都話咗鹹蛋係2018年度嘅寵兒啦，又有黃金嘢食喇！登登登櫈，黃金蝴蝶酥！

呢個黃金蝴蝶酥嘅來頭不少呀，係出自前帝苑餅店總廚Louie Ma之手呀！佢最近聯埋幾位志同道合嘅朋友一齊喺中環開咗間甜品餅店，除咗蝴蝶酥，另外仲有多款内外兼備嘅西餅、蛋糕同曲奇。

Louie Ma嘅蝴蝶酥，早已聞名，今次舖頭新開，當然唔少得啦。原味、芝麻味以外，更加研製咗黃金蝴蝶酥。師傅話因為自己鍾意食鹹蛋、黃金蝦，加上受新加坡鹹蛋薯片所啟發，就嘗試將中、西式文化結合，喺製作時混入鹹蛋粒。未食就已經聞到好香嘅鹹蛋味，食就更加唔使講，酥脆、鹹香，然後就有牛油香，甜味喺最後走埋出嚟，口感豐富。

西餅款式亦甚多，成個櫃五顏六色，每個cake嘅造型都好鬼靚。柚子慕絲蛋糕係季節限定嘅，一睇個造型就已經知道佢係柚子，建議雪櫃拎出嚟攤放一兩分鐘先食，因為中間有微微嘅流心啫喱醬，落埋柚子皮落去整㗎，酸酸甜甜好清新。

櫻花蛋糕同樣都係限定版，底層係紅豆蛋糕，中間呢就係紅豆軟心，仲有啲櫻花白豆蓉mousse，夾埋一齊又唔會話太甜，加上粉色嘅外層同蝴蝶、花花嘅裝飾，深得女生歡心。

青蘋果 芝士mousse同朱古力伯爵茶蛋糕則係喺舊有嘅基礎上再加以改良嘅。前者比以前少咗個朱古力殼，冇咁甜之餘青蘋果味更見突出；後者則以62%黑朱古力加牛奶朱古力再加earl grey而製，茶香同甜香好balance。

當中要數最特別嘅，非粟米蛋糕莫屬。坊間有幾可食過粟米蛋糕先得㗎？餅底係壓製過嘅脆粟米粒，中間就係粟米panna cotta夾心，面層嘅粟米粒呢都係panna cotta倒模而成。總之成件cake由頭到尾由內到外都係粟米味，襯埋少少奶香味的確係幾有驚喜。

Meltlyplace
地址：半山堅道55號地下

文、相：Kar