稻香.茶居 (新九龍廣場)

营业中

休息中

叫咗蒸頭腩全部比哂魚鰭，一D肉都冇，叫侍應，佢同我講係咁㗎啦, 頭腩吖嘛，咪有鰭囉，嘩，唔怪得D人上哂大陸啦。另外，問侍應比D蠔油，竟然話冇，一間中式酒樓冇蠔油，其實用咩嘢煮餸呢？

今午在一間茶居品嚐了午餐中的「躉腩籠仔蒸陳村粉」，這道料理真是令人回味無窮。魚腩和魚鰭的份量足足有八両，還有這條肉絲，絕對不吝嗇於食材。躉腩的膠質豐富，入口即化，散發出誘人的魚香，再搭配上蔥花的點綴，令人垂涎欲滴。更令人驚喜的是，荷葉在蒸籠墊底，為放在籠仔中層的陳村粉注入了獨特的香味，讓陳村粉上下吸收了兩種風味，呈現出豐富的層次感。這道「陳村粉」絕對值得推薦給喜歡品嚐蒸魚美食的朋友們一試。無論口感還是風味，都是絕佳的享受。注意：等候時間比較耐，足足呆了33分鐘；記得吩咐傳菜員姐姐不要加豉油，會影響整道美食的口感。

是但入左一間茶樓，冇睇到後面果間係咪都係茶樓，其實呢間地方睇落幾大，好可惜，人手不足，同埋唔係幾中意佢設計，要自己禁煲水，咁我諗同外賣係屋企食好似冇分別App落單是好的，方便少少🤏但食物質素都一般，叫左5碟，大約$170/兩位種類好少未必再去呢間

晚飯時叫咗3碟餸,當中蒸魚同肉都到咗,但係個菜催咗3次都唔到! 其實已經好難搵到人催,搵到一個阿姐都只係離遠見到我聽我講差一碟菜,然後佢撳個機催就算! 佢根本冇走嚟問過我差咗邊碟菜! 到我飯都食完,都以經嬲到爆就索性叫佢cancel碟菜就算啦. 因為我明知阿姐唔會走埋嚟,我就行到佢面前講. 我都未講完,阿姐就好悔氣問我差咗邊碟"麵"! 我同佢講唔係麵,係菜! 阿姐黑住面話"我幫唔到你㗎喎,你自己同出面收銀講啦!" 對唔住都冇句仲好似係我嘅錯! 人生中未試過咁惡劣嘅服務態度!

位於大角咀新九龍廣場，係疫情期間重新裝修，枱與枱距離有空間，不會太逼。今日點了個午市套餐，有乳鴿二隻，蟹子蛋白炒飯，炒飯粒粒分明，不算肥膩，味道不錯。乳鴿較咸，炸得過火，較鞋。另外有雞絲粉皮，粉皮微暖，加上芝麻醬，味道清新，時菜三星球及燒買不過不失。合格。

籠仔「金蒜艇皇蒸陳村粉」單單是送餐上枱的黃金一刻，已經令你垂涎三尺。籠仔直徑有10吋，海鮮下的陳村粉本身就有一種獨特的口感，蒸製後更加彈牙，且不沾粘，加上籠底的荷葉清香，再加埋鋪在那陳村粉面上海鮮的甜美，上上下下配搭出的味道，真的讓人一口接一口地吃下去。這度午市特式美點，配搭的海鮮不吝嗇且是包羅萬有：帶子丶海蝦丶蟹柳丶珊瑚蚌丶鮮魷丶北寄貝等，豐富程度彷如吃了一碟火煱小拼盆。那二両金蒜及葱花點綴了整體效果，蒜香味令整籠海鮮之鮮甜度一再提升，份量也怡到好處，食到已不能分出那才是點心的主角。另外，茶樓的裝潢也非常精美，獨立自動化水機自己控制份量及水溫，用餐時不受服務員打擾，營造出舒適的用餐氛圍，讓食客亨有更加愉悅更加私隱的時光。

攞完飛但係冇職員去派位俾我哋嘅要我哋自己入去霸位但係好多位食完呢啲都冇職員去收枱所以等咗好耐啲嘢食又比其他稻香難食啲嘢食都冇味嘅 個叉燒腸呢入邊每一舊腸粉係得一粒仔叉燒食物嘅種類又少連叉燒酥/牛仔骨都冇又要收+1又要收茶位但係完全零服務可言

接待處幾位阿姐黑口黑面，無禮貌態度差，有幾個客係門口已經同佢哋嘈咗幾句，好心培訓吓，坐低等咗一個鐘先上雞煲 ，9:30開始食11點關燈 ，即係只係食咗個半鐘，食牛涮鍋90分鐘仲好過佢，好彩叫咗五六碟火鍋料唔太多唔係一定食唔切，想叫多幾碟都放棄咗，即係倒自己米賺少咗。醬料區仲搞笑，好似影緊麥兜劇場，要蒜蓉冇蒜蓉，要辣椒冇辣椒，最緊要嘅醬油碟都冇，見到幾個客一路行一路鬧，結果要自己打開個櫃先攞到醬油碟。一句講晒，免費都唔會再幫襯。

