小肥牛火鍋活魚專門店 (已結業)

今日又到因為interview 既關係，本來朝早interview 但突然改下晝，搞到我天地走。行過見到小肥牛有午市邊爐，見好耐冇打過邊爐一丁友去試。佢做半自助形式，叫一碟肉，蔬菇丸類自助，飲品有汽水、茶、蔗水，仲有雪糕。叫左個豬骨湯底，美國雪花肥牛。60分鐘任食，雖然份量唔多，但係午市岩岩好，食太多肉會好辛苦。湯底不過不失，雪花肥牛都幾香牛味，我冇拎豉油，一樣好食，其實我傾向打邊爐唔點醬食，咁先食到湯底個味，同埋先知d料靚唔靚。肉係ok既4分。自助食材都算多選擇，如果同日本邊爐比一定係日本個隻多菜類揀，呢度得幾款，不過都尚算新鮮，係西生菜有少少紅色野係菜面，代表冇咁新鮮。不過我係鐘意食菜既，我都食左好多。小肥牛有樣野一定必食，就係炸響玲，超新鮮，好脆，放一放湯就食得，我坐底食兩碌。同埋d蔗水真心好飲，我自己一個飲晒成樽，清清地，有蔗味，唔係死甜。總括黎講，雖然單拖打邊爐係kam d ，不過最緊要d野好食，同埋午市環境唔錯，人少少，唔會被人歧視。不過好似得一間分店有午市食，有機會我會再試。畢竟本地自家品牌又有質素既火鍋店，我傾向支持本地特色，所以今次4分。另外，廁所都幾乾淨，好放心放抵

用Open Rice book位，店員服務禮貌。而且有5折優惠，好平又幾好食，19人瘋狂order野食，埋野每人都唔洗$160！低！而且又有刺身同海鮮，平民好食打邊爐！

本太子今次決定返回宮庭附近的火煱店涮bu涮bu。今次來的目的是要品嚐海鮮九重塔滋味。這麼高，精彩了。九重塔要由上面開始逐層食，見阿姐也特別照顧我這枱的。九層塔吃什麼雖然預設了，但可以按自己喜好修改一下，頭兩層就是這個蜆!第三層第四層第五層第六層第七層第八層而最底層的就是海鮮湯，但偏淡，味道不足。要本太子品評的話，這道菜綽頭有餘，但驚喜不足。九重塔外表非凡，但裡頭還是我們吃慣的海鮮，配上近千元售價的話，又覺得並不是心中的佳餚。不過有優惠的，還值得一試的。要選最喜歡一層的話， 扇貝，個人喜好!

同事見到9點後訂枱有5折，拿拿林約埋成班同事一齊去食！同事訂左9:15，去到話未有枱，等左半個鐘先入到去，餓到肚都凹埋，一上到去即刻喪點野食，一來就食左個響鈴，一個字，脆！之後來到2碟牛，第一碟雪花夠，入口溶，第二碟牛味濃，但唔夠溶，之後都係果啲丸呀，滑呀，餃呀，菜呀，正常無特別，坐坐下都坐左2，3個鐘，個個飽到食唔落，埋單每人2百有找，抵玩又抵食！唯一有樣野唔好，就係見到隔離枱偷偷地食煙，雖然間鋪貼哂禁煙，但啲人都唔理，職員又唔敢出聲，唉，好心落樓下食啦，啲人真係無公德心。

不知所謂，侍應強迫叫餐，吾叫餐連午餐肉冬瓜片田雞都無得叫，問多兩句嫌我煩，花膠竹笙清湯好似水加雞粉一樣，完全無味 ！嘢食好耐都未到，叫佢cut單就話啲嘢食到咗！我咁大個都未試過去到一間無服務貿素，難食嘅火鍋！

今日約左朋友係位於太子既小肥牛。太子既分店位於樓上，而且有兩層，仲提供廂房。小肥牛唔係任食而係單點，但火鍋配料相對較新鮮較精！而且仲有招牌活魚刺身！我地先點一楂竹蔗矛根，真材實料又甜又解渴！再嚟一個椒鹽鮮魷做頭盤熱下身，但可惜唔熱唔脆又無提供醋。失望食完頭盤開始打邊爐，我地揀左鴛鴦湯底滿足各位人士。先食個牛柳粒，牛味濃之餘淥過頭都不會口感粗糙。大桶蠔雖然只得5隻，但每隻都有手掌咁大，既鮮又肥美！滿足我這個蠔怪蝦膠又係出色，超級彈牙蝦味又重！好食！菜、四寶丸都新鮮，總算不過不失。韮菜餃皮薄韮菜多！有水準

