秋高氣爽想帶埋屋企嘅毛孩出街？臨近將軍澳海傍最近就開咗間台式酒吧餐廳，半開放式設計，加上有唔少配套，絕對係一間Pet Friendly餐廳！而且供應坊間比較少見嘅台式爐端燒，吹住海風自己燒肉，感覺好Chill！
 

戀上台式料理位於將軍澳海濱公園附近，同寵物去完寵物公園可以順便嚟食下嘢。餐廳有供應免費寵物零食、除臭消毒用品、飲水器等可以畀毛孩們使用！餐廳就主打台式料理同爐端燒，選擇多元化。
 

爐端燒日本和牛（$168）

採用日本東北部九州大分縣和牛，特別選擇A4等級，油脂分佈平均得嚟又唔會食落成嘴油。燒完聞落好有油脂香，肉質細嫩，加少少喜馬拉雅山粉紅鹽就已經夠味。
 

爐端燒美國特板牛小排（$98）

美國特板牛小排就脂肪少啲，少咗入口即溶嘅口感。係牛前胸肋骨部位嘅肉，肉質比較結實，勝在肉味香濃。燒至半熟食落更加Juicy！另外餐廳特別用日本燒汁，味道甜甜哋同牛小排都幾夾。
 

爐端燒美國極黑毛豬梅花腩（$98）

唔食牛嘅話呢度亦有海鮮同豬肉揀，呢款美國極黑毛豬梅花腩肉質柔嫩鬆軟，燒到邊位嘅油脂變脆就最好食。每日仲會有兩款指定燒肉半價，更加抵食！
 

台式川辣紅燒牛肉刀削麵（$88）

講到台灣料理點少得牛肉麵，紅燒湯底用咗牛大骨、多款蔬菜同香料以文火熬製，味道甘甜，加上川辣醬汁辣勁刺激。一碗有齊彈牙嘅牛腱同帶筋膜嘅牛肋條，而麵條可以選擇Q彈嘅刀削麵，或者比較幼身嘅陽春麵。
 

 

美酒加美食One plus One Set（$178/揀一款小食+紅或白酒一支/生啤兩杯，星期一至四限定）

吹住海風三五知己想飲返杯？無問題，呢度有多款紅白酒、啤酒同Cocktail供應。10月中會推出優惠套餐，可以揀一款指定小食配紅酒、白酒或者生啤！
 

德國鹹豬手

無諗到台灣餐廳整德國鹹豬手質素都唔錯，外皮香脆煙韌，豬肉非常入味。亮點係皮肉中間嘅一層脂肪，燒完之後變得完全唔油膩，反而口感軟滑又香口，值得一試！
 

台式小食拼盤

集合三款香口台式小食：鹽酥雞炸至金黃香脆，兩款台灣香腸都相當油潤香口，甜不辣外面微脆裡面軟Q。
 

惹味鹵水拼盤

呢個拼盤就改為三款鹵水：牛肚、牛腱、牛筋，全部都相當入味。
 

川味辣子雞丁

火辣辣子蝦

兩款以辣為主嘅菜式都放咗唔少辣椒，一上枱就聞到香味，辣味唔會太嗆，不過如果麻度再高啲會更惹味。
 

戀上台式料理
地址：將軍澳唐俊街21號翩匯坊地下G26號舖

文、相、片：Cathy