蜀客 (已結業)

中午12點嚟靜靜哋，坐得好舒服，雖然走高檔路線，裝修和餐桌佈置都係冇乜特別。先開一壺茶，剩係得香片，冇其他可以揀。硬食一小碟酸醋蘿蔔，成為$25，又冇乜特別，其實呢啲咁傳統港式酒樓嘅硬食做法，今時今日應該改變下⋯⋯Menu都幾厚，好多款式，有辣有唔辣，兩個人點左六碟菜，經理都已經俾咗個signal我話夠囉。 上菜好似變魔術咁，轉個頭已經係咁一碟一碟係咁上，失望嘅係第一碟先上咗亁鍋茶樹菇，而唔係另外兩碟前菜，不過茶樹菇炒得又靚又香，油係多咗少少，不過我都覺得好好食。前菜方面，鮮椒海鮮滙比較突出，面頭嘅鮮椒切得好幼細，汁調校得好好，冇蓋過海鮮嘅鮮味，係一個幾出色嘅冷盤前菜。 主菜方面，每樣都做得甚有水準，可見廚師嘅功架，宮保蝦球炸粉唔會太厚，乳鴿醃得好香，又嫩又脆，炸得好乾身，酸菜鮭魚，肉滑，夠份量，不過湯底偏鹹，所以飲唔到啲湯囉！感覺有啲浪費，走嘅時候經理問到都有同佢哋反映，其實呢度食物大致上對本人來講都比較偏鹹，但係整體上食物真係做得出色。服務都殷勤友善，只不過係上菜上得真係太趕，又想趁熱食，有啲壓迫咁，共坐咗50分鐘就完成咗一頓豐富嘅午餐囉！因為用app book，所以覺得有點兒超值

今日同朋友嚟咗蜀客食飯，地方好寛敞舒適，係放鬆傾計嘅好地方。嘢食方面，食材優質新鮮，廚師手勢都好到家。雖然係川菜，但辣度調整到香港人完全食得到，唔使怕辣。呢個泡海鮮有我最愛嘅帶子、八爪魚及蝦，八爪魚彈牙鮮味，蝦都係鮮甜彈牙，少少辣，一般香港人都食到，還有爽口的西芹片，中和一下。宮保蝦球：大大個蝦球十分彈牙，醬汁非常濃烈又帶少點麻感，好鍾意呢個，十分推介。呢個椒鹽豆腐材料簡單，但絕對考功夫，炸得一啲都唔熱氣，外脆內滑，十分抵讚。魚肚伴菜芯，我地當花膠咁食，大大片，仲淆到入晒味，一啲腥味都冇。響螺敦雞湯，真材實料，清甜，有啖啖螺肉，熱熱哋飲落肚最滿足。京蔥蒜牛肉都係比較濃味。鮮蘆荀大棵但嫩，用上湯淆到入味，幾清新。整體感覺都非常好，服務到位，味道一流！值得再黎。