稻香酒樓我哋都算成日去，自從冇咗好多間明星海鮮酒家，依家香港最大型嘅兩個集團，就得返美心，同埋稻香，屋企人比較鍾意去稻香，因為佢有得自己煲熱水，佢哋話飲茶最緊要夠熱喎。今晚我哋就去咗大角咀新九龍廣場，稻香.茶居食晚飯。.🍚鮑魚冬瓜瑤柱燉湯首先來一人一盎燉湯先，可以配冬瓜瑤柱，或者松茸菇，都係$28一盎，講真，自己買材料煲都唔得啦，而且佢個湯真係真材實料，好夠味。.🍚清蒸松葉蟹叫咗兩隻松葉蟹，堂食，8:30之前都係$138一斤，兩大隻都係五斤幾，蟹肉非常新鮮，一疏疏，蟹膏非常鮮甜濃郁，睇住佢啱啱開箱，夠晒新鮮。.🍚龍躉兩味 + 半隻沙礓雞炒龍躉片非常有鑊氣，龍躉腩亦都蒸得啱啱好，半隻沙礓雞就好普通，合格。.🍚豉椒炒蜆蜆肉份量多，炒得好夠鑊氣，豉椒汁唔算太鹹，大家都好滿意嘅一個小菜。.總括然而，作為一間集團式嘅酒樓，食物質素都算控制得咁上下，一家人嚟食飯，會係一個唔錯嘅地方。

來香港第六年了，竟然第一次吃稻香的早茶，本以為連鎖質量會普通，沒想到竟然還挺好吃，櫻花蝦腸粉，裡面的油炸鬼好酥脆，流心馬拉糕小雞胃喜歡！總體點心素質都到位，唯有抄手不夠熱，糯米卷一般好似速凍的雪櫃產品

🐮山竹牛肉球 (中)呢款點心我哋每次都會嗌牛肉質地超級綿超級軟稔加入馬蹄同埋芹菜又增加翻啲爽脆嘅口感特別一提係我哋無加喼汁會食到啲陳皮味道🥟潮州蒸粉果 (中)粉果皮比平時食到嘅厚 無咩味道口感軟糯我個人就偏好比較煙韌嗰種。內餡唔算飽滿但還可以 有豬肉餡沙葛馬蹄肉碎花生同埋芹菜花生大大粒肥嘟嘟食到濃濃嘅芹菜香味 唔會過份油膩🏠家鄉鹹水角 (中)外皮非常出色外層脆卜卜內裏就煙韌軟糯🥢香煎菜肉包 (大)唔單單賣相超級似生煎包就連內餡都似麵包皮煙韌有咬口底部就煎到金黃色香脆香脆裏面嘅餡料剁到好碎口感完全係蓉食到鮮香肥嫩嘅味道🐽鬆軟叉燒包 (中)包體真係名副其實嘅鬆軟！顏色雪白口感蓬鬆軟綿綿裡面嘅叉燒餡調味偏甜有唔少嘅肥豬肉🥄功夫小籠包 (大)外皮夠薄都比較容易穿勝在湯汁好多而且肉餡都幾香🇭🇰懷舊混醬豬腸粉 (大)腸粉比想像中更加滑捋捋！雪白嫩滑嘅腸粉皮配搭麻醬甜醬同埋豉油懷舊簡單得嚟又好味🍚風爪排骨飯 (特)份量都唔少 我哋三個人每人不到幾啖醬汁調得啱啱好 甜甜鹹鹹鳳爪軟糯燜得好入味質素同平時食到嘅差唔多

本身唸住食另一間小店，但冇堂食，經過見到稻香就入左黎喇，叫左5個點心，大力推介係櫻花蝦蘿蔔糕，夠熱夠脆夠味道 同埋欣賞呢間酒樓吾會等好耐都未上哂點心，啲職員都吾會叫好耐都冇人應

今日去咗公司附近飲下午茶，其實我都係一個茶精，好鐘意食樓樓點心、嘆返幾杯茶～連鎖酒樓嘅點心好多都好食，今日叫咗：蝦餃、蝦腸：蝦好大粒，爽口彈牙山竹牛肉球：最鍾意反而係佢塊腐皮叉燒酥：外面夠晒酥脆入面都好多餡胡椒豬肚：唔夠辣因為我覺得多啲胡椒粉好食啲，個碗好大但係豬肚唔多每人只係食得少少講開又講，原來而家啲茶都係自己沖，侍應俾個茶包我哋，隔離有部水車，放個水壺上去就自動加水，自動煲水，好方便，不過部車都幾大，侍應就有多啲時間

好耐之前黎呢到食過晚飯，印象中都不過不失嘅，但今次食完後應該唔會再有下次。整體都十分之差，是日酒樓已經無咩人，但落左單30分鐘都未有上菜，催完一輪先黎一碟，跟住一碟餸送飯又再等多幾個字，再三催先上得哂🥲但啲餸都好唔掂。花膠豆腐-唔提味道，只係講花膠，唔知點解會苦的。蜜桃骨-omg, 啲骨好似係炸完好耐先用汁炒番，粉多之餘完全唔香/脆，一pat粉，好似隔左夜叮番熱佢咁，啲肉好‘林’，好似‘霉’咁。得啲罐頭蜜桃好食😡蒸白鱔-無味，唔識評論。魚香茄子煲-最正常的了炒豆苗-老左啲，但都算係咁啦整體真係好伏，可能呢間專注做打邊爐（打邊爐到時到候8:30好多人排隊）同埋套餐掛，好奇怪地我地點嘅餸碟碟都好靚樣好似好好食，個個原本好開心咁夾落去，點知味道同質地都好唔掂。如果可以比負分真係想比負佢啊🙈

完全中伏！就算全香港茶樓執笠，剩返稻香都唔會再嚟食！完全中伏！服務態度超級超級超級無敵差！個個都黑口黑面！超級冇禮貌！價錢超級唔合理！裝修之後改咗個名以為升咗level！點知仲差過以前！外面街邊的點心都好食過稻香點心！簡直不知所謂！免費入去食都唔好再食！入去食簡直就係受氣！奉勸各位食客入嚟呢間大角咀稻香茶居食之前，睇咗食評之後，再考慮下入唔入去食。如果唔係隔離嘅名苑要等十幾張枱，我都唔會逼住食稻香！超級無敵失望！