Starbucks Fans或者咖啡迷，呢個暑假去台北嘅話記得Mark低呢個展覽：Starbucks咖啡旅程特展！唔單止係期間限定，而且仲可以一站過試勻哂台灣所有種類嘅咖啡（有啲本身係指定門市限定），仲有六款展覽限定飲品！

呢個展覽已經係第三年舉辦，亦係唔少台北嘅咖啡Fans每年一定會嚟潮聖嘅地方。地址選擇喺非常有文青Feel嘅華山1914文化創意產業園區裡面，而展覽內容可以分為Coffee Farm、Coffee Bar同Coffee Room。Coffee Farm係介紹每杯咖啡嘅起源：咖啡豆。

而Coffee Bar當然就係畀大家品嘗咖啡嘅地方，顧客可以選擇自己心儀嘅咖啡豆同沖泡方法。另外亦可以選擇佢地嘅獨家限定飲品，例如用肯亞咖啡加上檸檬有汽梳打嘅香檸肯亞咖啡FIZZIO，非常適合喺夏日享用。

另外值得留意嘅仲有每日限定十組嘅One Coffee Three Ways，即係一種咖啡豆用三種唔同嘅沖泡方法：手沖、濾壓壺同美式處理，畀你試到咖啡豆唔同面貌嘅原味。亦可以選擇喺店員幫忙指導之下，自己手沖一杯獨一無二嘅咖啡。

最後Coffee Room係一個Open Area畀各位咖啡迷互相交流，而且定期亦會有咖啡相關嘅講座舉行。當然亦唔少得Starbucks相關嘅產品，由杯到手賬都有，忠實Fans小心買到荷包立刻變瘦！

info
星巴克咖啡旅程特展
活動日期：即日起至2016年9月11日
地址：台灣台北市中正區八德路一段1號華山1914文化創意產業園區鍋爐室

資料來源：星巴克咖啡旅程特展Facebook