中秋Long Weekend只可以葡萄人地去旅遊打卡？有啲美食唔洗坐飛機去外地都嘆到嘅，例如尖沙咀呢間Cafe喺日本有芭菲大王之稱，最近仲推出咗日本溫室蜜瓜系列，夠Grand嘅玻璃杯芭菲，有；特盛版足半個蜜瓜嘅芭菲，有；鐘意一冷一熱口感衝擊嘅，都有！

Ufufu Cafe今次日本溫室蜜瓜系列全部都係使用空運到港嘅日本產蜜瓜，連日本分店都無！至於產地地區就視乎收成同品質，簡單啲嚟講，即係日本邊度嘅蜜瓜最靚就用邊一區。蜜瓜當造期到11月，想試最鮮甜多汁嘅蜜瓜就要快手喇。

成個系列最搶眼嘅，就要數到呢個用咗半個蜜瓜製作嘅特盛日本溫室蜜瓜布丁芭菲！網紋蜜瓜熟度啱啱好，唔單止口感柔軟味道甜美，而且輕輕一咬就已經有果汁咇出嚟！配埋Creamy嘅北海道3.6牛奶軟雪糕，奶味香濃而且甜而不膩，係最佳配搭！中間除咗雜果仲有一個用日本蛋製作嘅布甸，布甸口感都幾滑，而且味道偏甜，甜魔最愛。夠2-3人分享。

如果細食嘅女士們怕食唔完半個蜜瓜嘅話，亦可以揀日本溫室蜜瓜芭菲，一樣有日本溫室蜜瓜同北海道3.6牛奶軟雪糕呢對好拍檔。建議先食少少雪糕，如果唔係食咗蜜瓜先嘅話軟雪糕會容易跌落嚟唷。芭菲杯入面仲有忌廉、脆米同鮮雜果粒，不失鮮果嘅天然甜蜜又層次豐富。

另外仲有日本溫室蜜瓜梳乎厘班戟，梳乎厘班戟足有3cm高，口感蓬鬆又有回彈，有啲似較腍嘅海綿蛋糕。上面加埋香滑忌廉同日本溫室蜜瓜已經夠吸引，配埋北海道3.6牛奶軟雪糕，一暖一凍一軟一滑嘅口感衝擊非常吸引。甜魔可以再倒少少楓樹糖漿落件梳乎厘班戟到，更突顯甜味。

唔好以為呢間Cafe只可以滿足甜品胃，而家開始去食正餐都得啦！逢星期一至五中午12:00到下午3:00都會供應午市套餐，仲可以揀有迷你芭菲嘅版本，咁就有齊前菜、主菜、白飯、飲品同甜品。

迷你芭菲暫時有三款口味：栗子蓉芭菲、香蕉朱古力芭菲、士多啤梨軟雪糕芭菲任揀。而午市套餐嘅主菜會亦日式炆煮物為主，例如最近嘅會係炆煮漢堡扒，最重要嘅係不定期更換，咁就可以Keep住新鮮感啦。想知道最近有咩新主菜，可以留意佢地嘅Facebook專頁。

Tea Time嚟亦有日式小食揀，例如牛油果醬餅乾同日式照燒雞翼，特別推介豆腐博多明太子，明太子鹹香帶少少辣，同清淡嫩滑嘅豆腐非常夾。想食特別啲嘅，可以試埋日本溫室蜜瓜系列嘅唯一鹹食巴馬火腿蜜瓜薄餅，香甜多汁嘅蜜瓜肉同柔軟鹹鮮嘅巴馬火腿各顯特色，加上配Mozzarella芝士嘅煙韌薄批底同香脆批皮，邪惡美味。