同朋友試過銅鑼灣分店，因訂座有7折，食過覺得幾抵食，再帶屋企人試太子呢間，但入座不久已開始後悔，個場一full真系嘈到不得了，除左客人~仲有侍應生大聲對話，再加上掟碗碟及落order嘅按鈴鐘聲，整晚根本聽唔到同枱人講野，其實service同食物都算幾好，但可惜真系無心機繼續食，唯有快手食完走人…

今天是一個特別的日子, 闊別差不多二十八年,在一個偶然的機會,讓我們三人又重逢,  話題應由一九八幾年講起. 來到食火鍋,當然少不了牛,但今天你們的牛水準尚欠, 肉色比較暗啞, 好彩在食到一半時,服務員幫我們換了,才可以勉強收貨,否則令我對貴店的食物質素要重新估計. 記得上次蝦滑非常幼滑彈牙,但今次是否改了方式, 不是蝦滑,是蝦肉粒.炸魚皮用了很大塊魚皮去炸,已不是從前的狗棍魚皮, 口感和賣相強差人意,火鍋物的款式亦已少了很多, 令我沒有太多選擇, 其實我們已光顧十數年,當然希望看到貴店不斷提升食物質素和服務水準.希望再來時有大躍進喇!

一星期訂位都冇用，都要等最尾，安排差，比人訂位，又冇位比人，超差。食物再好都冇用，職員冇做嘢，滿訂位可以暫定唔再比人訂，何以嚟度又要客人等1個小時，離譜，太過份，太乞人憎，服務超超超超差

是晚同友人去聚聚, 選了這間拾下拾下吹吹水。 鍋底要左個火焰蟹湯,裡面仲有牛肉粒、冬瓜、貝, 最重要加左花雕酒,都幾特別我地點左本地手切牛、 粟米、響鈴、手打墨魚滑、油麥菜, 還叫左希靈魚刺身。 個刺身都算多, 又夠fresh 。 響鈴初頭食一件都幾脆, 但偏油,要多人才好點呢。 最好味係個蟹籽墨魚滑, 放左馬蹄, 食落爽爽的。 其他都屬一般。 食完埋單, 有生果盤。 橙甜西瓜夠凍又起沙, 西瓜仲比樽華鹽加落去,

第一次食九層塔，聽就聽得多，食就真係第一次，因食這個層一定要人多，否則食品款式不太多樣化。而且這間店舖也是我第二次光顧，第一次是打邊爐，今次是打邊爐加九層塔。這間店舖款式，湯底都很多，嚟得食九層塔，首先介紹一下有什麼海鮮食。沙蜆，花烚公，馬刀貝，鮮元貝，沙巴肉，波士頓龍蝦，什蟹仔，鮑魚，太平洋海螺鍋，這個套餐4人份量的，我們點選了兩個，因10個人，服務員幫我們將鮑魚和元貝都加左兩隻。而且我係開飯訂了條鱆紅魚刺身。條鱆紅魚刺身，夠新鮮，而且份量好充足，鮮甜，如果以優惠價錢訂購，是絕對抵食鱆紅魚的頭尾骨也用椒鹽加工免費處理，炸得很香口，很好食太平洋海螺鍋，螺肉唔多見到，炸魚就很多馬刀貝唔錯夠鮮甜而且都幾大隻，而其它海鮮就沒什麼特別，而且奇怪就是蒸氣鍋，應該有個計時器，而且應該由面層開始食落下層，但這裡不是，夠時間就所有東門都全食得，好似無左九層塔的意義。不知是否時間過久，啲海鮮肉質有點老了點。我想咁多款海鮮最好食都是鮑魚，馬刀貝。沙巴魚，波士頓龍蝦，什蟹仔就有點不太新鮮，啲肉質有點霉的感覺。食完嗰八層之後就是飲湯，個湯普通，可以一碗起兩碗止，沒有什麼衝動再飲多碗，之後我們再加其它食品打邊爐

