影片
更多
2014-08-28
4045 浏览
你話食泰菜、越南菜、星馬菜，多多少少都分辨得出依幾個菜系，若然你問我泰東北菜喺點，小弟就真喺搭唔上嘴 。事後翻睇維基百科，有咁嘅描述：「泰國菜以酸、辣、鹹、甜、苦五味的平衡為特點，分泰北菜、泰東北菜、泰中菜、泰南菜4大菜系，反映泰國四方不同的地理和文化，各地使用的食材往往跟鄰近國家的一樣。」多謝老友為我哋揀選主打泰東北菜嘅「18巷泰國餐廳」開餐，有機會讓小弟認識及品嚐一下依個再細分出嚟嘅泰菜特色 。再從維基百科引用多少少資料，雖然都只喺好表面，知多啲無妨： 泰北菜，屬山區，深受緬甸菜嘅影響； 泰東北菜，與寮國菜相似，善用青檸汁，米飯則愛食糯米飯； 泰中菜，以首都曼谷為中心，魚米之鄉，蔬菜水果茂盛，食料較新鮮，調料通常較甜； 泰南菜，鄰近馬來西亞菜，多取及其食料，多用椰奶、鮮黃薑，調味較濃。走進18巷，環境極富泰國風情，唔喺滿天神佛嗰種，而喺透過牆畫、雕刻、擺設嚟營造，但又帶點摩登，例如天花嘅吊燈，型格而不俗氣，再配合柔和嘅燈光，坐晌舒適嘅梳化椅，一派悠然自得 。就連餐具都精緻玩味過人，絕對踢走老套泰菜館格局。雖然一切由朋友發辦，但都會影低餐牌作個人紀錄，方便下次再嚟食飯時
再從維基百科引用多少少資料，雖然都只喺好表面，知多啲無妨：泰北菜，屬山區，深受緬甸菜嘅影響；
泰東北菜，與寮國菜相似，善用青檸汁，米飯則愛食糯米飯；
泰中菜，以首都曼谷為中心，魚米之鄉，蔬菜水果茂盛，食料較新鮮，調料通常較甜；
泰南菜，鄰近馬來西亞菜，多取及其食料，多用椰奶、鮮黃薑，調味較濃。
走進18巷，環境極富泰國風情，唔喺滿天神佛嗰種，而喺透過牆畫、雕刻、擺設嚟營造，但又帶點摩登，例如天花嘅吊燈，型格而不俗氣，再配合柔和嘅燈光，坐晌舒適嘅梳化椅，一派悠然自得 。
就連餐具都精緻玩味過人，絕對踢走老套泰菜館格局。
雖然一切由朋友發辦，但都會影低餐牌作個人紀錄，方便下次再嚟食飯時有多一點事前準備。菜式由湯品、地道小食、沙律、海鮮、咖喱、肉類、蔬菜、素食、飯麵、甜品分為10大類，選擇近百款，菜式旁標明「廚師推介」、「泰東北部特色菜」及「辣度」以作參考。
此外，餐牌尾印有餐酒、汽水啤酒、特色凍飲、特色熱飲等等，嚟到咁富特色嘅菜館，就梗喺揀啲有特色嘅飲品啦。
泰國椰青 $39 椰青雪得夠冰凍，試咗一、兩啖，椰青入口冰涼送爽，清甜舒暢，晌炎夏的確消暑佳品。
椰青特飲 $38 非常特別嘅特飲，實質喺椰青沙冰，飲落超涼快，老友猛讚話正，搞到我都想點一個。
椰子特飲 $35跟杯普普通通嘅鮮椰汁無咩分別，唔明「特飲」在邊處 。
木瓜奶昔 $38 早前去新加坡，朝朝晌啲熟食大排檔整番杯大果汁，鮮榨木瓜汁喺其中之一，所以就揀杯木瓜奶昔， 木瓜味味道明確，質感奶滑，確實唔錯。
泰式南薑茶 $38朋友喜歡熱飲，所以就點咗泰式南薑茶，南薑茶以壺上，茶色清透，但朋友話只有好淡嘅薑味，跟期望有啲落差。就算飲到最後，南薑應已浸透，但薑味亦未見好突出 。
