武館 (已結業)

女友在大角咀晚飯時經過武館，於是就帶我來試。本來都抱住一試嘅心態，但食完真係好味到不得不寫篇食評讚吓呢間用心製作嘅小店！七點鐘已經坐低咗，一路食到十一點幾，食了4個半小時，無20款都有18款刺身，壽司同熱食。每樣食物既新鮮又特別，唔係一般omakase 食到嘅魚！以下係一d必食推介: 金綫魚，虎河豚白子，北海道牡丹蝦，山芋赤身，鮟康魚肝，汁煮金綫魚頭，魚湯烏冬等等。武館最正嘅地方係，大廚武哥上每道菜都不慌不忙，唔似其他食店要趕第二輪生意，等您有足夠時間品嚐，消化，享受，同傾計。我心諗，如果每一樣都趕住比我食，我未必食得晒全部！食咗大半晚都無乜點為d食物影相，因為實在太過享受d食物。但呢一個不得不影，就係虎河豚白子。有別其他白子，質地非常煙韌，味道亦都比較突出。另一推介就係用盡omakase d魚去煲嘅魚湯，非常鮮味，奉勸大家一定要配烏冬，最多飽的話叫武嫂將份量減半，否則會後悔。

做左廿幾年人都未去過大角咀，今次專登過嚟朋友極力推薦嘅武館食Omakase。地點好方便，奧運站一出就到。呢餐飯食咗三個鐘，多過廿道菜，時間控制得好好，全程都怎住有驚喜我同朋友都覺得好享受同非常抵食！舖頭係由武師傅兩公婆打理，武師傅好有性格，堅持唔做fusion嘢，只會做傳統日本菜，從食材嘅多元化及鮮度，食得出武師傅非常有誠意。虎河豚白子我喺香港真係未見過，價錢貴過鱈魚白子好多倍同好食一百倍，竟然包埋係$1200嘅Omakase入面拖羅加埋大葉同紫菜原來係咁好味，將拖羅帶咗去另一個層次唔係日日都有得食嘅活馬糞海膽，鮮甜到呢！鮟魚肝又係另一surprise，真正日本島根嚟，非常濃味軟熟，正過鵝肝時令嘢白魚，加入清酒一齊飲，由佢喺口入面游下游下，過癮咁滿足嘅一餐真係好少喺香港食到，一定會再幫襯及推薦比朋友！

今晚訂了二人座位七時晚飯，這裡都要預先訂位及付訂金的，專門食廚師發辦料理。店內只有一位廚師及一位助手，滿座十位客人，座位滿迫促。食後感1）各款刺身及壽司都很鮮甜新鮮三文魚子海膽壽司飯2）上菜速度太慢，入座後需等待廚師準備食物，直至19:45才正式上菜。每道菜之間的上菜等候時間也很長。3）這裡的廚師發辦大部份食物都是一碟份量、二人分享。但是，食物的比例很少，加上等候時間太長，往往需要等十多分鐘， 才到一口小吃、一片魚生。這樣的等候時間，不是Fine dining那種享受食物，而是時間上的消耗。一口魚子、等待時間10分鐘下一道菜：螢光魷魚，二人份量 上菜時間：21:50總結：每位$1200的廚師發辦，不論食物多鮮味，香港絕對有更多更好的選擇，時間不是這樣花的。這是第一次不享受的經驗。* 期間助手分享，曾有客人食完前菜便離去，感到很奇怪。聽到後很明白那位客人，因為前菜已食了兩個小時。

自從幾個月前幫襯過武館，就決定咗每一季都要嚟食一次，因為食過真係返唔到轉頭。除左性價比極高，師傅本住不時不食嘅理念，所有鮮魚貝都係每日由日本直送，心機滿瀉！每個餐大約有十幾至二十款嘢食，款式次次新奇有驚喜，今次訂埋隻毛蟹，一行四人都非常滿意同抱住個肚走！第一次食加咗大葉嘅大吞拿魚腩，中和返魚嘅油膩感，師傅話係進化版。特別要介紹呢件寒鰤魚腩，比吞拿魚腩更有油香及稀有，超讚！海底鵝肝活生生嘅毛蟹多膏，爆肉鮮甜！另外一提呢到訂位好方便，可以隨時whatsapp老闆娘，如果有特別魚想訂亦可以問返唔返到貨，非常貼心！

