醉翁亭火鍋館 (已結業)

睇完廣告，真係比個廣告吸引到，宣傳手法我俾佢100分。到我真係訂座夜晚8點，8點15分入去坐低，佢廣告上面果啲鮑魚呀、刺身啊、海鮮拼盤、牛頸脊、仲有碟餃子，係半個鐘頭之內都送到，以上呢幾樣野都係正常水準，任食我都唔會要求個刺身好正，牛頸脊係新鮮，鮑魚就普通，海鮮拼盤屬於正常新鮮，餃子正常。。。。。之後重點來了，去到任食個part，全部海鮮冇，全部丸冇，嗰張食物紙✅乜嘢冇乜嘢，等左成個鐘我寫咗三張食物紙，淨係你啲炸魚皮公仔麵芝士腸，大佬我比成三舊水唔係食呢啲啊！最搞笑嘅就係，啲侍應問我地要唔要隔離枱食淨嗰啲嘢🤦🏽‍♂️係咪傻咗。

是睌一行九位同事一齊慶祝上司升職。勢估唔到原本咁開心嘅一餐飯會令我寫下用左OpenRice 咁多年之後嘅第一篇食評。。。由於大家都想方便傾計，要坐圓枱會方便些少而最後選擇左醉翁亭火鍋館打邊爐。。一開頭上左啲fixed嘅牛，海鮮拼盤，大大粒餃子同刺身拼盤，味道都幾唔錯，特別係碟牛！！之後就係自己揀任食嗰啲。第一轉正常時間嚟左，質素都okay. 之後食到咁上下再叫第二轉，過左超過半個鐘冇嚟，催個部長，部長入去一輪之後同我地講搵唔到張單，叫我地再填。。填多次再等左半個鐘有多都冇嚟，大家都等到冇mood再想食野，唯有埋單走人。第一次遇着祇會嚟一轉野食嘅任食邊爐，襯得起第一次嬲嬲食評！

食左海鮮，肥牛都算ok，但第二輪菜大半小時都唔上，追完都無用，結果埋單走人，垃圾。估唔到咁大嘅財團出埋啲咁嘅質素嘅火鍋自助餐。真係非常之令人失望，我可以話比二間餐廳係我試過最差嘅一間任食火鍋我以後都唔會來。講埋啲配料一開頭嗰啲牛肉係幾好食嘅不過唔係任食係要＄158一碟嘅，叫自己做任飲任食火鍋但係最好嘅嘢都唔係任食咁我覺得真係麻麻囉，服務員態度好一般服務員又唔夠人，搵極都冇人幫手我真係極力不推薦呢間醉翁亭火鍋

第一次寫食評。 今日落住大雨，一行9 人黎打邊爐。呢間玩任食火鍋，兩百幾唔算貴。 一坐低，有最得人尊敬嘅經理萬歲，二話不說揀左龍蝦湯底啲海鮮拼盤同肥牛好快送上黎(唔係任食)，睇到啲野都唔錯，唔係流野，本黎都好滿意，食起上黎亦的確值得個價。點知，食到後期想加單，加啲菜同公仔麵(總有人打邊爐要食公仔麵，懂的)，第一次落單，無黎，催單，無黎; 再加單，再唔黎，再催單，前後坐左半粒鐘，完全無影，一催單就話落左，最後當然係無黎，等到嬲嬲地決定埋單，張單即刻送到黎。。。。。。啲野食質素唔錯原本想比正評，但係服務真係唔得，加極單都唔理你，咁實際上即係透過唔加單比你令你唔係任食，個正評只能變負評。