光榮冰室 (教育路)

营业中

休息中

啱啱去食個凍烏冬，啲蟹柳未溶雪我同佢講 未融雪喎叫佢試 分別2個伙記一齊食左條伙記：係喎 未融雪喎之後跟問我想換啲乜嘢？我話換雞翼 佢話唔同價錢唔俾我換明明係佢錯 如果係我，我一定會換比佢唔會再幫襯

—懷舊價早餐 只限星期一至五堂食供應🐷火腿通粉/雪菜肉絲米粉+☕️熱飲($20)🐮沙嗲牛肉麵+🍳煎蛋多士+☕️熱飲($25)正常豐富早餐size唔會因為平咗變成下午茶份量沙嗲牛食唔到鹼水味 都有成十塊 少少筋位 煎蛋9成熟有少少流心蛋汁多士微脆鬆軟有厚度 已經塗上牛油易推開良心餐廳 窮人恩物👍🏻👍🏻———————————————————————光榮冰室元朗教育路44, 46及50號兆明樓地下B號舖

其實我已經食過N咁多次🤭主要係佢餐廳嘅營業時間、食物份量同埋價錢吸引🤓 基本我都係好晏先去食，所以近截單時間，好多野都會賣曬🥹不過我都可以理解，都feel到佢哋啲野食係新鮮嘅👍🏻 👉🏻今次嗌咗個-肉丁麵- (常餐)哇 一岀到嚟見到咁多肉丁，真係好開胃🤩🤩 啲肉汁先係精髓吖🤤 食落去一啖麵一啖掛滿肉汁嘅岀前一丁🥹真係好爽😄個比例真係好重要‼️啲湯啱啱好冚過啲麵，湯嘅濃度加埋啲紅油同肉丁，認真覺得佢好岀色。👉🏻仲有-雪菜肉絲米-(常餐)呢個米粉就不過不失啦😕米粉唔會太淋🧐不過可以讚一讚個雪菜👍🏻，佢同其他餐廳比較，個雪菜唔係霉嘅😏真係新鮮有咬口，好明顯見到菜葉同菜莖🫶🏻仲有份量都唔少👆🏻呢兩個常餐我都嗌咗火腿奄列，蛋睇落唔係嫩嘅，不過都有啲蛋汁喺入面，我就覺得火腿有啲咸，而蛋就冇乜味😕冇錯一次過食三個餐-豆腐火腩飯-（晚餐）呢個餐正常水準啦🫵🏻飯係多嘅，餸都好多🥰食嘅時間唔洗就住就住，唔洗怕食曬啲餸仲有好多飯剩低😳啲汁撈飯又啱啱好。肉係偏肥嘅，如果食野有啲肉太溜🥺🐽今日食咗三個餐，食落一啲都！唔中伏！三個餐加埋都係$155，呢個價錢，呢個鐘數，邊到仲搵到呢啲質數😋侍應💁🏻‍♀️服務態度真係好好

呢幾日又涼涼地好想食煲仔飯💫佢既咸蛋肉餅煲仔飯同埋鹹魚肉餅飯真係超級超級正 額外加$12更可以「連煲拎走」，回家慢慢歎熱辣辣煲仔飯！ 而光榮冰室煲仔飯的飯焦香脆可口，十分惹味。

閒日下午1:30經過，畀門口同個招牌吸引，覺得好簡潔、好有懷舊味道；點知中伏😵我第一次喺餐廳聽到咁多句「唔好意思、唔好意思…」、「對唔住、對唔住…」原來之前電飯煲出事，煮生米，所以點飯餐果啲都要等下一煲飯熟。我咪懶醒叫特餐食公仔麵；點知中伏😵‍💫成個餐唯一可取既係「西班牙奄列」（即係腸仔+茄汁豆）同「丹麥多士」（甜甜地，暖和柔軟的，好過成浸雪味牛油既普通多士）。朝早特登冇飲咖啡，留番個quota，但係果杯熱央又酸又苦到暈，冇奶茶味，個透明膠杯唔慌唔懷舊，花到似久經百年打磨咁😒重點黎喇，我叫左雞中翼公仔麵，因為心諗，一般餐廳炸雞翼好少失手，熱氣就熟氣啦🤨點知一上枱，3件雞翼啲血塊炸完變黑色一撻撻，見到都唔開胃。即管咬落去，酸的😣試第二件，一樣，於是放棄第三件，原封不動。結果是用奄列傍住公仔麵食，求其醫飽個肚就算，成個用餐經驗係「捱」😫

