萍姐美食 (已搬遷) 新店位置

今日我來介紹一家位於長沙灣的串燒店，食萍姐已經係我同一班同學畢業啱啱出黎做野就食到而家既串燒，大大話話都食左差唔多十四年喇，食過附近其他串燒，唔係燒定有人叫就翻燒，就係醃得唔入味，或者係入貨整定果隻垃圾串燒。而萍姐呢度醃得入味，冇雪味，全部自己人手串，而調味經過咁耐時間既意見洗禮已經冇起初咁鹹，明爐燒串燒燒得剛剛好，一般唔會太燶唔會生。呢度有各式串燒、韮菜、娃娃菜呢D係做串燒既基本啦，燒起唔會乾仲好多汁。海鮮如果新鮮，實在係冇理由出事，燒生蠔係啱啱好熟，唔會乾晒水，隻蠔多汁又飽滿又Creamy，扇貝用黎燒最易出事就係燒到韌，但老闆真係好有心機燒，冇一次黎食係唔掂嘅。燒羊架唔騷多汁啱啱好，仲冇乜羊騷味串燒安格斯牛柳粒係呢度皇牌雙雄之一、咁厚肉已經喺串燒界黎講係甚少有，厚肉多汁牛味濃更加係難能可貴，黎得絕對要食。還有值得一提既係雞髀皇扒，另一皇牌雙雄呀，燒出黎皮脆肉嫩多汁香口，自己一個宵夜可以叫老闆免剪，肉汁鎖得仲好，又係另一種享受，而剪開亦方便一口口慢慢食，都係點都要叫。combo set 係雞髀皇扒加串燒安格斯牛柳，搭串燒娃娃菜消消滯，再用條藍妹作結下下火。一人套餐就係咁推介😆多人開餐

係長沙灣附近搵食，因為已經過左夜晚9點，疫情關係無堂食，只可搵外賣，bookmark左呢間就去試下。叫左3串，豬頸肉，雞翼，同豆卜，小辣，70個大洋。先打電話落單，去到拎得。返到屋企一開盒，外觀，首先，佢無水氣，即係串燒算乾身，呢點好重要，好多串燒舖整嘅好快有水氣，過左少少時間食就好似變左就咁煎熟嘅肉而唔係串燒咁，令到串燒無左外脆內軟嘅口感。作為一間外賣店，我唔知佢實質整法係點，但佢保持到串燒經過外賣時間洗禮嘅食感，係抵讚。佢全部都用左大量調味粉去調味，孜然粉，辣椒粉等，唔係用蜜糖同醬汁嘅整法，我諗呢個係其中一個保持脆身嘅做法，邊種調味合乎口味就見仁見智。我有用氣炸鍋翻熱左幾分鐘。-雞翼，仲係外脆內軟，有肉汁，好味。-豬頸肉，嗱，呢個呢我就覺得啲肉有少少唔太新鮮嘅味，無左豬頸肉應有嘅油香，但都係外脆內軟。-豆卜，超脆，又係不得了。佢全部調味都剛剛好，無過咸，不過小辣就一啲都唔辣。呢間係絕對可以encore。

間野比較隔涉😂唔係住附近相信都唔會黎食～離遠已經見到叔叔大汗搭細汗咁燒串燒！然後對住條馬路嘆真係必有一番風味🔥夏天真係預會好熱好熱🥵！/車仔麵 連兩餸 $30- 不過不失吧～無咩特別，但用黎墊一墊底係唔錯既😂，唔洗一味食串燒/雞肉腸 $14@2豆卜 $10魷魚鬚 $24- 3串入面最有驚喜就係豆卜😍有少少汁得黎連埋啲調味粉一齊食真係好過癮～又唔會太乾/🌟🌟必食～雞髀扒皇🌟🌟 $28- 燒得岩岩好🤤唔會過老，肉汁保留到之餘塊雞皮都仲係脆架🤤!!（睇相你就feel到🤎）仲好細心切開～啖啖肉唔洗lur骨😋睇住相打字真係打到好想再ENCORE...😫

今日收工已經好夜，已經係凌晨嘅時分，但基於肚仔真係好餓好餓，餓到一個點！但又唔想食麥當勞嘅時候，我哋選擇咗去食萍姐，因為佢都係長沙灣一間唯一未收，又有各色各款嘅小食！今次我食咗佢嘅酸辣粉，我叫咗一個小辣，不過都仲係好辣，老闆娘見到都有同我講下次可以主動要求微辣，可見佢都好留意客人嘅需要，呢個值得讚！跟住我哋仲叫咗雞軟骨，豬頸肉，茄子，雞中翼，同埋私話力腸，仲有台灣腸，其實整體上都幾好味，好香口，不過有部份就可能調味落得唔係太平均，就有啲偏鹹

