CRAZY THAI CUISINE

营业中

休息中

上網睇到呢間，又見太和又好似比較少泰國嘢食，啲朋友試完又話唔差。就特登試吓食。我就平日嚟食嘅。就試咗個白咖喱再加杯泰式奶茶。佢個白咖喱，我覺得偏印度香料重啲會辣少少。不過佢都幾好食，攞咗嚟試過點蝦片超級一流😂。本身諗住點個巴東肉試吓（佢好似最推介係呢個）但係驚食唔晒就冇叫。佢個泰式奶茶我覺得茶底重啲啲，呢啲我就冇乜所謂。佢其他小食都吸引，但係可惜我自己一個，同朋友嚟食，應該都幾抵。價錢嚟講小店係呢個價（本人食咗$100）。一個人食就唔會太化算，當試吓新嘢。因為佢個飯係唔包嘢飲，要另外叫。如果同成班朋友嚟食個價錢都OK。貪在呢度係喺條小巷旁邊，唔會太嘈。同朋友過嚟聚會應該都幾開心。坐落都闊落嘅同埋啲凳有軟墊（加分👍👍）可能我平日嚟就唔係太多人。環境就10分乾淨。員工態度都好好，我走嘅時候同我講咗兩次多謝😂。整體都感覺良好，當支持下本地小店。大埔人可以都去試下，間野係太和邨對面馬路個間牛肉刷刷鍋隔離（差啲睇唔到😂）。

嚟到大埔，見到有間新開嘅泰式小店，炎炎夏日最啱食泰國菜式。先來一個串燒做小食，揀咗雞同埋羊各三串，食物準備嘅時間較耐。幸好，串燒上菜嘅時候係熱辣辣，保持到肉汁。配上醬汁都非常惹味。主菜點咗一個泰式脆皮豬手，其實脆皮豬手同出邊其他國家嘅脆豬手冇乜太大分別，只係個醬汁比較酸甜開胃。配上一啲醃咗嘅酸瓜，唔算太多泰國特色。但脆皮豬手嘅皮就非常香脆，價錢都尚算合理。餐廳嘅餐牌唔算太過複雜，但都有不同嘅飯同埋麵類選擇。當一點左個菠蘿炒飯，相對其他菜式就比較失色。味道唔算突出，但份量算多。餐廳全新營運，試業期間人手略為不足，等候時間較長。但小店都值得支持，大家有時間嘅話都可以過嚟一試。

大埔新開嘅泰國菜，新開試業。無論情侶或一大班朋友都適合去食。先講環境由於係試業同無咩人，所以老細用咗一張枱去放佢地一啲雜物同文件，不過就無傷大雅。餐廳播放泰文歌配合返佢係泰國菜主題，加上柔和嘅燈光，其實都幾舒服。佢地亦有一張大枱可以比起碼十個人去坐，仲提供坐墊，所以坐得舒適。因為我地係一大班人去又唔知點揀，於是係由廚師拍板。以下係部份菜式，因為有啲唔記得相機食先，所以就唔提及。先嚟嘅係木瓜同青芒果沙律，酸甜辣適中，如果中意偏酸嘅可以揀青芒果，想清新嘅就揀木瓜。之後就係泰式生蝦同生蠔，生蠔本身就唔係好關泰國事不過勝在配上佢地自家製嘅泰式醬，清新酸爽得嚟又唔會蓋過生蠔嘅甜味。泰式生蝦都係配上佢地嘅泰式醬，中意辣啲嘅可以食埋上面嘅指天椒，不過我自己就覺得會過辣。生菜包，正路嘢，微辣。炒泰式蝦，佢好似係用冬蔭公嘅味道去炒。由於蝦本有走油比較香口，加上冬蔭公嘅酸爽辣，真係想連殼都食埋😂炒泰式蟹，望見個醬好厚以為好濃味，其實就係甜甜酸酸配合芫荽香氣，無蓋過蟹本身嘅味，反而襯到蟹肉清甜嘅味道。泰式串燒，同平時啲樣有唔同，嚿肉好大嚿，我自己最中意牛，因為juicy又有牛香而且我本身中意食牛。菠蘿炒飯，

近期喺太和翠怡花園有太多店舖關門，選擇性越來越少，前兩天收工走過這條小巷，發現有間泰菜新開張，立即進內到店舖試試，坐低後店員立即介紹飲番杯生啤，整個立即舒暢晒！之後先發覺店內原來有部黑膠播放機，隨着音樂播放，雖然放工後十分疲累，喺呢一個環境下，俾人感覺特別放鬆！之後店員再推介幾個小菜，泰式爐魚、德國豬手，生蝦，串燒等都值得推介！每個菜式都唔差、埋單又平！係呢一區嘅泰菜，呢家我覺得都算唔錯，大家不妨試一試🍺

行過太和見到有間新嘢就入去試吓囉！ 心諗而家啲咁嘅環境重有勇者開新鋪，點都要支持下小店喇！入到去，心諗令嘢喇！ 成間嘢得我一丁友，諗住轉身射個3分波走人！ 點知喺厨房行左個唔知係老闆定係咩嘅靚仔出嚟！ 鬼咁好招呼我依個麻甩佬，為面仔唯有頂硬上喇！叫左個泰式打抛飯，同串燒，做型都唔算求其嘅！ 肉碎炒得好香，打抛葉比金不換清淡，唔會太搶味，加埋隻燶邊蛋，簡直係絶配呀！串燒味道正常有香料味，份量同居酒屋比算係大，靚仔話串燒係佢地自家制，唔係嗌現貨！ 有成意呀！見佢地有生啤，咪諗住食下串燒飲下啤啤酒囉！ 點知阿靚仔話佢哋新開，試業中，酒牌未ready喎！ 咁唯有等下次叫埋啲朋友仔先一齊啤一啤囉！叫埋杯泰奶茶，埋單200蚊找幾蚊，冇加一，冇隱形收費，咁又過咗一個愉快嘅晚上咯！😬