平時去主題Cafe通常都係以卡通大頭造型食物掛帥，但今次一打開餐牌你會嚇一跳：炸雞丼配蛋黃醬，黑鼆鼆嘅炒蛋......就咁睇好似係伏食，但有一類人一定會爭相點嚟食，講緊個就係日本動漫《銀魂》嘅超級Fans！
荃灣Youme cafe一直都有唔同動漫主題，例如舊年年中嘅小櫻Cafe。今次佢地食住日本真人版電影個勢同《銀魂》合作，餐牌設計亦相當有心思。
最吸睛嘅應該就係呢碗「南蠻炸雞丼土方特製」，重點當然就係土方瘋狂熱愛，食任何嘢都要加嘅嗰支蛋黃醬！不過特別係唔食得辣嘅Fans唔好太興奮，一個唔小心揀咗Wasabi蛋黃醬，咁就萬事屋都未必幫到你喇。
另外暗黑料理界嘅第一把交椅志村妙當然亦唔執輸，「妙的雞蛋料理」完全就係Fans最想打卡嘅代表作！雖然賣相同漫畫入面一樣黑鼆鼆，但放心其實係墨魚汁嚟嘅。另外當然亦唔少得主角阿銀啦，宇治抹茶就聽得多，呢碗「宇治銀時！」先特別㗎嘛！重點係上面塊「糖分」，完全好似入咗萬事屋咁，嘻嘻。
更多【飲食潮流】： |
呢碟「於草原上的艾利撒比斯」亦非常過癮，用飯砌成嘅艾利撒比斯已經夠玩味，最特別嘅係佢舉嘅字仲會隨機出㗎。
今次銀魂Cafe限定餐牌上除咗12款食品之外，仲有9款特飲，全部都以唔同人物嚟做主題。例如見到大紅色加紙傘就知道係神樂嘅「神樂的草莓黑加倫子梳打」，藍色呢杯「志村新八的藍柑荔枝梳打」上面仲要有埋新八嘅本體：眼鏡！「沖田總悟的珍珠奶茶」亦非常活靈活現嘅呢。
今次銀魂Cafe將會由3月15號舉行至4月27號，奉勸各位忠實Fans除咗提早Book枱同帶定銀彈之外，手機同相機亦要叉足電嚟集郵喔！
文：Cathy
開飯編輯推介：
2. 2月份好評餐廳十強
熱門文章推介：
隨時接收最新資訊
讚好OpenRice專頁！