Omakase……專程到大角咀武館享受日式料理。餐廳面積细细，只提供十個吧枱位，猶如日本居酒屋設計。是晚仍是聖誕假期，餐廳沒有滿座，包括我們只有一半人客，所以坐得尚算舒服，但如果客滿，相信比較狹窄。由於是厨師發辦，所以統一價$1200/位，不需點菜，只坐着等吃和聊天。歇了一會，以枝豆揭開序幕，接下來的有關東煮、櫻花蝦、深海池魚、金木鯛、牡丹蝦、拖羅、赤貝、帶子、日本蒜頭、海膽魚生飯、日本魚膏、魚湯烏冬、和歌山富有柿……菜式有十幾款，其中幾款魚生名字，我實在記不起了。師傅一邊上菜，一邊把每道菜介紹，然後大家便快快起筷。師傅炮製的每道菜也小巧新鮮好味，可見用心與堅持……特別介紹:牡丹蝦大隻又甜，拖羅肥美，味噌日本蒜頭冇辣蒜味易入口，新鮮的赤貝口感非常好，海膽刺身甜又鮮，最後的魚湯烏冬，連湯喝光，真的想要多一碗，吃得人暖暖飽飽。離開時拉開門，外面冰冰，人煙稀少，仿如置身在日本小街情境。

我老公因為冇主見，所以最愛食omakase ，因為吾駛用腦丫麻🙈，佢目標係試曬全香港嘅omakase 🍙今日又即興黎lee間試下先.......因爲要揸車，所以只可以是旦一個飲酒好多刺身食，我最欣賞個牡丹蝦同拖羅北海道馬糞海膽要加$168lee個魚湯真係冇得輸👍🏻👍🏻👍🏻👍🏻👍🏻講真.....喺我心目中要食好的日本野一定要喺港島區先食到，不過今次lee間我都覺得可以一試的，佢d野係新鮮同埋用心去製作每一道食物，仲有$1200蚊一位食甘叉多野，我覺得好抵....不過今次冇預訂嗰隻香箱蟹真係失望，下次一定要食返！至於我認為有待改善的地方係：上菜時間可以控制得好D ,仲有一d細位可以做得好d，比如洗完手，冇抺手水滴滴甘上菜，吾太好睇同埋坐位吾太舒服，坐成二個幾三個鐘，走的時後個膝頭有d痛！

非常好食樣樣都好新鮮，師傅話每日都有鮮魚到鋪，所以每日只做一輪，比客人慢慢品嚐美食及與其他客人交流。原來真係可以唔使去日本都可以食到果邊既質素絕對好過築地排隊果啲壽司鋪！今次除左好彩仲食到秋刀魚尾啖湯，特別一提另外預訂北海道活香箱蟹，黎到仲識郁，蒸熟左有流心膏，正過大閘蟹多多聲不過食埋呢兩個月就冇！

Friends gathering at Bukan. Very fresh and delicious omakase. Will definitely come again 👍👍😋😋

今日同老公慶祝紀念日，老公帶左我黎大角咀武館食omakase。朋友食過話好正，所以未黎過大角咀既我都決定試下。鋪頭門口好有神秘感，有暖簾遮住，鋪入面只有一張吧枱，同其他客人都有點close。老闆娘早一日whatsapp我地confirm booking同問我地有冇興趣另外毛蟹或者鮑魚，我地就加左一隻北海道蝦夷鮑。秋刀魚刺身真心好好食，好夠肥，當晚最鍾意呢樣食唔到有筋既大拖羅隻鮑魚仲係活既，有得揀刺身定燒，我地飲酒所以揀左燒，正又係肥野，喜知次同埋個肝，加左赤醋既sushi同入口即溶既感覺，一絕成隻手咁大既日本蠔從來冇試過食omakase食到咁飽，總共食左二十樣野，仲要親民價。食過一次返唔到轉頭，所有野都好鮮。亦冇諗過食高級料理但冇個種區緊既感覺，因為師傅解釋食材時亦不時搞爛gag，全場爆笑。多謝老公揀左間咁有水準既餐廳，又一個難忘既晚上。

上網睇到原隻海膽，就比佢吸引左黎武館試下。原來呢到只開夜晚同唔翻枱，所以客人都可以慢慢食傾成晚計。餐廳只有一張bar枱，當晚都full，我地就坐角位談心。個晚既menu有18道菜，比出面份量多，大部分都係時令野。最期待既海膽，好甜同爆肉，仲有海水味自家製漬物壽司飯用左赤醋新鮮北寄貝，放上枱個陣仲識郁呢件吞拿魚血位既醬油漬壽司係其中一樣我最鍾意魚味好重但又冇比醬油搶左，如果唔係咁飽真心想encore魚湯煲左十幾個鐘，用晒我地食過既魚既魚骨去煲，非常濃厚，不過叫埋烏冬真係好飽.....以前只係生食過白粟米，估唔到黃金粟米仲甜過白粟米真心係日本食Omakase都冇咁抵食，多謝師傅開間鋪係大角咀唔使捱貴租先可以收$1200一位咁抵，仲要全日本貨一定會再幫襯

