日系刨冰
台灣亦叫剉冰，係用傳統機器甚至人手將冰塊刨碎，淋上唔同口味嘅糖漿同配料，冰粒口感細細碎碎，入口即融得嚟又有咬口。
大大份食上癮刨冰 SHARI SHARI Kakigori House 氷屋
圖：callmejacque，Zoe chui
位於銅鑼灣由北海道老闆開設嘅冰店，抹茶控必試宇治金時刨冰，抹茶味道甘甜香濃，綿密刨冰中間仲有大大粒紅豆。其他口味仲有清新又富豆香嘅豆腐味，少女最愛嘅士多啤梨味。期間限定亦有驚喜，例如春天出嘅櫻花味，同啱啱出完嘅牛油果味！全部刨冰都大大份，但中間都有唔同醬料或者配料，難怪有人試完話對刨冰改觀不特止，仲有上癮嘅感覺！
呃Like白熊刨冰 越後屋
圖：hihi1234567890，apuruw
喺呢個相機食先嘅年代，刨冰亦唔再得大大碗圓碌碌一種賣相。例如大坑呢間日式冰店就有超呃Like嘅白熊刨冰，牛奶刨冰加上雪糕、橙、菠蘿同士多啤梨後就變成得意小熊！唔好以為得外表，入面可以揀士多啤梨或者芒果醬，夾埋一齊食特別酸甜解暑。想再吸睛啲嘅仲有沖繩鹽彩虹冰，有齊七彩顏色之餘，配搭用沖繩海鹽醃咗一個星期嘅檸檬，酸鹹醒神。
香濃抹茶焙茶刨冰 Via Tokyo
圖：myfoodyssey，Hin_Hins
香港所有抹茶控應該都聽過佢嘅大名，不過今次唔係介紹佢地嘅招牌軟雪糕，而係尖沙咀分店限定嘅抹茶同焙茶刨冰！見到呢個綠色就知真材實料，刨冰淋上抹茶糖漿，茶香濃郁回甘，再放上抹茶泡沫令人有食緊刨冰版抹茶Cappuccino嘅感覺！另外焙茶刨冰同抹茶類似，雖然有食客覺得焙茶泡泡有啲似便便......但入口焙茶嘅清香同微澀足夠令人眼前一亮！
韓式雪花冰
一樣係將冰塊刨碎，但韓式雪花冰會比一般刨冰更幼細，就好似個名咁有雪花咁輕盈綿軟。通常會用牛奶冰嚟做雪花冰，上面放上黃豆粉同紅豆蓉，或者做成其他水果口味。
霸氣蜜瓜西瓜冰 The.Daldal
圖：hkfoodtalk，KaKa522
正所謂咩都咁隨便，點會有人畀面，想食冰都食得比人霸氣嘅話，不如嚟呢間尖沙咀韓國街裡面今年先開張嘅冰店。最霸氣嘅應該就係佢地嘅西瓜雪花冰，半個西瓜挖肉後裝滿加咗煉奶嘅雪花冰、西瓜粒，雪糕一球唔夠再插多個甜筒上去！唔鐘意西瓜嘅話仲有蜜瓜味揀，一樣用咗半個蜜瓜，今次中間倒插返支蜜瓜味雪條。兩款水果都清甜多汁，同刨冰非常夾。
期間限定雪花冰夠搶眼 韓冰
圖：lokyanyan，Karenkyt
唔單止同學愛新鮮，其實唔少香港人亦貪新鮮感，咁呢間韓國嚟嘅連鎖冰店就啱哂啦，除咗Menu上面嘅固定口味之外，佢地嘅期間限定口味亦非常吸引，例如之前食正紫薯熱嘅紫薯雪花冰、造型可愛嘅哈密瓜雪花冰，同最近尖沙咀店限定嘅藍精靈綠茶雪花冰。最後Back to basic，唔少食客大讃好食嘅，係Menu上嘅紅豆豆粉雪花冰，豆粉同雪花冰一樣入口即融。
選擇夠多有新鮮感 Nun Desserts Cafe
圖：heidima，TWTW
選擇恐懼症人士請注意！有需要嘅時候請預先睇定Menu揀好心水，因為呢間連鎖韓式冰店，單係雪奶就有超過15款口味，從甜魔大愛嘅Oreo，近兩年大熱嘅抹茶，到重口味嘅榴槤都有，真係各具特色食得招積。蜜瓜雪奶有清甜蜜瓜同蜜瓜味雪糕加分，甜魔可以自己再加煉奶。季節限定嘅榴槤口味用上D24榴槤，果肉幼滑香甜，加上榴槤粉同小丸子增加口感。
隨時接收最新資訊
讚好OpenRice專頁！