圖：香港政府一站通

最近週末有唔少活動，但講到最適合一班人一齊去玩返日嘅，就一定要數到由香港歷史博物館，香港玩具協會同香港玩具廠商會聯合籌辦嘅「香港玩具傳奇」展覽！唔單止門口就已經有近百個《星球大戰》白兵列陣畀大家打卡，入面仲有超過二千組唔同年代嘅玩具，大細路都會樂而忘返！不過行完又攰又餓，可以去邊度醫肚？等開飯仔幫大家搵下啦！
 

博物館社企茶餐廳　　香城茶室

圖：plyyy，mohkc

自問懶到完全唔想郁嘅話，呢間懷舊茶餐廳就最啱你，因為就開正喺博物館裡面呀！位於香港歷史博物館一樓嘅香城茶室由扶康會成立嘅社企營運，醫肚之餘又可以支持殘疾人士就業。懷舊茶餐廳格局下食物亦形神俱全，常餐唔係普通行貨，菠蘿油同西多士等茶餐亦有水準，記得嗌返杯有茶香又柔滑嘅熱奶茶。不過記得注意餐廳同博物館一樣逢星期二休息。
 

Happy Hour最啱法國菜　　Scarlett Cafe & Wine Bar

圖：Yan~*

一班Friend玩完意猶未盡，行過嚟柯士甸路呢間餐廳延續Happy Hour咪得囉！餐廳樓底高又有個半開放式廚房，氣氛熱鬧輕鬆。想霸氣啲嘅不妨先嗌份1 Meter Board，名副其實用一米長木版奉上五款芝士、五款凍肉同一款法式肉醬，建議按淡到濃味嘅次序去食。而招牌主菜之一烤春雞亦係非常適合一班朋友分享嘅美食。
 

文青系Band Show餐廳　　Cafe Hillywood

圖：Christinelei

相反想靜少少傾下計嘅話，可以嚟呢間位於地牢嘅Fusion餐廳，雖然不定期會有Live Band Show，但音樂輕柔為主唔會太嘈。而且裝修係混搭工業風，又有藝術畫作擺設同門口一幅非常吸睛嘅紅鶴畫，嚟到餐廳都可以繼續自拍打卡啦。嘢食方面就推介招牌本尊海膽意粉，海膽同三文魚子加上掛滿忌廉汁嘅手造扁意粉，入口鮮味爆發。
 

水準海鮮西餐廳　　LAB EAT Restaurant & Bar

圖：佐藤真子

另一邊嘅金巴利道可以搵到呢間相當有情調嘅西餐廳，最多食家推介佢地嘅海鮮，無輪係人少少想逐隻生蠔咁嗌定多人開心Share一份海鮮拼盤，質素同價錢都令人滿意。試埋黑松露野菌忌廉湯之後就可以食主菜，海鮮意粉、芝士焗原隻波士頓龍蝦等都各有特色。女士們可以留肚食甜品，而男生們唔好錯過呢度嘅手工啤酒！
 

正宗韓式炸雞　　紅雞

圖：bageladdiction

雖然金巴利街素有「韓國街」之稱，不過今次開飯仔要沿住金巴利道嚟搵呢間韓式人氣炸雞店！無他嘅，皆因佢地嘅韓式炸雞比較正宗，外皮香脆而且最抵讃嘅係炸漿皮唔會太厚，而入面嘅雞肉仲Keep到肉汁，口味仲有原味、香辣汁、秘製蒜香汁、香蔥，甚至係古韓式任揀。另外仲有韓式小食、麵食、沙律等選擇。
 

日式新鮮浜燒食堂　　秋田浜燒食堂

圖：cwng22

韓國菜唔啱？咁再行過嚟諾士佛臺就搵多呢間開咗無耐嘅日式浜燒食堂，浜燒者，海邊即捕即燒也。而呢間小店就由店員即席燒烤各款海鮮，小心聞到香味喺一邊不斷流口水！蟹味噌甲羅燒用蟹蓋燒香蟹膏、蟹籽、蟹肉同鵪鶉蛋，配搭威化餅一齊食滿嘴豐腴甘香。另外仲有刺身、沙律同小食，唔夠飽仲可以嚟一碗茶漬飯。
 

隱秘酥炸小食檔　　百利來美食

圖：佐藤真子

呢間小食檔離香港歷史博物館唔算太遠，但要識喺後巷入面搵到呢間露天檔口先係重點！招牌椒盬墨丸唔單止炸得夠香脆，加埋惹味椒盬簡直無得輸。炸蟹子丸撈沙律醬食一樣好味，另外仲有黃金炸燒賣，煎釀三寶等小食。覺得炸物太邪惡嘅話仲有三絲蒜味冷麵，加多支鮮榨果汁或者自家制菊花茶，爽返哂。
 

最後想Chill返晚嘅話，仲可以去台灣掌門手工啤喺金巴利道嘅第一間境外分店嘆手工啤同台灣燒物，有啱嘅餐廳記得先Bookmark底喇！

「香港玩具傳奇」展覽
展覽日期：即日起至2017年5月5日（逢星期一、三至日）
地址：尖沙咀漆咸道南100號香港歷史博物館專題展覽廳

文：Cathy
 


開飯編輯推介：

1. 【專訪】日本人在香港 開餐廳最重要健康行先

2. 2月份好評餐廳十強

3. 2017亞洲50最佳餐廳 地區最佳餐廳全攻略

熱門文章推介：

1. 【一個人開飯】一個人喺大埔食乜好？

2. 【二人前指南】港九新界齊最啱拍拖特色Cafe

3. 【熟食中心尋寶】禾稈冚珍珠 皇后街熟食市場

隨時接收最新資訊
讚好OpenRice專頁！