最近放假，每日都發掘緊元朗好味的茶餐廳，今日同家人決定試下光榮冰室。沙嗲牛肉米粉，配火腿奄列，多士，凍朱古力 - 米粉較獨特，沙嗲牛肉的醬汁應該係最後先放上去，咁樣可能先啲湯會唔夠味？事實效果又唔錯喎，沙嗲味香濃。火腿奄列火腿可以多啲，多士牛油亦太少，凍朱古力OK。雞扒蔥油飯，凍奶茶走甜 - 雞扒夠晒大件，配上份量足夠的蔥油十分醒神開胃。凍奶茶茶味一般，而且亦唔記得走甜，呢度要扣分。整體光榮冰室食物方面滿意，至於飲品方面就一般。

之前已聽過佢哋嘅沙爹牛肉煲仔麵不遜於煲仔榮記，咁啱經過元朗見到佢就一定要嚟比拼下啦。1️⃣2️⃣0️⃣5️⃣ 午飯時間🍴雞扒蔥油飯賣相不俗，食落已聞到好香蔥油味，飯粒粒分明，蔥油撈飯啲飯夠靚已經無得輸，雞扒厚身，抵食不過略嫌較硬。🍴沙爹牛肉煲仔麵睇落大份同賣相不錯，不過就見沙爹汁就咁鋪面，而唔係煮上，所以食嘅時候發現味道較淡，公仔麵合格，彈牙唔淋身，係可惜同個沙爹汁分離咗，牛肉ok。飲品叫咗檸蜜同奶茶，正常。總結嚟講，如果想食濃郁沙爹牛肉煲仔麵都係會去返煲仔榮食，光榮嘅蔥油飯反而更有水準。

年初五去元朗食野，諗住食開光榮都無死錯人，所以去食返個lunch。今次試新野，叫咖哩/茄汁頹飯。我叫左個炸髀茄汁炒蛋飯，個茄汁稀到好似鼻涕咁，雖然佢真係有蕃茄，但就完全無里味道。炸雞髀又炸到好黑，味道一般。我仲要見其他檯嘅雞髀都好黑。咖哩果碟我朋友都話真係咖哩粉溝生粉水，又係無調味，好似唔識煮飯嘅人走去煮咁！不過炸豬扒就還好，幾好食。喂，係咪個廚未開工？點解今次可以咁難食？本身無諗過要寫食評，所以無影相，但真係要紀錄低我食剩咁多真係食唔落去嘅第一次。平時食開心浩園餐都無事，以後唔會再食佢個茄汁+咖哩汁，好垃圾。仲有個收銀同個女待應係咁係度嘈出糧計糧d野，好煩，個收銀周圍執野又係度擲野發脾氣，係度同條金毛女嘈交，話要即日出糧，聽足成程，今餐已經難食架啦，仲要睇人鬧交發爛渣，好難受。

光榮冰室食物改名好有趣，今次叫咗個「三萬完蛋飯」，個名背後嘅意思就自己猜想了。簡單啲嚟講，即係鰻魚蛋飯。飯嘅份量都係一如既往嘅多，上面係一塊好大塊嘅蛋，仲有一條唔算細嘅鰻魚，配上木魚絲，同燒汁。非常出奇地厚，蛋嘅質地都嫩滑，唔係啲煎到老曬嘅蛋。鰻魚嘅質地都唔錯，厚肉，彈牙，唔會一夾就散曬，不過味道就唔係咁理想。醬汁比較重口味，偏鹹；魚嘅味道就會腥少少。配飯食都還好，但係就咁食就差啲了。不過整體嚟講唔算太貴，都okay嘅。