同事介紹既串燒店，講到好吸引，即刻把握最後喺長沙灣既日子去試下好唔好食🤙，雖然環境的確會差啲，但喺街邊坐喺度食的確別有一番風味。—————————————————————因為朋友唔食得辣，所以叫小辣，但發覺真係無咩辣既感覺😂#紐西蘭羊架 💰33 （一件）❤️‼️必叫‼️肉質食落好嫩，唔會過熟岩岩好🤙#雞肶皇扒 💰28 ❤️大大塊雞扒，雞皮燒得好香脆，雞肉唔會好「鞋」，職員仲會幫你剪開佢，好貼心。#雞中翼 💰26（四隻）❤️燒雞翼，我中意食🤤都係燒到肉嫩爆汁，如果加啲蜜糖會更正。#泰式豬頸肉 💰19❤️對呢個印象最深刻，咬落好juicy ，超好味！#原條蒜香茄子 💰26❤️茄子好軟，蒜香味好夠，只係有啲邊邊位燒得未夠熟。#燒韭菜 💰13❤️平時唔食韭菜既我，食串燒都一定要食。#雞軟骨 💰13價錢可以如果再平啲就好，太細粒無咩特別。#爽口火雞腎 💰18中意食雞緊一定會叫呢個，大大舊好爽口。#燒燒賣 💰14（六粒）本身對呢個好期待（以為係炸），點知食落好普通，成口粉，好普通，唔值得試。#香燒日式墨魚嘴💰21份量都有幾多，食落好有咬口，但呢個唔算重口味。兩個人食完已經超級飽同好滿足。🤙整體分數：7.5/10—

平時行過都見到好多人，琴晚趁著weekday（理論上應該無咁多人），就走過去試下。老闆同老闆娘都好好人，知道我地第一次過去試，都推介咗好多款美食叫我地試。一行三人叫咗：燒茄子，安格斯牛柳粒，羊格，黑毛羊，雞全翼，魷魚鬚，扇貝，虎蝦，青魚，燒賣，熱狗腸，重慶粉，雞軟骨，四季豆，鮮冬菇，娃娃菜，韭菜等味道：適中，唔會太重味，唔會死鹹環境：係坐係街邊，不過有瓦遮頭，落雨都唔怕（食呢類串燒唔係應該咁先夠風味咩？）同區必試之串燒店，食得出食材都比附近嘅優質（食隻蝦就知）

搬左黎唔係好耐，好多時收工番黎經過見到幾多人係到飲酒食串燒，見早左食晚飯，就當宵夜試試佢。係屋企叫定，佢話預十五至二十分鐘就有得拎，我地叫左蒜香生蠔兩隻，一串安格斯牛柳粒 ，茄子，娃娃菜同韮菜。（我地叫左小辣）生蠔“老闆去埋殼，放左蒜蓉汁同辣粉係個兜到，呢個唔會燒到好老，入邊仲好juicy ，同埋都幾大隻架，推薦推薦”茄子“唔算話太特別，但就幾足料大條”到牛柳粒“睇食評話要試下，禁就諗住實冇死試下佢，但唔知係黑仔定咩，好似比較多根難咬d”韭菜同娃娃菜“我覺得調味落得太多，比較咸，只係食到d調味粉既味”。總括黎講，係有d失望架，因為屬於大路既野食做得太咸。下次再發掘下附近既串燒先。

食完晚飯，但係口痕，心血來潮買宵夜... （所以肥係有原因嘅😂）買咗一客四季豆，如舊 - 小辣，好惹味！個人必吃！份量差不多係出面嘅一陪（長度已經睇得出）👍🏻 另外唔叫「燒燒賣」，試咗串蒸嘅，反而覺得無咁乾，好味啲👍🏻 至於至愛嘅廚師腸呢... 呢晚老闆應該重手咗，略嫌重味得滯😅其實之前都有食過呢間，第一次叫純粹喜歡就叫，估唔到份量超多，一串雞翼竟然有四隻！但由於好好味，所以都食哂😋 燒鯖魚亦好大份，性價比超高👍🏻 另一推介係酸辣粉，個人選擇走花生🥜整體而言，屬推介的小店。如果揸車，其實可以打電話叫定，差不多時間到取，小店旁有停車處的😊

係咁o既,有一日我行過呢檔野,但係無買到野食,正當我走左唔夠20步,有個老死就叫住我。原來佢岩岩買左3串牛肉,佢好興奮咁同我講話『呢檔野d串燒牛真係正到無朋友呀!你有無試過呀!?』『無呀,我都唔多好呢d野』『試下先喇!』咁就試左一舊......一食落去『嘩』然唔係講笑,真係同你平時食果d好唔同,一試難忘。因為佢係安格斯牛肉粒,就係咁我就中左毒了!!!其他燒物同樣出色。多春魚、雞全亦、中亦、秋刀魚等等真係令人回味另外不得不提O既係雞蛋仔,佢令我食番細個果D外脆內軟O既口感,而且仲要5蚊一件真係平靚正嫁!!

話說放工好肚餓,去搵野食!小食都唔緊要,在街邊聞到好香好香,走埋去睇吓,有間新開的小食店, 嘩有新野, 試吓距地的超豪的安格斯肥牛粒, 只是每串hk$12,唔洗等好耐, 重有得選幾成熟, 嘩唸唔到仲好食過日本的燒燒串, 以後可以慳啲啦!!全力推介安格斯肥牛粒燒燒串....另外雞全翼都好正, 我同女朋友仲有吃雞蛋仔, 好有蛋香奶味, 超好味,外脆入軟熱辣辣,他地仲話有酸辣粉, 是招牌呀!吓次試吓先, 不過唔好咁鬼早去, 因未開呵, 3pm - 3am 夜鬼至正