又不是八十年代？舊式茶餐廳餐飲大哂冷

茶餐廳喺香港有超過半個世紀嘅歷史，當中自然少不免會有汰弱留強嘅情況出現，連食物都唔例外。今次開飯仔就幫七八十後溫故知新，亦九十同零零後介紹下一啲舊得嚟又有特色，而家茶餐廳已經非常少見嘅飲品同食品！

茶走

圖：chicchi Lau
第一個介紹嘅係最多人識嘅茶走，去到茶餐廳明明餐牌無但都識嗌茶走好似好叻叻豬咁，咁你又知唔知茶走點解？茶走當初其實係「奶茶走奶走糖」嘅意思，當然奶茶唔可以完全無奶，只係用煉奶嚟代替淡奶同砂糖。煉奶比砂糖更容易溶解，所以可以減少杯熱奶茶飲到最後成口砂糖嘅情況。

不過而家唔少茶餐廳為咗趕時間，凍熱飲品都喺水吧先沖好，就算特別叫一杯茶走，伙計可能都會照用加咗淡奶沖好咗嘅奶茶再加煉奶比你。要嘆真正嘅茶走，就要識得揀茶餐廳啦。

滾水蛋

圖：好為食的熊
又名和尚跳海，因為整滾水蛋嘅時候係先倒一杯滾水，再喺滾水入面打隻生雞蛋，圓碌碌嘅蛋黃似頭而漂浮嘅蛋白似袈裟。飲之前加砂糖，篤穿蛋黃用滾水將蛋白蛋黃都攪熟就飲得。唔鐘意嘅或者會覺得滾水蛋有腥味，鐘意飲嘅會覺得佢似雞蛋腐竹糖水，但其實佢係以前平民嘅營養補充飲品。

黑牛/白牛

圖：K'sSL
而家去一啲比較舊嘅澳門茶餐廳反而搵得到嘅特飲，其實係汽水加雪糕。黑牛通常係可樂加朱古力雪糕，白牛就係七喜或者雪碧加雲呢嗱或者椰子雪糕，襯返哂色。雖然點解個名有個牛字就無人知，但就成為以前細路仔最鐘意嘅特飲之一。

牛肉茶

圖：蒙奇奇
要整一杯正宗嘅牛肉茶其實相當花功夫，首先將牛肉骨拎去燒，燒完再煲湯，最後加蔥花同牛肉碎，其實似湯多啲。後來因為瘋牛症港府禁止輸入外國牛肉，唔少餐廳就改用不含牛肉成分係酵母萃取物嘅保衛爾牛肉汁開水，順便降低成本。飲嘅時候記得加少少胡椒粉去腥。

荷蘭唂咕

圖：蒙奇奇
唂咕即係Cocoa嘅音譯，由可可豆磨成粉就係唂咕粉。可可豆係朱古力嘅主要材料之一，所以可以想象唂咕嘅味道同朱古力有啲似，但唂咕會帶少少苦。由於以前朱古力粉比較貴，平民嘅茶餐廳就用荷蘭唂咕粉嚟沖飲品，而家想飲荷蘭唂咕可以請水吧師傅落多少少奶，咁就無咁苦，又飲到可可香味。

咖央西多

圖：Roar
咖央醬其實係可以話係「外來勢力」，由以前到老南洋營商嘅港人帶入。上世紀唔少港人從事勞動工作，閒來想食啲甜食就會點一份法蘭西多士，由於糖漿比較貴，所以茶餐廳會用咖央醬嚟代替，濃香甜美。不過要自己整咖央醬就相當花時間同麻煩，所以而家大部分茶餐廳都改用糖漿嚟代替咖央醬。

飛碟

圖：最曉食
同零零後講飛碟嘅話佢地應該會一頭霧水，喺茶餐廳，飛碟其實即係用方包夾材料再擺喺飛碟多士機烘熱嘅食物，有少少似三文治或者多士。因為邊位壓過烘平而中間有餡脹卜卜，所以就叫飛碟。不過可能因為而家大家生活水平提升咗，比起飛碟嘅內斂更鐘意皮薄餡靚甚至漏餡嘅直接，所以有賣飛碟嘅茶餐廳慢慢變得越嚟越少。