卿記工房

营业中

休息中

之前睇過有人介紹呢間炸雞髀，話佢好好食！今日特登過嚟堅尼地城試吓，間舖頭喺斜坡上面，由地鐵站行上去，都幾係嘢！終於去到舖頭，發現呢間舖頭好細，只提供外賣，老闆一個人一腳踢，但係睇得出佢好用心製作，真係要支持一下年青人！由於係生炸嘅關係，嗌咗之後都要等10分鐘先有得食，想食好嘢，冇辦法！最後等咗10分鐘，最後見到老細落啲椒鹽落雞髀度，之後就遞俾我！終於有得食啦！真係好熱！簡直冇辦法可以食，要攤凍一陣！先講吓啲雞肉，由於係生炸嘅關係，真係食到好多肉汁，一滴滴滴落去，而且個雞皮好脆，佢係用好港式嘅醃料去醃呢隻雞髀，係得食得返細個嘅雞髀味道，完全冇落其他辣粉同孜然粉！食得出港式嘅味道！我絕對可以咁講，佢真係香港島世一雞髀！大家快啲嚟幫襯啦！

之前聽日講話蒲飛路開左間卿記工房，個炸髀好味道，今日揸車經開就過黎買黎試下。因為佢標榜生炸，所以我預先早十分鐘打定去落order，去到唔駛等好耐就有得拎，免得抄牌。一拎上手果然新鮮熱辣，雖然望落去就冇想像中咁大隻，但外皮炸到金黃色，證明佢地啲油唔會好耐都唔換，即刻忍唔住即刻攞出黎食。一咬落去，個雞皮係炸到好脆，入面啲肉好嫩好多汁，冇乜雪藏味，啲椒鹽同五香粉醃得好入味，幾好！既然一場黎到，冇理由淨係買雞髀就算架，所以再買埋佢個燒賣同腸粉返屋企食。呢度嘅燒賣$10 6粒，雖然唔係夜市嗰啲$20 四粒咁大粒咁抵食 😆😆，卿記亦都唔係重點賣辣椒油，但以$10 6粒黎講，佢對得住個價錢嘅，燒賣亦唔會一咬落去就一pat粉咁又或者散開曬，都食到魚肉嘅味道，同埋佢個辣椒油又真係幾喜出望外喎，有咸香亦唔會太辣，我食得出嘅入面有炸蒜同蝦乾咁，所以特別香，不過個辣汁就唔太掛得住喺啲燒賣上面，感覺上兩者好似分開左咁。最後個混醬腸粉都唔錯，腸粉有米䊢嘅香味，又唔會好死實實咁，混醬足夠，係外賣返到屋企先食凍左少少，如果唔係應該會再好味啲。總括黎講，佢個炸髀係值得突登黎食嘅，其他都係水準之作，下次黎再試埋佢個炸雞粒

一直喺士美菲路街市嘅豆腐店買開豆腐，機緣巧合之下，知道店主喺附近新開左一間小食店，咁就梗係要來幫襯吓啦😊星期日嚟到點知唔好彩摸門釘，趁星期二同老公放假我哋再過嚟，因為已經食咗lunch，所以我哋只係買咗魚蛋同炸髀。魚蛋有分爽彈魚蛋同陳皮魚蛋兩種，我哋揀咗爽彈魚蛋咖喱汁，果然好爽彈，咖喱汁亦唔會太辣，店主話咖喱汁係自家炒嘅，好啱我嘅口味。炸脾亦都好好味，即叫即炸，雞皮炸到脆卜卜，雞肉亦都好嫰滑多汁，正👍🏻👍🏻👍🏻以後去開附近嘅烘焙店學習烘焙時一定會再幫襯😋😋😋