泰東北冬蔭石班清湯 $68 湯品除咗常見嘅冬蔭功之外，仲有一款名為泰東北冬蔭清湯，可揀配石班（$68）定雞肉（$60），好想知泰東北嘅冬蔭喺點？以一個小鑊盛上，湯色較貫見嘅冬蔭功清，唔會一片紅噹噹，但入口依然挺辣，怪不乎餐牌標佢兩隻辣椒辣度，皆因用唔少乾辣椒及香料熬煮，相反就無加椰奶，質感相對較薄；配料仲有草菇、蕃茄等等，酸辣醒神，一鍋仲可以分到約6碗份量，都算抵飲，不過石班肉無想像中滑 ，要扣點分。
泰東北特色NHEAM炸豬軟骨 $108 晌地道小食一欄，一共有13款選擇，其中3款唔止喺廚師推介，仲喺泰東北部特色菜，包括：灰燒豬頸肉（$78）、泰式燒牛扒（$178）及炸豬軟骨（$108），以最後者較特別。每份炸豬軟骨會配有生菜、洋蔥粒、薑粒、花生、辣椒仔、青檸粒，好簡單以生菜包住所有材料嚟食，味道複雜，有酸有辣，有鹹有鮮，實在過癮 。
泰東北燒牛扒青木瓜沙律配糯米飯 $168 沙律類一樣有好多款式，超過10款，見咁多人讚依個泰東北燒牛扒青木瓜沙律，加上又喺廚師推介，成為沙律首選。原來燒牛扒及青木瓜沙律喺分開放，燒牛扒做到半生熟，色澤粉嫩，腍滑好食，難得一碟有咁大份量，抵呀 ；而青木瓜沙律清新爽脆，叫人食得酸甜開胃，辣度又啱啱好；至於個糯米飯最別出心裁喺以個迷你竹籮載住，侍應話喺當地人特色，仲要用手拎嚟食，顧及公眾衛生就當然用番羹同叉啦，其實個飯黏黏糯糯，夾啲青木瓜食又幾得意喎 。
香炸虎蝦配酸子汁 $218 海鮮菜式個價格差距比較大（$88-$360），而依個虎蝦就屬中等價位，同屬廚師推介菜式。一客3隻泰國虎蝦開邊香炸，再淋上個酸子汁，蝦肉爽彈鮮甜，自家製酸子汁酸香溫和，隱約中滲出絲絲辣意，獨特具層次，頗有風味 。
泰式香草燒魚 $188 另一款海鮮菜式亦喺唔太貴嘅燒魚，點明喺泰東北部特色菜，食到尾就見到肚內放有好多南薑、香茅、金不換……等等香料一齊燒，故此，上枱時香草味四散，寧捨吸引。魚肉燒得啱啱好，肉質鮮味嫩滑，唧啲青檸汁，再蘸自家製辣汁，魚鮮味更突出 。
蒜香炒毛茄 $78近年啲人都好興食毛茄（或叫秋葵 / 羊角豆），原因都喺有益健康，小弟就無乜研究，不過，聽朋友講就可預防大腸癌、鈣含量高、保護胃壁等等。毛茄外層口感爽爽哋，內裡則有啲滑滑潺潺，以蒜蓉清炒，簡單不過，重點都喺想食得有益 。
鮮蝦炒金邊粉 $88 飯麵類別有11款，應該唔難搵啱你心水嘅。金邊粉平時都比較少食，而眼前碟金邊粉炒得唔錯，酸酸甜甜幾惹味，粉條無過腍，撈勻銀芽多份爽口，不過，旁邊啲辣粉撈少少可以嘞，因為都幾辣吓，最有心思喺粉條有少少脆蝦乾，令個金邊粉口感多層次幾分，而鲜蝦幾彈牙，整體好味。
泰式千層糕 $40 食完以上菜式大家都非常飽，一客泰式千層糕就為今餐泰東北菜作結，千層糕煙韌有咬口但唔黏牙，滲出椰汁及斑蘭清香，味道自然。
雖然，仍未能太懂得細分唔同區域嘅泰國菜系，但喺，每道菜都令人食得滋味，撇除一啲相對貴價嘅海鮮菜式，大抵都喺定價實惠，尤其以銅鑼灣地段而言，所以，值得再嚟回味嘅泰菜館！
张贴