首先講下過開呢頭辦事 今日好好彩可以直接入去直接落單等食 唔需要久等 成個感覺就好有舊時冰室的感覺 有氣氛 坐折板凳可能有不舒服 不過真是好有懷舊的感覺 不過唔知發生咩事 阿叔今日落錯單2次 可能佢狀態唔太好 或者阿叔唔係伙計係客串伙計的老闆？不過間阿叔一把年紀就由佢啦 其實價錢算抵食 依家已經好少餐會30幾蚊 價錢抵食 仲可以自由轉麵底 唔需要加錢 街外已經沒呢隻歌仔唱啦 。米粉五香肉丁好足味道 起碼我好鍾意❤️ 一試就知有沒比足料 夠唔夠火候🔥另外我比較鍾意❤️就是 39蚊光榮早餐 仲要係西式早餐 真是好抵 街外都需要二選一 呢度寫出來都是全包 真係唔知道邊度會穩到同價格 難怪咁多人去啦

系旺角個邊翻學既時候就好鐘意食光榮，終於屋企附近都有了，琴日同男朋友去食，叫左個三眼仔茄汁雞扒飯，一向食開咖哩汁既我估唔到茄汁都咁好食，超多番茄，酸酸甜甜好開胃，本身有少少飽，結果都食得曬成碟 ♫.(◕∠◕).♫

光榮冰室有唔少分店，元朗都有一間！買個外賣嚟食，等都好快！叫咗個三眼仔叉燒飯，招牌嘅三隻蛋，真係可以放滿成個外賣盒！上面都有唔少蔥油！蛋係好靚嘅太陽蛋，上面係仲流嘅蛋黃！揭開啲蛋望吓啲叉燒，叉燒嘅份量都唔少！叉燒有肥有瘦，口感唔錯，味道都唔會太鹹！將蔥油、蛋液同叉燒撈埋一齊食，先係最正！每啖都有油香同蛋香，加埋叉燒，口感同味道都非常正。最喜歡嘅係佢嘅汽水，加5蚊可以有個冰底，冰冰凍凍，真係好鬼爽！

今日放假，經過教育路，見未試過元朗間光榮冰室，記起之前九龍灣果間開心浩園啲蛋又令又大，雞扒又香又件，就心郁想試下元朗依間。一入到門口有個侍應呀叔禮貌都可以，咁就嘟安心量體溫入去，見都好似幾多人，心諗冇死啦，見其他人食依個餐啲蛋都令咁我就開心地叫個開心浩園餐，$55都算叫抵食啦。。。點知一黎到就幾失望，完全見唔到太陽蛋，面頭果隻穿左，然後三隻蛋係疊住架，他兩隻明顯煎過左火！！跟住我同個侍應講我覺得可以再整得好啲，啲蛋痴住晒又爛晒，個侍應解釋，話咩啲蛋唔係一水水咁整，定唔知講咩，搵晒藉口！！全場好似得我啲蛋係咁差附上依張相我係食左幾啖先記得影相佢地每個侍應好似有啲禮貌，但錯唔係個個認蔥油夠多既，雞扒都大塊。啲野食係得番少許少許熱度，接近微冷，不過算啦冬天當佢係咁。整體味道一般，觀感麻麻服務態度中等，唔係搵藉口我會比like

荃灣同尖沙咀分店都有去過，今次帶埋兩老去元朗食，份量大之餘亦都勁足料，唔係只係飯多，餸多汁多兩老食到好滿足，店員亦好親切好好禮貌今次食咗公司飯、三眼仔咖哩雞、三鰻完蛋同埋煲仔飯

位於元朗嘅光榮冰室係我近排食早餐嘅首選如果去元朗區嘅話一定要去這裏嘅沙嗲牛肉麵正正常常但係勝在好多牛肉加埋依個辣椒油食完10分醒神 當然未去到晏晝時段如果唔係就會食呢個煲仔生滾沙嗲牛肉麵呢度嘅多士好有誠意好多牛油加埋煎雙蛋簡直係完美嘅早晨加多條腸仔都係加多幾蚊姐 最後最後就梗係唔少得一杯凍奶茶 凍奶茶簡直係一個早餐嘅精神所在 而且依度嘅環境好好全部街坊茶客都係自己友連呢一度嘅夥計都好有禮貌非常殷勤有乜辦法唔會次都嚟食個早餐啦