老公預早告知，今年會有一餐好豐富嘅日本Omakase生日飯，期待又期待！終於等到今日了😆店舖細小，全是吧枱，可坐十人。老公好有心思，自己帶咗支超正嘅Sake'一雫入魂'，開瓶費$150，但可以現場order免開瓶費，最低價銭720ml $368.食材新鮮，感覺就好似去咗日本一樣, 最驚喜之處係你預計吾到會食乜嘢，因為要來貨新鮮，先會用作時令食材，所以永遠都係'新鮮美味'.雖然知道今餐都比平時昂貴，但係人一世物一世，點都要試下！今晚真係好開心，因為老公為我精心挑選的美味生日飯😍😍😘😘😘

人生第一次食Omakase, 者係冇menu, 有咩時令野就會連埋個set比我地食呢間武館既食材十分特別, 莫怪我見識少, 當晚數返相都有十八道菜, 而當中最少有三份一之前都未試過餐廳得十個位, 好有日本橫街窄巷小鋪既氣氛! 師傅亦周時搞爛gag, 成餐飯都全場充滿笑聲有驚喜既前菜, 豆腐有枝豆味, 蝦有南瓜味又出奇地夾金線魚深海池魚就係為左呢隻青森活紫海膽黎食飯睇住師傅即開, 好甘甜, 平時出面用板膽真係冇得比日本蠔, 唔太 creamy大拖羅, 入口即溶日本生果洋蔥櫻花蝦, 可惜我都係接受唔到洋蔥味赤鯥壽司, 呢個好特別, 好重油份, 有點似 kinki赤身醬油壽司福岡華味烏雞皮, 燒到冇晒油送酒好正用成晚既魚骨煲左好多個鐘既魚湯烏冬沖繩白粟米, 超甜生食都冇草青味食左三個半鐘, 超級飽同滿足飲埋野埋單一位$1300, 以咁新鮮既日本食材同份量真係物超所值

入到舖內有深宵食堂感，舖內只有酒水牌，沒有菜牌，由廚師發，視乎當天那款食材是最好，今次食了很多，蠔好大隻，入口很鮮甜，拖羅肥厚，口感很好正，拖羅手卷好邪惡，好好味，海膽壽司好鮮，三文魚額肉好爽，平時抗拒食魚的我，今次嚐到的各式魚生實太新鮮，没有一般腥味，有鯛魚，秋刀魚，飛魚，油甘魚等，廚師細心調制每一道菜，使食客可細意品嚐及一食難忘

第一次寫食評, 因為真心覺得好好食, 好想去支持小店!!話說朋友生日, 曾經同佢喺日本食過間, 邊食邊同師父傾計既壽司鋪, 所以特別去搵番依類型既餐廳。有次喺fb見到武館既資料, 知道佢地只做omakase 廚師發板, 全晚唔番枱, 睇相見到d刺身好唔錯, 而且有原個海膽上( 香港唔多見, 個朋友又鍾意食) 就決定去試下。 首先我要讚一讚老闆娘, 因為我訂左位之後,  就whatsapp又問食材, 又想食牛又同佢講話要自己帶牛黎, 10個煩, 但老闆娘都好好人, 有問必答, 讚!!!!廢話唔講, 睇相好過。仲有多隻魚既壽司, 魚湯烏冬仲有密瓜架仲冇位up相啦😰😰😰😰個魚湯又係必飲唔加野都飽到暈左最正既係我地8位客人係互不相識傾下食下飲下就打成一片師父都邊整野食邊咁我地飲last仲開左私伙whisky n 燒酎!!!( 拿!! 我有理由相信個晚係大家真係超開心所以會咁~ 我地食到2am....!!!! 所以咪入去就叫師父拎私伙出黎😛not a must~)依餐真係好得~~~😋多謝武哥安排🙇

睇報紙講過呢間武館，有成隻既活海膽食，本身又鍾意食日本野，就 book 左位黎試。我地六點半就到左，一入去見到師傅拆緊箱，原來所有食材都係當日六點先由日本運到，勁新鮮。全部都係成條魚即劏，所以每道菜上之前都需時。不過食 Omakase 就係咁先夠風味。一邊等食一邊飲下沖繩 Orion 啤，仲係用凍杯出，好有 heart。當晚食左十幾樣野，有沙律，魚生有金目鯛，池魚，深海池魚，大拖羅，牡丹蝦，原隻海膽，岩蠔，喜知次等等，之後仲有好幾件壽司，拖羅手卷，最後有個魚湯係用晒成晚既魚骨煮出黎，好濃好正。樣樣野都好新鮮好好食，最深刻係個喜知次。師傅燒過個魚既皮，嘩，D 油即刻流晒出黎，勁香勁濃味。仲要連條魚都有出世紙，好堅環境方面就有少少迫，當晚坐滿 10 位，去廁所要其他人讓一讓先得，不過都唔大問題。最有趣係原來呢間鋪好多客都會由唔識變到識，一齊飲酒食野就會傾起計上黎，好有日本小店既感覺。埋單野食一個人一千鬆 D，啤酒四十幾蚊一大杯，我問師傅有冇計少，咁既價錢都可以食到咁多日本魚生仲要即日直送。想唔再黎食都唔得啦。