香港人愛吃日本菜，搵食到深圳少不了日本料理的份兒，當中以放題形式最受歡迎，當然這些放題菜式質素不會很高，但勝在價錢平選擇多，不愁無市場。
（Cover photo by 小連）

(Photo by 小連)
中西日菜有齊 品村料理 D21西餐
深圳日式放題中，品村是其中一個熱門選擇，因為任點任叫菜式包括中西日菜，其中日本菜款式以刺身、壽司、卷物、天婦羅及燒物為主，海膽刺身一板一板上枱，日式茶壺湯亦受不少食家讚賞，非日本料理類的鵝肝多士、果木牛扒及炸乳鴿等也很受歡迎。不過食家對侍應服務毀譽參半，有人讚服務勤快周到，但也有人說漏單情況不時發生。
小連：魚生新鮮爽口，不過凍左啲﹗漏左講我最愛啤酒，Asahi生啤任飲呀﹗岩哂我﹗果木烤牛扒，超正﹗未食已聞到陣陣烤香，入口肉質鮮嫩味濃多汁，烤得岩岩好六成熟左右，同枱老友記大叫一流呀﹗
HeungHalo：此處之天婦羅炸得樣靚同香脆，燒魚亦好味。而中式炆豬手就好正，炆得夠淋同夠味，使到連叫兩次此菜。此外茶壺海鮮湯都好正。

(Photo by SweetPotato)
刺身選擇多 上井精緻日本料理
菜式選擇甚多的上井料理放題，自助餐午市$128、晚市$188，價錢分別在於較貴的包括貴價菜式在內，例如一板板的海膽、花之戀壽司等。而鐵板牛肉、燒鰻魚、芝士焗扇貝都被食家推介，以百多元的價錢可算物有所值。不過不少食家遇到海膽份量太小的問題，人數少但想多吃一點看來要努力向侍應落單爭取了。
Masayuki：海膽好豪一板板上，無限叫(當然佢上唔上比你食，上幾多板就god knows喇！)海膽質素唔錯！唔腥味、唔臭、無木板味，夠鮮，你好彩的話仲會有d creamy同海水海膽味夠balance既比你食到！好有驚喜！
hihi1031：三文魚幾肥美，還有三文魚籽、北寄貝、海胆、甜蝦、魷魚、鱆紅、吞拿魚，最鮮味的要算赤貝，在香港的日式食肆，也不易食到咁新鮮，夠味和爽口的赤貝。不可不提的係燒飯團，都很不錯，燒得香脆的飯團，底下還有一片脆脆紫菜，我用來跟刺身同食，減低漏的感覺。

(Photo by 松尾美晴)
菜式水準均一 優佳一
優佳一的裝潢陳設不及其它日式放題店般精緻華麗，不過200多款菜式的食物質素卻很不錯，部份菜式更是比較少見，例如淮出天婦羅及炸三文魚魚皮等，難得的是各類菜式出品水準平均，赤貝刺身、清酒煮花甲、燒石斑及燒鵝肝均是必食推介。由於午市商務客多，午市自助餐與晚餐價錢相若。
wksm71：剩食赤貝我已覺得回晒本，D赤貝真係好鮮味，YUMMY。之後又叫了泡菜、小食、串燒、毛豆、涷豆腐、燒雞翼、水煮蜆、炒蜆、秋刀魚、關東煮、燒茄子、燒三文魚骨等等……都好有水準，整得好好味，冇一碟我地話唔好味。
Jessica5：朋友帶我試優佳一任叫任食自助餐(晚餐)，又平又好食，非常之值得推介。白魚豚刺身：好滑好爽好鮮，口感似三文魚加雪梨，menu 冇架，要自己問，好地要左兩個round，好味。

(Photo by 米雪 S)
鐵板燒x日食放題 忍者居
忍者居由香港飲食集團經營，日式放題分為日本料理及鐵板燒兩類，日本料理各類型菜式都有，更連水果壽司也有供應，不過還是以三文魚腩及甜蝦壽司較受歡迎。如果不吃放題的話，指定時段壽司有買一送一優惠，非常抵食。
無名.....：甜蝦黎到，勁大盤，但係張台又勁細，所以要好快ko，真係又甜又爽，絕冇因為平而走樣。三文魚腩壽司係白碟，$10/碟，依家買一送一即係都係$5/碟。嘩，三文魚腩都係$2.5一件，仲平過板前板長既三文魚壽司！三文魚腩夠凍夠厚，冇乜筋。
陳肥肥：總括黎講，地方闊落、價錢合理、服務可接受，漏單都只係好似漏左個炸豆腐，個廁都好乾淨~~都幾適合一家大細、朋友同情侶黎開餐架！

(Photo by LeStanley)
抵食之選 大漁鐵板燒
大漁在國內連鎖店眾多，單是深圳都超過5間分店，除了鐵板燒各類日本料理也有供應，其受歡迎之處在於每位$150可任飲任食，更不設加一，加上菜式選擇夠多，例如連馬肉刺身及和牛刺身都有，燒蠔、元貝、大蝦等海鮮也不缺，所以不少食家都讚以這個價錢，在香港很難找到如此多食物選擇的放題。
LeStanley：鹽燒三文魚頭：呢個好good，我哋叫完一個又一個，個魚頭真係好大的呀。我哋totally order左4個，但係就越叫越咸！最後嗰兩個我哋係唔可以連骨食or要飛左層魚皮黎食。d魚肉好滑，正！值得一試既係佢哋既洛神茶同烏梅汁，兩杯都係酸酸咁好開胃，如果酒量好既話一定要試佢個青梅酒，勁易入口，但係都勁易醉！
司提反在基督裡：食物真的弄得很好，刺身很新鮮，跟香港的放題沒得比，刺身也不用你跟一舊壽司飯，這店完全沒意思要用平價東西弄飽客人。最值得一讚，是給予的份量很好！起初看餐牌，看到樣樣也好像很多件，但原來侍應看到我們只有兩個人，就給了兩人的份量給我們。大份的一人一份，小份的會多給一點。