見到美食，大部分人嘅抵禦力會立馬大大降低，而假如畀牛魔王見到嚟緊要介紹嘅呢塊美國10安士燒牛肉，應該不得之了！事關呢塊燒牛肉真係好大塊，好厚，好多汁，而且仲可以睇住師傅推住架餐車即場切落嚟，點忍呀喂？

金鐘有餐廳嚟緊成個10月都推出呢個以10安士美國特級燒牛肉為主打嘅優惠套餐，先喺7款頭盤入面揀3款，主菜就一係食呢塊牛一係食燒海鮮，加多款甜品咁，其實真係淨係食件牛都飽。

循例都要講講頭盤有咩揀嘅，燒帶子芒果莎莎啦、迷你龍蝦湯啦、parma ham啦同釀蘑菇等等，放心，全部都係一口mini size，細細份可以試多幾款嘛。迷你龍蝦湯雖然迷你，但龍蝦鮮味依然十足，叫得過嘅，至於釀蘑菇，整法就同想像中有少少落差，原來係炸蘑菇波嚟。

食完頭盤，終於到隻牛喇。見住佢上枱嗰下真係會嘩一聲，堅大塊！有成半隻手指公咁厚。不過，大塊唔等於會韌，就連邊邊嘅位置都整得好腍，好juicy。而且成隻碟，唔淨止得塊牛肉㗎，另外仲有口感超滑嘅薯蓉同埋外脆內軟嘅英式烘薄酥餅，仔細食嘅話仲會食得出薯蓉上嘅汁同牛肉汁係唔同㗎，味道更加香濃，細食少少嘅都未必食得晒。

詳情
Lawry's The Prime Rib
優惠期：1/10 至31/10
主菜配頭盤或甜品：$628
3道菜晚餐：$688