常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。
多年嚟唔少出名又好食嘅餐廳進駐東區，天后、北角、鰂魚涌、西灣河等熱門地帶嘅美食包羅萬有， 嚟東區搵食可以好似尋寶咁，搭下叮叮、散下步、穿過大街小巷，隨時都可以輕易搵到心水餐廳。東區咁多出色食店，今年開飯熱店入圍名單又有無你喜愛嘅餐廳呢？
大大碗北海道特色湯咖喱 Asiri
由日本人開嘅北海道主題咖啡小店，主打日式家庭料理菜，畀人親切又溫暖嘅感覺，配合埋餐廳簡約舒適嘅歐日式裝潢，非常有家的感覺。佢哋最出名係北海道湯咖喱，湯咖喱同一般食到嘅拌飯咖喱完全唔同，而係加入咗高湯並以大火煮成，大大碗咖喱汁配豐富蔬菜或肉，超級滿足。Asiri使用北海道米，煮成嘅米飯又軟熟又有飯香，畀你一個絕對地道嘅美味體驗。
圖：地道滑嫩海南雞 隨心
主打新加坡菜嘅小店，海鮮喇沙值得推介，味道香濃，配料份量多，有蛋、帆立貝、魚片同鮮蝦等，非常足料。另外，佢哋海南雞嘅雞肉非常滑嫩，飯底淋上雞汁，仲散發住陣陣香茅味，淨係個飯都夠曬出色。
圖：精心熬煮海鮮湯 鯛魚魚湯專門店
經十幾小時熬成嘅鯛魚湯，配上高質日本米炮製多款海鮮湯飯，就係呢度嘅主打。以大量鯛魚同秘製配料煮成嘅湯，滿滿鯛魚精華，味道鮮甜唔油膩，絕對係高級享受。湯飯配料亦都非常豐富，有鮑魚、花膠、日本帶子、廣島生蠔、波士頓龍蝦、海膽、蟹腳可供選擇，樣樣都咁豪華，食到有幸福嘅感覺。飯仲附有火爐以保持溫度，亦可配有手打烏冬或拉麵。
圖：隱世特色fusion菜 Soul9+
隱藏於小巷內嘅多國fusion菜餐廳，菜式配搭新穎有趣，佈置走歐陸風格，內有外國電話亭，影相打卡超有格調。呢度嘅煙燻鮮蟹肉玉子燒係必食推介，鮮拆嘅蟹肉新鮮多汁，蟹味十足，玉子燒口感嫩滑，同鮮甜蟹肉簡直係絕配。另外一款見個名就流曬口水嘅菜式就係原板海膽黑松露蟹膏意大利飯，一次過可以食曬一板海膽已經係天堂級享受，仲可以享受埋黑松露同蟹膏，配上用忌廉汁炆煮嘅意大利飯，呢個中日混合嘅配搭真係邪惡又獨特，真係呢度先試到。
圖：碼頭旁享風味串燒 埠
位於碼頭旁嘅串燒小店，成排落地玻璃畀你邊觀賞碼頭海景邊食美味串燒，係視角加味覺雙重享受。餐廳每檯提供熱石小爐，確保串燒時時保持最香口狀態。呢度串燒嘅選擇豐富，有牛舌、和牛、鵝肝、雞翼、廣島蠔、白鱔、秋葵等，樣樣鹹鮮有至，令你食唔停口。
圖：性價比高平民化西餐 AGE Cuisine Express
有時突然想鋸個扒或者食份羊架，但又唔係咩特別日子，唔想搞咁大陣仗食到咁貴，去呢間工廈內嘅平民化西餐廳就最適合不過啦。呢度提供美國安格斯西冷、香草紐西蘭羊架、北京烤鴨薄餅、德國香腸拼盤等菜式，每樣都大大份，價錢都係百幾二百蚊，一定滿足到鍾意西餐嘅你。
圖：東區十強仲包括日式居酒屋桻之燒、日式健康料理小店坐忘、米芝蓮意大利餐廳CIAK - All Day Italian同抹茶甜品專門店京林屋，邊間係你嘅心水餐廳呢？立即去優秀開飯熱店大賞網站投票，仲有機會獲得豐富獎添！
文：Kenna
