講起荃灣有咩食，通常都會諗起路德圍或者嗰幾個連環商場嘅小食店，之但係呢兩個月開咗兩間小店，賣嘅嘢食都好吸引呀！一間有串成40厘米長嘅深海八爪魚串，一間就有香港人大愛嘅厚身pancake！但佢哋嘅位置都唔係太起眼，唔係特登行過都未必發現到，分分鐘連荃灣人都未必知道㗎。

40cm八爪魚串   Gourmet Tasty

呢間小店開喺荃豐中心地下，基本上成層大部分嘅舖位都係賣電腦同電話嘢，邊諗得到喺電梯轉角會有間設計到成架美食車，舖面又有日本小店feel嘅食店吖，仲有4個位可以坐低食。

唔使問，全間舖最吸引亦最呃like嘅一定係40厘米長嘅深海八爪魚串！就咁聽都覺得勁，拎上手先至震撼，條魷魚鬚長到呢！即叫即燒，燒到咁上下再搽埋自家調製嘅醬汁，鹹中帶甜，仲有些少酸酸地，味道係幾豐富嘅。嚟自日本深海嘅八爪魚肉亦都相當彈牙，又唔韌，係食得麻煩少少啦，太大串喇。

另外仲有其他小食好似鵝肝多士、爆cheese帆立貝、爆cheese雞扒之類，仲有個澳洲和牛漢堡添。漢堡同樣都係即叫即製，睇住老闆娘將塊和牛漢堡反幾反，再烘一烘底面嘅包，夾埋青瓜、蕃茄同芝士就食得。芝士雖然未至於拉到絲，但都有熱溶效果嘅，不過塊和牛漢堡就略嫌唔多夠牛味喇。

地址：荃灣青山道144-172號荃豐中心地下GA20-21號舖

兩層厚pancake   Aroma Dessert Cafe

至於要喺日本同尖咀排晒隊先食到嘅厚pancake，荃灣呢間行文青風嘅甜品舖都有。入到去裝修幾靚，仲有好多公仔擺設。講返件厚pancake，兩層高，有幾款味揀，呢隻焦糖蘋果就偏甜得嚟又酸酸地，建議可以試埋其他味。而個pancake嘅質感比較似蛋糕，實咗少少，冇想像中咁鬆軟，可能令pancake迷有啲失望。

不過佢嘅心太軟做得唔錯，雖然上枱嗰陣見到勁大隻碟但個心太軟勁細係會O咗嘴同突咗眼，但係一嗶落去，流心度勁高呀。同埋，必須要講，其中一款味係焙茶心太軟呀！出面好少食到，焙茶味甘香濃得嚟又唔會太澀，但就顯得側邊嘅綠茶雪糕相對較淡口。

地址：荃灣鱟地坊38-46號祐強樓地下42號舖