藥膳湯底材料豐富，而且當中九款藥膳仲可以按自己需要再添加
牛肩脊肉特別選用鹿兒島黑毛和牛，牛味濃郁而且唔騷
温野菜係日本Shabu Shabu專門店，喺日本有超過300間分店，其中一個廣受歡迎嘅原因就係佢地喺日本搜羅各種唔同新鮮食材。香港分店亦一樣從日本直送食材，例如有嚟自鹿兒島同佐賀嘅和牛同熊本嘅豚肉，當中野菜五品盛合就係最有代表性嘅例子，生菜同金菇等蔬菜嚟自福岡、長野同青森等唔同地方，其他Shabu Shabu店都未必有咁廣泛嘅選擇。
松葉蟹·黑毛和牛御膳套餐，有齊唔同食材，CP值夠高
選擇恐懼症嘅朋友仔可能都有咁嘅經驗，就係去食火鍋放題唔知食咩好！而温野菜就細心地先將優質食材配搭好，無論午市定晚市都有唔同嘅特色Shabu Shabu套餐，咁就易揀好多啦。餐廳推介嘅松葉蟹·黑毛和牛御膳當中就有齊多款招牌食材，而且仲有一個正宗享用次序！
熊本豚腩肉充滿脂香，口感軟腍。
首先，等湯底滾嘅時候可以試下開胃前菜同沙律。當湯底煲滾後就加海鮮同肉，松葉蟹·黑毛和牛御膳套餐當中，以鹿兒島黑毛和牛肩脊肉最有牛味，而熊本豚腩肉雖然比較肥但亦係入口最軟腍嘅肉。刷完肉同海鮮，就可以開始食蔬菜，一嚟Refresh一下口腔，二嚟蔬菜亦會吸收哂肉同海鮮嘅鮮味，更好食！之後可以加其他配料，例如竹筒免治雞肉同自家製福袋年糕。最後仲可以加配料同麵或飯，嚟個飽足雜炊。
骨膠原啫喱加熱就變湯底，唔會太濃稠而且仲養顏
湯底就Shabu Shabu靈魂嘅所在。温野菜有九款特色湯底，包括日本女仔最鐘意嘅骨膠原柚子塩湯，柚子酸中帶微甘而且有獨特清香，加上成兜骨膠原啫喱加熱後慢慢變清澈湯底又幾得意。另一女士養顏之選就係有機豆乳湯，豆香濃郁而且湯底特別幼滑。而完熟番茄湯亦非常受歡迎，番茄香味超濃，而且最後可以加芝士同飯嚟整番茄芝士雜炊，酸甜嘅番茄飯加上火鍋精華，無得輸。
湯碗係温野菜特製，隔開剩湯同食材
餐廳處處亦見日本人嘅用心，例如湯碗特別加多一層嚟隔湯，等每次夾食物嘅時候，都唔會浸到碗裡面之前剩餘嘅湯。另外餐廳裝修以淺色為主有家嘅感覺，而且枱同枱之間可以落簾私隱度較高。不夠枱就比較細，四人枱同八人枱都唔係好夠位擺哂所有嘢食，睇嚟餐廳要諗下點樣再盡善盡美啦。
隨時接收最新資訊
讚好OpenRice專頁！
關鍵字
尖沙咀
Shabu Shabu
火鍋
和牛
複製到剪貼簿