#Farewell同事#海鮮九層塔 + 火煱早一星期前已致電預訂要間房for 12人, 小肥牛表示最低消費係$3000。到咗食飯當天(星期五晚)，間房算幾大，有一個獨立廁所。食物質素叫左2個海鮮九層塔，再加配料打邊爐。九層搭($998)，每款海鮮整體黎講普普通通，蜆殼類有部分多沙，魚有泥味。反而另外叫嘅配料大部分做得唔錯，鵝肝丸，芝士牛肉丸好味，菜類新鮮，粟米超甜，叫完又叫!服務質素服務員態度好好!做野爽手! 不過結帳嗰陣好彩有check單，計多左$1100 (漏左計open rice訂有7折)，所以記住望望張單。

好久沒有吃過這麼窩心的餐廳🤗原因是首先態度服務出奇的好😜老實現在去的餐廳大多數因爲太過有名氣😏所有導致限時限刻😅態度更加是最好快速做完一場就下一場🙃但這間一來沒有限時😙2來服務員人數絕對能應付大家👍🏻唯一美中不足是要行樓梯😮如果行動不便最好book一樓🤔因為今天二樓未吃飽時也有點吃力🙄食物方面我們點了魚頭窩🐟湯底好鮮甜沒有太多味精🤤因為沒有出現勁口渴情況👍🏻牛肉方面我們點了2款🐂看圖片已經望到是絕對新鮮😋口感是手切會較為煙un彈牙😋牛肉丸入邊有芝士塊😍咬開一半芝士立刻會黏住條舌😜對喜歡芝士的我直情狂食😍蔬菜也超級新鮮乾淨🥗墨魚滑爽口彈牙🦑啤酒也不貴24元一支大日清🍺我們4個人也喝了幾支🍺最意外的係我們book台說了生日飯他們見我們吃完就話送壽包給壽星仔🎂叫我們等15分鐘真係即叫即蒸大大個蓮蓉包熱騰騰真係好正記住記住提大家要用open rice訂位真係全單有7折不特止仲有2支飲品埋單時送真係完全諗不到我們不特止用折頭無黑面又有野送又有壽包還有哩道無收切餅費因為我們自己也有自攜蛋糕真心推薦這些才是待客之道

在 open rice 網上訂座，看到2030入座，有5折即刻要 book 2030 吃飯叫了牛頸脊例牌，響鈴，酒釀鴨舌，娃娃菜，鮮4寶丸，韮菜水餃麻辣拼芫荽皮蛋湯，2枝可樂加1枝百威大啤酒共363元，吃了3小時仲可以看到電視劇其實食物比以前是差了很多，但勝在地點旺，地方大星期日的食客都不是太多，談談情很開心

講到大一班朋友聚會慶祝, 其中一度好去處就係小肥牛. 太子呢間小肥牛不單地點正中, 食物水準唔錯, 又多選擇. 而且佢地又容易BOOK台, 如果唔想坐大廳同人迫, 佢地有房提供(當然有最低消費啦, 不過如果你唔係細食正常應該會過最低消費.)我同我啲朋友由晚上8點食到12點, 全程冇人趕, 好FREE~佢地小食都好有水準架, 雞軟骨炸得好鬆脆又唔算好油. 魚皮就咁食都好正, 佢本身都有啲調味.唔記得影埋佢地個響鈴, 佢地自家製相比係街市買到現成果啲, 小肥牛既響鈴我好欣賞. 佢係我食過最好味既響鈴~佢拎出黎係熱辣辣勁鬆勁脆, 就咁食點酸甜醬係好夾. 攞黎浸湯式又係好正~呢個火焰醉煱, 滾過既湯底都仲有一陣陣既酒味, 聞起黎好香, 個湯底唔會好濃, 里面啲冬瓜吸盡醉湯, 蟹同牛既味道. 食多幾舊冬瓜應該唔會醉既~是日象拔蚌特價, 毫無疑慮即點兩隻, 冇記錯應該係3百蚊左右一隻, 分量不少而且非常新鮮. 其他火煱料如牛呀, 水餃,  蝦/墨魚滑都係水準之上.  大家可以放心叫, 想食咩就點咩. 暫時未搵到唔好食既配料~哈