仲有麻婆豆腐、乾煸四季豆、XO醬海皇炒絲苗。整體味道都唔辣，又唔會太油，好適合香港人。金絲棗蜂蜜黑糖糕，係蜂巢糕嘅質感，黑糖味同蜂蜜都好平衡。打卡仲有涼茶送。不過我地已經食飽飽，下次先試到喇。